JEREMAÏAH 13 - KA BAIBL

Ka dak da ka jingpanpoh linen

¹ Kumne u ong U Trai ha nga, “To khie, bad to thied ha me ïa ka jingpanpoh linen, sa panpoh ïa ka ha la ka syngkai, to wat buh ïa ka ha ka um.”

² Kumta nga la thied ïa ka jingpanpoh kat kum ka ktien U Trai, bad nga la panpoh ïa ka ha la ka syngkai.

³ Bad ka ktien U Trai ka la wan ha nga ka ba-ar sien, ka da ong,

⁴ “To shim ïa kata ka jingpanpoh kaba me la thied, kaba ha ka syngkai jong me, bad to ïeng, leit sha ka Ïuphratis, bad to buhrieh ïa ka hangta ha ka thliew u mawsiang.”

⁵ Kumta nga la leit, bad nga la buhrieh ïa ka hajan ka Ïuphratis, kumba U Trai u la hukum ïa nga.

⁶ Te hadien bun sngi, U Trai u la ong ha nga, “To ïeng, khie leit sha ka Ïuphratis, bad to shim nangta ïa kata ka jingpanpoh, kaba nga la hukum ïa me ban buhrieh hangta.”

⁷ Ynda kumta, nga la leit sha ka Ïuphratis, bad nga la tih, bad nga la shim ïa kata ka jingpanpoh na ka jaka ha kaba nga la buhrieh ïa ka: te ha khmih, ka jingpanpoh ka la lah pyut, ka bymlarkam shuh.

⁸ Ynda kumta, ka ktien U Trai ka la wan ha nga, ka da ong,

⁹ “Kumne u ong U Trai, ‘Kum ha kane ka rukom ngan pynpyut ïa ka jingsarong u Judah, bad ïa ka jingsarong ka bakhraw ka Jerusalem.

¹⁰ Une u paidbah basniew, u bym treh ban sngap ïa ki ktien jong nga, uba ïaid ha ka jingmutlop ka dohnud jong ki, bad kiba la leit bud ïa kiwei pat ki blei ban shakri ïa ki, bad ban mane ïa ki, kin long keiñ kum kane ka jingpanpoh, ka bymlarkam shuh.

¹¹ Naba kumba ka jingpanpoh ka snoh ha ka syngkai u briew, kumta nga ruh nga la pynsnoh ha nga ïa ka ïing Israel baroh bad ïa ki ïing Judah baroh,’ ” ong U Trai; “ba kin ïoh long ha nga u paidbah, bad ka nam, bad ka jingïaroh, bad ka burom: hynrei, kim treh ban sngap.”

Ka pharshi ki lywa snieh ba la pyndap da ka Waiñ

¹² Namar kata, men kren ha ki ïa kane ka ktien: “Kumne u ong U Trai, U Blei ki Israel, ‘Yn pyndap da ka Waiñ ïa ka lywa snieh baroh:’ ki te kin ong ha me, ‘Hato ngim tip ba yn pyndap ïa ka lywa snieh baroh da ka Waiñ?’

¹³ Ynda kumta, men ong ha ki, ‘Kumne u ong U Trai, “Ha khmih, ngan pynkdang ïa baroh kiba shong ha kane ka ri, ïa ki syiem keiñ kiba shong ha ka khet u Dabid, bad ïa ki lyngdoh, bad ïa ki nongïathuhlypa, bad ïa baroh kiba shong ha Jerusalem da ka jingbuaid.

¹⁴ Bad ngan pynïatyngkhuh paralok ïa ki, ïa ki kpa keiñ bad ïa ki khun lang,” ’ ” ong U Trai: “ngan ym isynei, lymne map, lymne sngewsynei, kat ban ym pynduh ïa ki.”

Ka jingring mraw namar ki jingleh bymhok jong ki

¹⁵ To sngew phi, bad to pynshahshkor; wat sngewsarong: naba U Trai u la kren.

¹⁶ To ai burom ha U Trai U Blei jong phi, katba um pat wallam ka jingdum, bad katba kim pat kynduh ki kjat jong phi ha ki lum ba-dum; bad haba phi khmih lynti ïa ka jingshai, ba un pynkylla ka syrngiew ka jingïap ïa ka, bad ba un pynlong ka ba-dum tliw ïa ka.

¹⁷ Hynrei, lada phin ym sngap ïa kane, ka mynsiem jong nga kan ïam ha kaba rieh namar ka jingsarong jong phi; bad ki khmat jong nga kin ïam sat, bad kin tuid da ki jingjaw ummat, namar ba la ring mraw ïa ka kynhun U Trai.

¹⁸ To ong ha u syiem bad ha ka kmie syiem, “To pynrit ïa lade, to shong khop: namar ka la hap ka jingdeng khlieh jong phi, ka pansngiat ka burom jong phi keiñ.

¹⁹ Ïa ki nongbah ka shathie la khang khop, te ym don ban plie ïa ki: la ring mraw ïa ka Judah baroh; la ring mraw lut ïa ka.

²⁰ “To khmied la ki khmat, bad to khmih ïa kita kiba wan na shatei: hangno kata ka kynhun kaba la ai ha me, kata ka kynhun kaba itynnad jong me?

²¹ Men ong aïu, haba un buh ïa ki lok jong me ha khlieh halor jong me, haba ma me hi me la hikai ïa ki ban ïaleh ïa me? Hato ki jingkhuslai kin ym bat ïa me, kum ka kynthei haba suhkhun?

²² Bad lada phan ong ha la ka dohnud, ‘Namar balei ba kine kiei kiei ki la jia ïa nga?’ Namar ka jingkhraw ka jingleh bymhok jong pha keiñ la pynpaw ïa ka jaiñsem jong pha, bad ki khongdong'jat jong pha kin shah leh jubor.

²³ U nong Ethiopia u lah ban pynkylla ïa la ka snep, lane u 'labasa ïa la ka bathoh dak? lada kumta phi ruh phi lah ban leh bha, haba phi la mlien ha kaba leh sniew.

²⁴ Namar kata, ngan pynsaphred ïa ki, kum u stait uba her noh, da ka lyer ka ri khlaw.

²⁵ Kane ka long ka bynta jong pha, bad ka bynta ba hap, kaba la thew ha pha na nga,” ong U Trai; “namar pha la klet noh ïa nga, bad pha la shaniah ha ka jinglamler.

²⁶ Namar kata, nga ruh ngan khyndied ïa ki jaiñsem jong pha halor ka khmat jong pha, te ka jinglehrain jong pha kan paw.

²⁷ Nga la ïohi ïa ki jingijli jong pha, ïa ka jingklim jong pha keiñ, bad ki jingpah jong pha, ïa ka jingjakhlia ka jingleh nuti jong pha, halor ki lum rit ha ka pyntha. Kordit ïa pha, ko Jerusalem! Yn ym pynkhuid ïa pha; ynda la slem katno pat kan long?”