JEREMAÏAH 10 - KA BAIBL

Kaba ïanujor ïa U Blei bad ki bleithaw

¹ To sngew phi ïa ka ktien kaba U Trai u kren ha phi, ko ka ïing Israel:

² Kumne u ong U Trai, “Wat hikai ïa ka lynti jong ki jaid bynriew, bad wat khaw-eit ïa ki dak jong ka bneng; naba ki jaid bynriew ki khaw-eit ïa kita.

³ Naba ki rukom ki kynja bynriew ki long ka jingthala: naba u briew u khet ïa u dieng na khlaw, ka kam ki kti u nongtrei da u sdie.

⁴ Ki pyndeng ïa u da ka rupa bad da ka ksiar; ki pynskhem ïa u da ki prek bad da ki tyrnem, ba un ym khih.

⁵ Ki long kum u dieng Tlai, ba la pynshad, te kim kren: ka dei ban bah ïa ki, namar kim lah ban ïaid. Wat sheptieng ïa ki; naba kim lah ban pynsniew, lymne kam long ha ki ban pynbha.”

⁶ Ym don uba kum ma me, A Trai; me long u bakhraw, bad ka kyrteng jong me ka long ka bakhraw ha ka bor.

⁷ Uei u ban ym sheptieng ïa me, ko Syiem ki jaid bynriew? Naba ka ïadei ïa me: namar hapdeng ki riewstad baroh jong ki jaid bynriew bad ha ki jinglong syiem jong ki baroh, kat ma me ym ju don.

⁸ Hynrei, ki ïalong lang ki barunar bad ki babieit: ka jinghikai ki durblei, ka long tang ka met dieng.

⁹ Don ka rupa ba la shoh stang ba la wallam na Tarshish, bad ka ksiar na Uphas, ka kam jong u nongtrei bad ka jong ki kti u bania; ka babyrïong bad ka basaw bthuh ban long ki jaiñ jong ki; baroh ki long ka kam ki nongtrei kiba nang.

¹⁰ Hynrei, U Trai u long U Blei uba shisha; u long U Blei u ba-im, bad u syiem u bajunom: ha ka jingbitar jong u ka khyndew ka khynñiuh, bad ki jaid bynriew kim lah shah ïa ka jingbitar baïaibat jong u.

¹¹ Kumne phin ong ha ki, “Kita ki blei ki bym shym la thaw ïa ki bneng bad ïa ka khyndew, kita kin duh noh na ka khyndew, bad napoh ki bneng.”

¹² U la thaw ma u ïa ka khyndew da la ka bor, u la pynskhem ïa ka pyrthei da la ka jingstad, bad da la ka jingshemphang u la siang ïa ki bneng:

¹³ haba u pynmih ïa la ka ktien, ka jingkhihwin ki um ka don ha ki bneng, bad u pynkyntiew ïa ki jynhaw na ki bakut ka khyndew; u pynlong ki leilieh ïa u slap, bad u pynmih noh ïa ka lyer na ki jingkynshew jong u.

¹⁴ U briew baroh u la kylla bieit khlem ka jingtip; ïa u bania baroh ka durblei jong u ka la pynlehrain ïa u: naba ka durblei ba la saiñ jong u ka long lamler, bad ym don mynsiem ha ki.

¹⁵ Ki long ka jingthala, ka kam ka jingshukor; ha ka por ka jingwan-i jong ki kin duh noh.

¹⁶ Uba ka bynta u Jakob um long kum kine; naba u long u banyngkong na kiei kiei baroh; bad u Israel u long ka jaid ka jingïoh kynti jong u: “U Trai ki paid” long ka kyrteng jong u.

Ka jingkynjah ka Judah

¹⁷ To lum lang ïa la ki mar ki mata na ka ri, ko pha kaba shong ha ka kut.

¹⁸ Naba kumne u ong U Trai, “Ha khmih, ngan shat noh shabar ïa kiba shong ha ka ri kum ha kane ka por, bad ngan pynjynjar ïa ki, khnang ba kin shem ïa ka.”

¹⁹ Kordit ïa nga namar ka jingmynsaw jong nga! ka jingmong jong nga ka jur: hynrei, nga la ong, “Shisha kane ka long ka jingsngewsih jong nga, bad nga dei ban shah ïa ka.”

²⁰ La lute ïa ka ïingjaiñ jong nga, bad la pyndkut ïa ki tyllai jong nga: ki khun jong nga ki la mih noh na nga, te kim don shuh: ym don shuh u ban pynpyiar ïa ka ïingjaiñ jong nga, bad u ban pynïeng ïa ki pyrda jong nga.

²¹ Naba ki nongsharai ki la kylla bieit, bad kim shym ïakylli na U Trai: namar kata, kim shym la man bha, bad la pynsaphred ïa ki kynhun jong ki baroh.

²² Ki jingsawa ka jingbna wer wer, ha khmih ka wan, bad ka jingkhihwin bakhraw na ka ri shatei, ïa ka ban pynlong ka jingkynjah, bad ka jaka shong ki myrsiang, ïa ki nongbah Judah.

²³ A Trai, nga tip ba ka lynti u briew kam long ha u hi: kam long ha u briew uba ïaid ban pynbeit ïa la ki jingjam.

²⁴ A Trai, to sneng ïa nga, hynrei, tang ha ka jingbishar; ym ha ka jingbitar jong me, ïoh men pynlong ei ei ruh em ïa nga.

²⁵ To theh noh ïa la ka jingbitar halor ki Jentil ki bymithuh ïa me, bad halor kita ki ïing ki bymkhot kyrpad ïa ka kyrteng jong me: namar ki la bam ïa u Jakob, shisha keiñ, ki la bam duh ïa u, bad ki la pynlong kynjah ïa ka jaka shong jong u.