JEREMAÏAH 12 - KA BAIBL

Ka jingud U Jeremaïah

¹ Me long u bahok, A Trai, haba nga ïasaid bad me: la kumta ruh nga kwah ban ïasaid ïa kane ka kam ha me: namar balei ba ka lynti ki bymman ka man bha? Namar balei ba kita kiba ïashetkylla eh ki ïalong baroh kiba shongsuk?

² Me la thung ïa ki, bad ki la suhthied; ki nang san, bad ki sei soh ruh: me long hajan ha ka shyntur jong ki, te me jngai na ki khyllai jong ki.

³ Hynrei me, A Trai, me ithuh ïa nga; me ïohi ïa nga, bad me tynjuh ïa ka dohnud jong nga sha me: to ring shabar ïa ki kum ki langbrot ïa ka jingpynïap, bad to khreh ïa ki ïa ka sngi ka jingpynïap.

⁴ Slem katno ka ri kan ïam, bad ki jhur ka ri baroh kin ïapstai? Namar ka jingbymman jong kita kiba shong ha ka, ïa ki mrad baroh bad ki sim, ki la duh noh; namar ki la ong, “Un ym ïohi ïa ka bakut jong ngi.”

Ka jingphai ktien jong U Blei

⁵ “Lada me la phet bad kiba phet da ki kjat, bad kita ki la pynthait ïa me, kumno te me lah ban ïapyrshang bad ki kulai? Bad la me sngewshngain ha ka ri kaba suk, hynrei, men leh kumno ha ka jingshlei ka Jordan?

⁶ Naba wat ki para jong me, bad ka ïing u kpa jong me, kita hi keiñ ki la ïashetkylla ïa me; kita hi ruh ki la pyrta jam nadien jong me: wat ngeit ïa ki, la ki kren da ki ktien ki babha ïa me.”

⁷ “Nga la iehnoh noh ïa la ka ïing, nga la kyntait ïa la ka ri kynti; nga la ai noh ïa kaba ieit thoiñ ka mynsiem jong nga ha ka kti ki nongshun jong nga.

⁸ Ka ri kynti jong nga ka la kylla long ha nga kum u sing ha khlaw: ka la pynmih ïa la ka ktien pyrshah ïa nga; namar kata, nga la isih ïa ka.

⁹ Hato ka ri kynti jong nga ka long ïa nga kum ka sim bam pyut kaba thoh dak? Ki sim bam pyut ki ïaleh ïa ka baroh sawdong? to khie noh, to lum lang ïa ki mrad khlaw baroh, wallam ïa ki ba kin bam duh.

¹⁰ Bun ki nongsharai ki la pynjot ïa ka bri Waiñ jong nga, ki la ïuh kjat ïa ka bynta jong nga, ki la pynlong khlaw kaba kynjah ïa ka bynta kaba itynnad jong nga.

¹¹ Ki la pynlong ka jingkynjah ïa ka; ka ïam ha nga, ba ka long kynjah: la pynlong kynjah ïa ka ri baroh, namar ym don ba kit khia na ka bynta jong ka.

¹² Ki nonglute ki la wan poi ha ki lum balyngki baroh ka ri khlaw: naba ka waitlam U Trai ka bam duh na kawei ka dong ka ri haduh kawei pat ka dong ka ri: kawei ka doh ruh kam ïoh suk.

¹³ Ki la bet da u Kew, te ki la ot da ki dieng shiah; ki la leh shitom ïa lade, te kim shym myntoi ei ei: te phin sngewlehrain ïa la ki soh, namar ka jingbitar lep ka jong U Trai.”

¹⁴ Kumne u ong U Trai pyrshah ïa ki paramarjan ki basniew jong nga baroh, kiba ktah ïa kata ka ri kynti kaba nga la pynïoh kynti ha ki briew jong nga ki Israel: “Ha khmih, ngan jynrat ïa ki na ka ri jong ki, bad ngan rat noh ïa ka ïing Judah napdeng jong ki.

¹⁵ Te ynda nga la rat noh ïa ki, ngan phai pat bad ngan isynei ïa ki; bad ngan wallam ïa ki pat, uwei uwei sha la ka ri kynti, bad uwei sha la ka ri.

¹⁶ Te lada kin hikai minot ïa ki lynti ki briew jong nga, ïa ka ban smai ha ka kyrteng jong nga, ‘Katba u im U Trai;’ kumjuh kumba ki la hikai ïa ki briew jong nga ban smai da u Baal; kumta yn sa tei ïa ki hapdeng ki briew jong nga.

¹⁷ Hynrei, lada kin ym sngew, kumta te ngan rat noh ïa kata ka jaid bynriew, nga da rat noh, ïa-pynduh artad ruh ïa ka,” ong U Trai.