JEREMAÏAH 16 - KA BAIBL

Ka jingïathuhlypa shaphang ka jingpynduh khoit ïa ki Israel

¹ Ka ktien U Trai ka la wan ruh ha nga, ka da ong,

² “Men ym shim kurim ïa ka kynthei, lymne men ym ïoh khun shynrang lane khun kynthei ha kane ka jaka.”

³ Naba kumne u ong U Trai shaphang ki khun shynrang bad shaphang ki khun kynthei kiba la kha ha kane ka jaka, bad shaphang ki kmie jong ki kiba la kha ïa ki, bad shaphang ki kpa jong ki kiba la pynkha ïa ki ha kane ka ri:

⁴ “Kin ïap da ki jingïap kiba shitom; yn ym ïambriew ïa ki, lymne yn ym tep ïa ki; kin long kum ka kynsha halor ka khmat ka khyndew: bad yn bam duh ïa ki da ka waitlam, bad da ka 'nemsniew; ki metïap jong ki kin long jingbam ïa ki sim ka suiñ, bad ïa ki mrad khlaw ka khyndew.”

⁵ Naba kumne u ong U Trai, “Wat leit bsut sha ka ïing ba ki ïam sngewsih, lymne wat leit ban ïambriew, lymne wat ud isynei ïa ki: naba nga la shim noh ïa la ka jingsuk na kine ki briew,” ong U Trai, “ïa ka jingleh ieit bad ki jingisynei bajem keiñ.

⁶ Bad ki bakhraw bad ki barit kin ïap ha kane ka ri: yn ym tep ïa ki, lymne ki briew kin ym ïambriew ïa ki, lymne kin ym ot ïa lade, lymne pynlyndum ïa lade namar jong ki:

⁷ lymne ki briew kin ym kdiah kpu na ka bynta jong ki ha kaba ïambriew, ban pyntngen ïa ki namar ki baïap; lymne kin ym ai dih ïa ki na ka khuri ka jingpyntngen namar u kpa jong ki lane namar ka kmie jong ki.

⁸ Bad men ym leit bsut sha ka ïing jingkhawai ban shong bad ki, ban ïabam ïadih.”

⁹ Naba kumne u ong U Trai ki paid, U Blei ki Israel: “Ha khmih, ngan pynduh noh na kane ka jaka, ha khmat jong phi bad ha ki sngi jong phi, ïa ka jingsawa ka jingtamsa bad ka jingsawa ka jingkmen, bad ïa ka jingsawa u nongleit-kurim bad ka jingsawa ka nongleit-kurim.

¹⁰ “Te haba men pyni ha kine ki briew ïa kine ki ktien baroh, bad ba kin ong ha me, ‘Namar balei ba U Trai u la kren ïa kane ka jingshitom bakhraw baroh ïa ngi? Lane kaei ka jingleh bymhok jong ngi? Lane kaei ka pop jong ngi kaba ngi la leh ïa U Trai U Blei jong ngi?’

¹¹ hangta men ong ha ki, ‘Namar ki kpa jong phi ki la iehnoh ïa nga,’ ong U Trai, ‘bad ki la bud ïa kiwei pat ki blei, bad ki la shakri ïa ki, bad ki la mane ïa ki, bad ki la iehnoh ïa nga, bad kim shym sumar ïa ka aiñ jong nga;

¹² bad phi la nang kham leh sniew ban ïa ki kpa jong phi; naba ha khmih, phi baroh phi ïaid ha ka jingmutlop la ka jong ka jong ka dohnud sniew, kumta phim sngew ïa nga:

¹³ namar kata, ngan shop noh shabar ïa phi na kane ka ri sha ka ri kaba phim ithuh, lymne ma phi lymne ki kpa jong phi; hangta te phin shakri ïa kiwei pat ki blei, mynsngi bad mynmiet; naba ngan ym pyni ïa ka jingsngewbha ïa phi.’

¹⁴ “Namar kata, ha khmih, ki sngi kin wan,” ong U Trai, “haba yn ym ong shuh, ‘Katba im U Trai, uba la wallam ïa ki khun Israel na ka ri Ijipt;’

¹⁵ hynrei, ‘Katba im U Trai, uba la wallam ïa ki khun Israel na ka ri shatei, bad na ki ri baroh kat shaba u la beh noh ïa ki:’ bad ngan wallam pat ïa ki sha la ka ri kaba nga la ai ha ki kpa jong ki.

¹⁶ “Ha khmih, ngan phah khot shibun ki nongtong dohkha,” ong U Trai, “bad kin tong ïa ki; bad hadien kata, ngan phah khot shibun ki nongbeh mrad, bad kin beh mrad ïa ki na u lum bah baroh, bad na u lum rit baroh, bad na ki thliew ki mawsiang.

¹⁷ Naba ki khmat jong nga ki don ha ki lynti jong ki baroh: ym shym la buhrieh ïa ki na khmat jong nga, lymne ym shym buhrieh ïa ka jingleh bymhok jong ki na ki khmat jong nga.

¹⁸ Nyngkong eh te ngan siew ar shah ïa ka jingleh bymhok jong ki bad ïa ka pop jong ki; namar ki la pyntngit ïa ka ri jong nga da ki metïap jong kiei kiei kiba isih jong ki, bad ki la pyndap ïa ka ri kynti jong nga da ki jingijli jong ki.”

¹⁹ A Trai, ka bor jong nga, bad ka kut baskhem jong nga, bad ka jaka rieh jong nga ha ka sngi ka jingjynjar, sha me ki jaid bynriew kin wan na ki bakut ka khyndew, bad kin ong, “Ki kpa jong ngi kim shym ïoh ei ei, hynrei, tang ki jinglamler, ïa ka jingthala keiñ, bad kiei kiei ki bym pynmyntoi.

²⁰ Hato u briew un thaw ki blei ha lade, ki bymlong ki blei pynban?

²¹ “Namar kata, ha khmih, ngan pyntip ha ki, ha kane shi sien ngan pyntip keiñ ha ki ïa ka kti jong nga bad ïa ka bor jong nga; bad kin ïoh tip ba ka kyrteng jong nga long U Jehobah.”