JEREMAÏAH 19 - KA BAIBL

Ka jinghikai na ka pharshi u khiew ba la pynpait

¹ Kumne u la ong U Trai, “To khie, bad to thied u kum u nongthaw khiew, bad to shim kiba na ki tymmen basan ki paidbah, bad na ki tymmen basan ki lyngdoh;

² bad khie leit sha ka them u khun u Hinnom, kaba ha ka jingkhang ka khyrdop Harsith, bad to pynbna hangta ïa ki ktien kiba ngan ïathuh ha me:

³ bad to ong, ‘To sngew phi ïa ka ktien U Trai, ko ki syiem ka Judah, bad kiba shong ha Jerusalem; kumne u ong U Trai ki paid, U Blei ki Israel, “Ha khmih, ngan pynwan ïa ka jingsniew halor kane ka jaka kaba uno uno u ban ïohsngew, ki shkor jong u kin kyllut noh ngiang.

⁴ Namar ba ki la kyntait ïa nga, bad ba ki la pynjngai ïa kane ka jaka, bad ki la thang ka jingiwbih ha ka ha kiwei pat ki blei, kiba kim ju ithuh, ma ki, lymne ki kpa jong ki, lymne ki syiem ka Judah; bad ki la pyndap ïa kane ka jaka da ka snam jong kiba lui lui;

⁵ bad ki la tei ïa ki jaka bajrong jong u Baal, ban thang ha ka ding ïa la ki khun shynrang ban long ki jingainguh thang ha u Baal; ïa kaba ngam shym la hukum, lymne ngam shym la kren, lymne kam shym wan ha ka dohnud jong nga:

⁶ namar kata, ha khmih, ki sngi kin wan,” ’ ” ong U Trai, “ba ïa kane ka jaka yn ym khot shuh ‘Ka Tophet,’ lymne ‘Ka them u khun u Hinnom,’ hynrei, ‘Ka them ka Jingpynïap.’

⁷ Bad ngan pynlong kaba sep ei ïa ka jingpyrkhat ka Judah bad Jerusalem ha kane ka jaka; bad ngan pynkyllon ïa ki da ka waitlam ha khmat ki nongshun jong ki, bad da ka kti kita kiba wad ïa ka jingim jong ki: bad ïa ki metïap jong ki ngan ai ban long jingbam ïa ki sim bneng, bad ïa ki mrad khlaw ka khyndew.

⁸ Bad ngan pynlong ka jinglyngngoh, bad ka jingkynshi, ïa kane ka shnong; uwei uwei baroh uba ïaid nangta un lyngngoh bad un kynshi namar ki jingïapkhlam jong ka baroh.

⁹ Bad ngan pynbam ïa ki da ka doh ki khun shynrang jong ki bad da ka doh ki khun kynthei jong ki, bad kin bam uwei uwei baroh ïa ka doh u lok jong u, ha kata ka jingker kut bad ha kata ka jingshipa, da kaba ki nongshun jong ki, bad kita kiba wad ïa ka jingim jong ki, kin pynshipa ïa ki.

¹⁰ “Hangta te men pynpait ïa uta u kum ha khmat kita ki rangbah kiba leit lem bad me,

¹¹ bad men ong ha ki, ‘Kumne u ong U Trai ki paid: “Kumta keiñ, ngan pynlwet ïa kine ki briew bad ïa kane ka nongbah, kumba pynpait u briew ïa u kum u nongthaw khiew, ïa u bym lah pynlong tylli pat: bad kin tep ïa ki ha Tophet, haduh ba ym ngiam jaka shuh ban tep.

¹² Kumne ngan leh ïa kane ka jaka,” ’ ” ong U Trai, “bad ïa kiba shong ha ka, ngan pynlong keiñ ïa kane ka nongbah kum ka Tophet:

¹³ bad ki ïing ka Jerusalem, bad ki ïing ki syiem ka Judah, ïa kiba la pyntngit, kin long kum ka jaka Tophet, kita ki ïing baroh keiñ kiba halor jrong jong ki, ki la thang ka jingiwbih ha u paidbah bneng baroh, bad ki la theh noh ki jingainguh dih ïa kiwei pat ki blei.”

¹⁴ Ynda kumta, u Jeremaïah u la wan noh na Tophet, sha kaba U Trai u la phah ïa u ban ïathuhlypa; bad u la ïeng ha ka phyllaw ka ïing U Trai, bad u la ong ha u paidbah baroh:

¹⁵ “Kumne u ong U Trai ki paid, U Blei ki Israel, ‘Ha khmih, ngan pynwan halor kane ka nongbah bad halor ki shnong jong ka baroh ïa kata ka jingsniew baroh kaba nga la pynbna pyrshah ïa ki; namar ki la pyneh ïa la ka ryndang, khnang ba kin ym sngew ïa ki ktien jong nga.’ ”