JEREMAÏAH 14 - KA BAIBL

Ka 'nemsniew kaba jur

¹ Ka Ktien U Trai kaba la wan ha u Jeremaïah shaphang kata ka 'nemsniew.

² “Ka Judah ka ïam, bad ki khyrdop jong ki, ki thap bieit, ki shong kup jaiñïong halor ka khyndew; bad ka jinglynñiar ka Jerusalem ka la leit kiew.

³ Bad ki bakhraw batri jong ki, ki phah ïa la ki khun rit sha ki um: ki wan sha ki thliew um, te kim shem um; ki leit phai noh bad la ki khiew suda: ki lehrain bad ki sngewlyngngoh, ki tap ïa la ki khlieh.

⁴ Namar ba la pdang ka khyndew, ba ym don slap ha ka ri, ki nonglur ki lehrain, ki tap ïa la ki khlieh.

⁵ Shisha ruh, ka skei ka kha ha lum, bad ka iehnoh noh ïa la i khun, namar ba ym don phlang.

⁶ Bad ki kadda khlaw ki shu ïeng halor ki lum balyngki, ki ïa-ang ban ïoh lyer kum ki ksar; ki khmat jong ki, ki byrïe, namar bymdon jhur.

⁷ “La ki jingleh bymhok jong ngi ki sakhi pyrshah ïa ngi, to leh ma me na ka bynta ka kyrteng jong me, A Trai; namar ki jingkylla dien jong ngi ki la bun; ngi la leh pop ïa me.

⁸ A me uba ka jingkyrmen jong ki Israel, u nongpynim jong ki ha ka por ka jingjynjar, balei me long kum u sohshnong ha ka ri, bad kum u nongleit jingleit uba shu wan ban thiah miet?

⁹ Balei ba me long kum u briew uba lyngngoh, kum u rangbah bakhlaiñ u bym lah pynim? La kumta ruh me, A Trai, me don hapdeng jong ngi, bad la khot ïa ngi da ka kyrteng jong me; wat iehnoh ïa ngi.”

¹⁰ Kumne u ong U Trai ha une u paidbah, “Kumta keiñ, ki la sngewbha ban sakma noh; kim shym khang ïa la ki kjat: namar kata, U Trai um pdiang sngewbha ïa ki; mynta un kynmaw ïa ki jingleh bymhok jong ki, bad un wan-i ïa ki pop jong ki.”

¹¹ Bad U Trai u la ong ha nga, “Wat duwai na ka bynta une u paidbah ban ïoh jingbha ïa ki.

¹² Haba ki shah jingit, ngan ym sngap ïa ka jinglynñiar jong ki; bad haba ki ainguh da ka jingainguh thang bad ka jingainguh bam, ngan ym pdiang sngewbha ïa ki: hynrei, ngan bam duh ïa ki da ka waitlam, bad da ka 'nemsniew, bad da ka jingïapkhlam.”

Ki nongïathuhlypa lamler

¹³ Ynda kumta, nga la ong, “A, Trai U Blei! Ha khmih, ki nongïathuhlypa ki ong ha ki, ‘Phin ym ïohi ïa ka waitlam, lymne phin ym ïoh ka 'nemsniew; hynrei, ngan ai ka jingsuk kaba skhem ha kane ka jaka.’ ”

¹⁴ Ynda kumta, U Trai u la ong ha nga, “Kita ki nongïathuhlypa ki ïathuhlypa lamler ha ka kyrteng jong nga: ngam shym phah ma nga ïa ki, lymne ngam shym hukum ïa ki, lymne ngam shym kren ha ki: ki ïathuhlypa ïa ka jingithuhpaw balamler ha phi, bad ka jingkren byrtong, bad ka jingthala, bad ïa ka jingshukor ka dohnud jong ki hi.”

¹⁵ Namar kata, kumne u ong U Trai shaphang kita ki nongïathuhlypa kiba ïathuhlypa ha ka kyrteng jong nga, te kiba ngam shym la phah, pynban kiba ong, “Ka waitlam bad ka 'nemsniew kin ym long ha kane ka ri:” “Da ka waitlam bad ka 'nemsniew yn bam duh noh ïa kita ki nongïathuhlypa.

¹⁶ Bad kita ki briew ha kiba ki ïathuhlypa yn bred noh ïa ki sha ki lynti shnong ka Jerusalem namar ka 'nemsniew bad ka waitlam: te yn ym don ki ban tep ïa ki, ïa ki keiñ, ïa ki tnga jong ki, lymne ïa ki khun shynrang jong ki, lymne ïa ki khun kynthei jong ki de; naba ngan theh ïa ka jingbymman jong ki halor jong ki.”

¹⁷ Bad men ong ïa kane ka ktien ha ki, “Ai ba ki khmat jong nga kin jaw ummat synñia sngi, bad ba kin ym wai noh; namar ïa ka khun sotti ki briew jong nga la pynpra noh da ka jingpra ka bakhraw, da ka jingmong kaba jur eh.

¹⁸ Lada nga leit mih sha madan, ha khmih hangta ïa kiba la pynïap da ka waitlam! Bad lada nga rung shapoh shnong, ha khmih hangta ki bapang namar ka 'nemsniew! Naba u nongïathuhlypa bad u lyngdoh ki ïa-ïaid kylleng ha ka ri, te kim don ka jingtip satia.”

¹⁹ Hato me la kyntait phar ïa ka Judah? Ka mynsiem jong me ka la isih ïa ka Seïon? Balei me la shoh ïa ngi, bad ba ym don ka jingpynkhiah ïa ngi? Ngi la khmih lynti ïa ka jingsuk, hynrei, ka jingbha ei ei kam shym wan; ïa ka aïom ka jingpynkhiah, te ha khmih ka jingkhaw-eit!

²⁰ Ngi phla, A Trai, ïa la ka jingbymman, bad ïa ka jingleh bymhok ki kpa jong ngi: naba ngi la leh pop ïa me.

²¹ Wat isih ïa ngi, na ka bynta ka kyrteng jong me; wat pynjahburom ïa ka khet ka burom jong me: to kynmaw, to wat pynkheiñ ïa la ka jutang bad ngi.

²² Don hapdeng ki jingthala ki Jentil kiba lah ban pynhap slap? Lane ki bneng ki lah ban ai 'lap praw? Ym long ma me uta, A Trai U Blei jong ngi? Namar kata, ngin ap khmih ïa me; namar me la thaw ïa kiei kiei baroh.