JEREMAÏAH 15 - KA BAIBL

Ka jingbitar shla U Blei ïa ka Judah

¹ Ynda kumta U Trai u la ong ha nga, “La u Moses bad u Samuel ki ïeng ha khmat jong nga, pynban, ka jingmut jong nga kam lah ban phai sha kine ki briew: to shop noh ïa ki na khmat jong nga, bad to kin leit noh.

² Bad haba kin ong ïa me, ‘Shano ngin leit noh?’ hangta te men ïathuh ha ki, “Kumne u ong U Trai: ‘Kat kiba dei ïa ka jingïap, sha ka jingïap; bad kat kiba dei ïa ka waitlam, sha ka waitlam; bad kat kiba dei ïa ka 'nemsniew, sha ka 'nemsniew; bad kat kiba dei ban long mraw, sha kaba long mraw.’

³ “Bad ngan thung saw jaid halor jong ki,” ong U Trai: “ïa ka waitlam ban pynïap, ïa ki ksew ban tar, bad ïa ki sim bneng bad ki mrad khlaw, ban bam bad ban pynduh.

⁴ Bad ngan pynpashat ïa ki shane shatai hapdeng ki hima baroh jong ka khyndew, namar u Manasseh u khun u Hesekaïah u syiem ka Judah, namar kaba u la leh ha Jerusalem.

⁵ “Naba uei u ban isynei ïa pha, ko Jerusalem? Lane uei u ban rwai sngewsynei ïa pha? Lane uei u ban phai ban kylli pha kumno?

⁶ Pha la kyntait ïa nga,” ong U Trai, “pha la phai dien: namar kata, nga la rah ïa la ka kti ban ïaleh ïa pha, nga la pynjot ïa pha; nga la thait ban kylla-ka-bamut.

⁷ Nga la peh ïa ki ruh da ka jingpeh ha ki khyrdop ka ri; nga la pynduh khun ïa ki, nga la pynjot ïa la ki briew; kim shym phai noh na la ki lynti.

⁸ Ki riewkynthei jong ki, ki la nang kham bun ïa u shyiap ki duriaw: nga la pynwan halor jong ki pyrshah ïa ki kmie jong kita ki samla, ïa u nonglute ha kaba shiteng sngi: ïa ka jingkhuslai bad ka jingshyrkhei nga la pynhap kyndit halor jong ka.

⁹ Kata kaba la kha hynñiew ngut ka sngewlwait; ka la dkut mynsiem; ka sngi jong ka, ka la sep haba ka dang shai; la pynlehrain bad la pynlyngngoh ïa ka: bad kiba dang sah na ki ngan ai noh ha ka waitlam ha khmat ki nongshun jong ki,” ong U Trai.

Ka jingujor U Jeremaïah

¹⁰ Kordit ïa nga, ko mei, ba pha la kha ïa nga u briew ka jingïaleh bad u briew ka jingïakajia ïa ka khyndew baroh! Ngam shym ai sut, lymne ym shym la ai sut ha nga; pynban, baroh ki tim ïa nga.

¹¹ U Trai u la ong, “Da shisha ngan pynkhlaiñ ïa me ïa ka ban bha; da shisha ngan pynlong ba ki nongshun jong me kin kyrpad ïa me ha ka por ka jingsniew bad ha ka por ka jingjynjar.

¹² U lah uno uno ban pynkheiñ ïa ka nar, ïa ka nar na shatei, bad ïa ka rnong?

¹³ “Ïa ka spah bad ki jingkynshew jong pha ngan ai noh ban long ka jinglute khlem nong, bad kata ruh namar ki pop jong pha baroh, ha ki phang jong pha baroh keiñ.

¹⁴ Bad ngan phah noh ïa ki lem bad ki nongshun jong pha sha ka ri kaba pham tip: naba la tbeh ding ha ka jingbitar jong nga, ka ban meh halor jong pha.”

¹⁵ A Trai, me tip: to kynmaw ïa nga, to wan khmih ïa nga, bad to pynhiar kput ïa nga halor ki nongbehbeiñ ïa nga; wat shim noh ïa nga ha ka jingshahslem jong me: to tip ba na ka bynta jong me nga la shah ka jingrkhiebeiñ.

¹⁶ La shem ïa ki ktien jong me, bad nga la bam ïa ki; te ki ktien jong me ki la long ha nga ka jingkmen bad ka jingshadkmen ka dohnud jong nga: namar la khot ïa nga da ka kyrteng jong me, A Trai U Blei ki paid.

¹⁷ Ngam shym shong ha ka jingïaseng jong kita kiba leh sngewbha, lymne ngam shym leh kmen: nga la shong weibriew namar ka kti jong me; naba me la pyndap ïa nga da ka jingbitar.

¹⁸ Balei ba ka long borabor ka jingsuh jong nga, bad ba ka jingmong jong nga ka bym lah khiah shuh, ka bym treh hi ban khiah? Shisha men long ïa nga kum ka wah ka bashukor, kum ki um ki bymthikna?

Ka Jingkular U Blei ïa u Jeremaïah

¹⁹ Namar kata, kumne u ong U Trai, “Lada men phai pat, te ngan wallam ïa me pat, ba men ïoh ïeng ha khmat jong nga; bad lada men shim ïa kaba kordor na kaba poh, te men long kum ka shyntur jong nga: ki kin phai pat sha me, hynrei, me men ym phai pat sha ki.

²⁰ Bad ngan pynlong ïa me ka kynroh ker kaba da ka rnong ha une u paidbah; te kin ïaleh ïa me, hynrei, kin ym jop ïa me: naba nga don lem bad me ban pynim ïa me bad ban pyllait ïa me,” ong U Trai.

²¹ “Bad ngan pyllait ïa me na ka kti jong ki bymman, bad ngan siewspah ïa me na ka kti jong kiba itriem.”