JEREMAÏAH 17 - KA BAIBL

Kaba ring mraw ïa ki Judah namar ki pop jong ki

¹ Ïa ka pop ki Judah la thoh da u khulom nar, bad da ka khmut u diamond: la mut dak ïa ka ha u maw lyngkniap ka dohnud jong ki, bad ha ki reng ki duwan jong phi;

² haba ki khun jong ki, ki ïakynmaw ïa kita ki duwan jong ki bad ïa ki Asherah jong ki hajan ki dieng bajyrngam halor ki lum bajrong.

³ Ko u lum bah jong nga ha ka pyntha, ngan ai noh ïa ka spah bad ïa ki jingkynshew jong me baroh ban long ka jinglute, bad ïa ki jaka bajrong jong me, namar ka pop ha ki phang jong me baroh.

⁴ Bad ma me, na lade hi, men wai noh na kane ka ri kynti kaba nga la ai ha me; bad ngan pynlong ba men shakri ïa la ki nongshun ha ka ri kaba mem ithuh: namar phi la tbeh ka ding ha ka jingbitar jong nga ka ban ing junom.

⁵ Kumne u ong U Trai: “To long ba la tim uta u briew uba shaniah ha u briew, bad uba pynlong ïa ka doh ka ksang'ti jong u, bad uba ka dohnud jong u ka kynriah na U Trai.

⁶ Naba un long kum u dieng Retem ha ri khlaw, bad un ym ïohi haba wan ka babha; hynrei, un shong ha ki jaka ryngkhiang ha ka ri shyiap, ka 'dewmluh ka bymshong briew.”

⁷ Suk uta u briew uba shaniah ha U Trai, bad uba ka jingshaniah jong u long U Trai.

⁸ Naba un long kum u dieng ba la thung hajan ki um, bad uba pur ïa la ki thied hajan ka wah, ba un ym sheptieng haba wan ka jingshit, hynrei, ka sla jong u kan long jyrngam; bad ha ka snem barang ryngkhiang un ym sumar khuslai, lymne un ym pep ban sei soh.

⁹ Ka dohnud ka kham shukor ban ïa kiei kiei baroh, bad ka long ka basniew khlem jingkyrmen: uei uba lah ban ithuh ïa ka?

¹⁰ “Nga U Trai uba ïit ïa ka dohnud, nga tynjuh ïa ki khyllai, kat ban ai ha uwei uwei baroh katba kum ki lynti jong u, katba kum u soh ki jingleh jong u.”

¹¹ Kum ka 'iar khlaw kaba lum khun kiba kam shym la kha, kumta long uta uba lum spah, hynrei, ym da ka hok; hapdeng ki sngi jong u kin iehnoh ïa u, bad ha kaba kut jong u un long u babieit.

¹² Ka khet ba-donburom, ba la buh halor jrong naduh kaba mynnyngkong, long ka jaka ka ïing kyntang jong ngi.

¹³ A Trai, ka jingkyrmen ki Israel, baroh kiba lyndet ïa me kin lehrain; kita kiba iehnoh noh ïa nga yn thoh ïa ki ha ka khyndew, namar ba ki la lyndet ïa U Trai, ka umpohliew kaba im.

U Jeremaïah u duwai ban ïohlait

¹⁴ To pynkhiah ïa nga, A Trai, te yn pynkhiah ïa nga; to pynim ïa nga, te yn pynim ïa nga: naba me long ka jingïaroh jong nga.

¹⁵ Ha khmih, ki ong ha nga, “Hangno ka ktien U Trai? To kan wan mynta.”

¹⁶ Hynrei nga, ngam shym pynkloi ïa ka ban ym long u nongsharai uba bud ïa me; lymne ngam shym ikwah ïa kata ka sngi kaba kordit; me tip: kata kaba la mih na ki rmiang shyntur jong nga ka la long ha khmat jong me.

¹⁷ Wat long ka jingsheptieng ïa nga: me long ka jaka rieh jong nga ha ka sngi ka jingsniew.

¹⁸ To kin lehrain kita kiba behbeiñ ïa nga, hynrei, wat ai ba ngan lehrain ma nga; to kita kin sngewtriem, hynrei, wat ai ba ngan sngewtriem ma nga: to pynwan halor jong ki ïa kata ka sngi ka jingsniew, bad to pynjot ïa ki da ka jingpynjot kaba ar shah.

Ka jingdawa ban rakhe kyntang ïa ka Sabbaton

¹⁹ Kumne u la ong U Trai ha nga: “Khie leit, bad to ïeng ha ka khyrdop ki khun ki paidbah, na kaba ki syiem ka Judah ki wan bsut, bad na kaba ki leit mih noh, bad ha ki khyrdop ka Jerusalem baroh;

²⁰ bad to ong ha ki, ‘To sngew phi ïa ka ktien U Trai, phi ki syiem ka Judah, bad ki Judah baroh, bad baroh kiba shong ha Jerusalem, kiba rung na kine ki khyrdop;

²¹ kumne u ong U Trai; “To sumar ïa lade, bad wat kit jingkit ha ka sngi Sabbaton, lymne wat wallam shapoh ïa ka na ki khyrdop ka Jerusalem;

²² lymne wat kit shabar ïa ka jingkit na ki ïing jong phi ha ka sngi Sabbaton, lymne wat leh ïa kano kano ka kam: hynrei, phin pynkyntang ïa ka sngi Sabbaton, kumba nga la hukum ïa ki kpa jong phi;”

²³ hynrei, kim shym sngap, lymne kim dem ïa la ka shkor, hynrei, ki la pyneh ïa la ka ryndang, khnang ba kin ym ïohsngew, bad ba kin ym pdiang ïa ka jinghikai.

²⁴ “ ‘Te lada phin sngap bha ïa nga,’ ” ong U Trai, “ïa ka ban ym wallam jingkit na ki khyrdop jong kane ka nongbah ha ka sngi Sabbaton, hynrei, ban pynkyntang ïa ka sngi Sabbaton, ban ym leh ïa kano kano ka kam ha ka;

²⁵ ynda kumta, kin rung na ki khyrdop kane ka nongbah ki syiem bad ki bakhraw batri kiba shong halor ka khet u Dabid, ki da shong ha ki kali bad ha ki kulai, kita, bad ki bakhraw batri jong ki, ki rangbah Judah, bad kiba shong ha Jerusalem: bad kane ka nongbah kan neh junom.

²⁶ Bad kin wan na ki nongbah ka Judah, bad na ki jaka kiba baroh sawdong ka Jerusalem, bad na ka ri Benjamin, bad na ka ri them, bad na ki lum, bad na ka shathie, ki da wallam ka jingainguh thang, bad ki jingkñia, bad ki jingainguh bam, bad ka jingiwbih, ki da wallam ruh ki jingkñia ainguh, ha ka ïing U Trai.

²⁷ Hynrei, lada phin ym sngap ïa nga, ïa ka ban pynkyntang ïa ka sngi Sabbaton, bad ban ym kit jingkit bad rung na ki khyrdop ka Jerusalem ha ka sngi Sabbaton; te ngan tbeh ka ding ha ki khyrdop jong ka, bad kan bam duh ïa ki ïingpaki ka Jerusalem, bad yn ym pynlip ïa ka.”