JEREMAÏAH 18 - KA BAIBL

Ka jinghikai na ka pharshi u nongthaw khiew

¹ Ka ktien kaba la wan ha u Jeremaïah na U Trai, ka da ong,

² “To khie, bad leit hiar sha ka ïing u nongthaw khiew, bad hangta ngan pynsngew ïa me ïa ki ktien jong nga.”

³ Hangta nga la leit hiar sha ka ïing u nongthaw khiew, te ha khmih, u trei ïa la ka kam halor ki shalyntem.

⁴ Te haba uta u khiew ba u la thaw da ka 'dewbyrtha u la sniew ha ka kti u nongthaw khiew, u la thaw pat ïa u ban long uwei pat u khiew, katba u ibit u nongthaw khiew ban thaw ïa u.

⁵ Ynda kumta, ka ktien U Trai ka la wan ha nga, ka da ong,

⁶ “Ko ka ïing Israel, hato ngam lah ban leh bad phi kum une u nongthaw khiew?” ong U Trai. “Ha khmih, kum ka 'dewbyrtha ha ka kti u nongthaw khiew, kumta phi long ha ka kti jong nga, ko ka ïing Israel.

⁷ Ha kano kano ka por ba ngan kren shaphang ka jaid bynriew, bad shaphang ka hima, ïa ka ban rat noh ïa ka, ban pynpra noh bad ban pynjot ïa ka;

⁸ lada kata ka jaid bynriew, kaba nga la kren shaphang jong ka, kan phai na ka jingsniew jong ki, ngan kylla-ka-bamut shaphang kata ka jingsniew kaba nga la mut ban leh ïa ki.

⁹ Bad ha kano kano ka por ba ngan kren shaphang ka jaid bynriew, bad shaphang ka hima, ban tei bad ban thung ïa ka;

¹⁰ lada kan leh sniew ha khmat jong nga, ba kan ym kohnguh ïa ka ktien jong nga, kumta ngan kylla-ka-bamut shaphang kata ka babha, ba nga la ong ba ngan pynbha ïa ki da kata.

¹¹ Namar kata, to khie leit, to kren ïa ki rangbah Judah, bad ïa kiba shong ha Jerusalem, to ong, ‘Kumne u ong U Trai: “Ha khmih, nga khreh ïa ka basniew ïa phi, bad nga thaw ïa ka buit ban ïaleh ïa phi: to phai noh phi mynta uwei uwei baroh na la ka lynti basniew, bad to pynbeit ïa la ki lynti bad ïa la ki jingleh.”

¹² “ ‘Hynrei ki ong, Ym don jingkyrmen; naba ngin ïaid katba kum ka buit jong ngi hi, bad ngin leh uwei uwei baroh katba kum ka jingmutlop ka dohnud sniew jong u.’ ”

¹³ Namar kata, kumne u ong U Trai: “To kylli te hapdeng ki jaid bynriew, mano ba la ïohsngew kat kine kiei kiei; ka theisotti Israel ka la leh ïa kaba sngewshyrkhei.

¹⁴ Hato ka ïor u Lebanon kan duh na u mawbah ka lyngkha? Lane kita ki um pjah kiba tuid na sha jngai kin rngad noh?

¹⁵ Naba ki briew jong nga ki la klet ïa nga, ki la thang ka jingiwbih ïa ka jingthala; bad ki la pynjynthut ïa ki ha ki lynti jong ki, ha ki lynti ïaid ki barim, ba kin ïaid ha ki lynti khlaw, ha ka lynti bym ju ïaid;

¹⁶ ïa ka ban pynlong ïa la ka ri ka jinglyngngoh, bad ka jingkynshi kaba borabor; uwei uwei baroh uba ïaid nangta un lyngngoh, bad un kyrngah ïa la ka khlieh.

¹⁷ Ngan pynsaphred ïa ki kum da ka lyer mihngi ha khmat u nongshun; ngan khmih ïa ka ingdong jong ki, bad ym ïa ka khmat jong ki, ha ka sngi ka jingjynjar jong ki.”

U Jeremaïah u duwai pyrshah ïa kiba ïashet ïa u

¹⁸ Ynda kumta, ki la ong, “Ïa, to ngin ïathaw ki buit ban ïaleh ïa u Jeremaïah; naba ka hukum kan ym duh na u lyngdoh, lymne ka jingpyrkhat na uba stad, lymne ka ktien na u nongïathuhlypa, ïa ngin shoh ïa u da u thylliej, bad to ngin ym shahshkor ïa kino kino ki ktien jong u.”

¹⁹ To shahshkor ïa nga, A Trai, bad to sngap ïa ka ktien jong kita kiba ïaleh ïa nga.

²⁰ Hato yn siew kylliang da ka basniew ïa ka babha? Naba ki la tih thliew ïa ka mynsiem jong nga. To kynmaw kumno nga la ïeng ha khmat jong me ban kren ïa ka babha na ka bynta jong ki, ban pynphai noh na ki ïa ka jingbitar jong me.

²¹ Namar kata, to ai noh ïa ki khun jong ki ha ka 'nemsniew, bad aiti noh ïa ki ha ka bor ka waitlam; bad to ki tnga jong ki kin long kiba la duh khun, bad ki riewkynthei; bad ki rangbah jong ki ai ban pynïap ïa ki da ka jingïap, bad ban pom da ka waitlam ha ka thma ïa ki samla jong ki.

²² Ai ban ïohsngew ka jinglynñiar na ki ïing jong ki, haba men lap kyndit ïa ki da u paid: naba ki la tih ka 'liewlep ban kem ïa nga, bad ki la buhrieh ka jingriam ïa ki kjat jong nga.

²³ Hynrei me, A Trai, me tip ïa ka jingpyrkhat jong ki pyrshah ïa nga ban pynïap ïa nga; wat map ïa ka jingleh bymhok jong ki, lymne wat pyndam noh na khmat jong me ïa ka pop jong ki: hynrei, to yn pynkyllon ïa ki ha khmat jong me; to leh ïa ki ha ka por ka jingbitar jong me.