JEREMAÏAH 11 - KA BAIBL

¹ Kata ka ktien kaba la wan ha u Jeremaïah na U Trai, ka ong,

² “To sngew phi ïa ki ktien jong kane ka jutang, bad to kren ha ki rangbah Judah, bad ha kiba shong ha Jerusalem;

³ bad to ong ha ki, ‘Kumne u ong U Trai, U Blei ki Israel: “To long ba la tim uta u briew u bym sngew ïa ki ktien jong kane ka jutang,

⁴ kaba nga la hukum ïa ki kpa jong phi ha ka sngi kaba nga la wallam noh ïa ki na ka ri Ijipt, na ka lawar ding kaba da u nar,” nga da ong, “To kohnguh ïa ka ktien jong nga, bad to leh ïa ki, kat kum ïa baroh kaba nga hukum ïa phi: kumta phin long ki briew jong nga, bad nga ruh ngan long U Blei jong phi:

⁵ ba ngan ïoh pynskhem ïa kata ka jingsmai kaba nga la smai ha ki kpa jong phi, ban ai ha ki ka ri kaba tuid da ka dud bad ka ngap, kumba ha kane ka sngi.” ’ ” Ynda kumta, nga la ïathuh bad nga la ong, “Amen, ko Trai.”

⁶ Te U Trai u la ong ha nga, “To pynbna ïa kine ki ktien ha ki nongbah Judah, bad ha ki lynti shnong ka Jerusalem, to ong, ‘To pynsngew ïa ki ktien jong kane ka jutang, bad to leh ïa ki.’

⁷ Naba nga la phla jur ha ki kpa jong phi ha ka sngi ba nga la wallam artet ïa ki na ka ri Ijipt, bad haduh kane ka sngi, nga da khie dang step bad nga da phla, nga da ong, ‘To kohnguh ïa ka ktien jong nga.’

⁸ Hynrei, kim shym kohnguh, lymne kim shym pyndem ïa la ka shkor, hynrei, ki la ïaid uwei uwei ha ka jingmutlop ka dohnud jong ki: namar kata, nga la pynwan halor jong ki, ïa ki ktien baroh jong kane ka jutang, kaba nga la hukum ba kin leh, hynrei, kim shym leh.”

⁹ Bad U Trai u la ong ha nga, “Ïa ka jingïashet la shem hapdeng ki rangbah Judah, bad hapdeng kiba shong ha Jerusalem.

¹⁰ Ki la kylla pat ha ki jingleh bymhok ki kpa tymmen jong ki, ki bym treh ban sngew ïa ki ktien jong nga; bad ki la leit bud ïa kiwei pat ki blei ban shakri ïa ki: ka ïing Israel bad ka ïing Judah ki la pynkheiñ ïa ka jutang jong nga kaba nga la ïateh bad ki kpa jong ki.”

¹¹ Namar kata, kumne u ong U Trai, “Ha khmih, ngan wallam ïa ka jingsniew halor jong ki, kaba kin ym lah ban lait na ka; te kin lynñiar ha nga, hynrei, ngan ym sngap ïa ki.

¹² Ynda kumta, ki nongbah Judah bad kiba shong ha Jerusalem kin leit lynñiar ha kita ki blei kiba ki la ainguh da ka jingiwbih ha ki: hynrei, kin ym pynim ïa ki satia ha ka por ka jingjynjar jong ki.

¹³ Naba kat ka jingkheiñ ki shnong jong me, ki long ki blei jong me, ko Judah; bad kat ka jingkheiñ ki lynti shnong ka Jerusalem, phi la pynïeng ki duwan ïa kata kaba lehrain, ki duwan ban thang ka jingiwbih ïa u Baal keiñ.

¹⁴ “Namar kata, wat duwai na ka bynta kine ki briew, lymne wat pynmih ka jinglynñiar lymne ka jingduwai na ka bynta jong ki: namar ngan ym sngap ïa ki ha ka por ba ki lynñiar ha nga namar ka jingjynjar jong ki.

¹⁵ Ka ba-ieit jong nga kan leh aïu ha ka ïing jong nga, haba ka la leh sang bad kiba bun, bad kata ka doh ka bakhuid ka la jah noh na pha? Haba pha la leh sniew, pha la shadkmen.

¹⁶ U Trai u la kyrteng ïa pha, ‘U dieng Olib bajyrngam, ba-itynnad na u soh babha:’ da ka jingsawa ka jingkhihwin bakhraw u la sliew ding halor jong u, bad ïa ki tnat jong u la pynkheiñ.

¹⁷ Naba U Trai ki paid, uba la thung ïa pha, u la pynbna ïa ka basniew ïa pha, namar kata ka jingsniew jong ka ïing Israel bad ka jong ka ïing Judah kaba ki la leh pyrshah ïa lade ha kaba ki la pankwah ïa nga ban bitar, da kaba ainguh da ka jingiwbih ha u Baal.”

¹⁸ Bad U Trai u la pyntip ha nga, te nga la tip ïa ka: ynda kumta, me la pyni ha nga ïa ki jingleh jong ki.

¹⁹ Hynrei, nga la long kum u khun langbrot ba jemnud ba la ïalam sha ka jingpynïap; bad ngam shym tip ba ki la thaw ki buit ïa nga, da kaba ong, “To ngin ïa-pynduh bad dieng bad soh, bad ngin ot noh ïa u na ka ri ki ba-im, ba yn ym kynmaw shuh ïa ka kyrteng jong u.”

²⁰ Hynrei, A Trai ki paid, uba bishar hok, uba tynjuh ïa ki khyllai bad ïa ka dohnud, to ai ngan ïohi ïa ka jingpynhiar kput halor jong ki: naba ha me nga la pynpaw ïa la ka kam.

²¹ Namar kata, kumne u ong U Trai shaphang ki rangbah Anathoth, kiba wad ïa ka jingim jong me, ki ïa-ong, “Wat ïathuhlypa ha ka kyrteng U Trai, ba men ym ïap da ka kti jong ngi:”

²² namar kata, kumne u ong U Trai ki paid, “Ha khmih, ngan pynshitom ïa ki: ki samla kin ïap da ka waitlam; ki khun shynrang bad ki khun kynthei jong ki kin ïap da ka 'nemsniew;

²³ bad yn ym don kiba sah ha ki: naba ngan wallam ïa ka basniew halor ki rangbah Anathoth, ka snem ka jingwan-i ïa ki keiñ.”