JEREMAÏAH 1 - KA BAIBL

Ka jingkhot ïa u Jeremaïah u Nongïathuhlypa

¹ Ki ktien u Jeremaïah u khun u Hilkiah, uba na ki lyngdoh kiba ha Anathoth ha ka ri Benjamin:

² ha u ka ktien U Trai ka la wan ha ki sngi u Josaïah u khun u Amon, u syiem ka Judah, ha ka bakhatlai snem ka jingsynshar jong u.

³ Ka la wan ruh ha ki sngi u Jehoïakim u khun u Josaïah, u syiem ka Judah, haduh ka bakut ka snem ka bakhatwei jong u Sedekaïah u khun u Josaïah, u syiem ka Judah; haduh ba la ring mraw noh ïa ka Jerusalem ha u bnai u basan.

⁴ Te ka ktien U Trai ka la wan ha nga, kaba ong,

⁵ “Haba ngam pat pynlong ïa me ha ka kpoh nga la ithuh ïa me, bad haba mem pat mih na ka kpoh nga la pynkyntang ïa me; nga la thung ïa me ban long u nongïathuhlypa ïa ki jaid bynriew.”

⁶ Nga te nga la ong, “A Trai U Blei! Ha khmih, ngam nang kren: naba nga dang khynnah.”

⁷ Hynrei, U Trai u la ong ïa nga, “Wat ong, ‘Nga dang khynnah:’ naba ha kino kino kiba ngan phah ïa me men leit keiñ, bad ïa kaei kaei kaba ngan hukum ïa me men kren keiñ.

⁸ Wat sheptieng na ka bynta jong ki: naba nga long lem bad me ïa ka ban pyllait ïa me,” ong U Trai.

⁹ Ynda kumta, U Trai u la sei ïa la ka kti, bad u la ktah ïa ka shyntur jong nga; bad U Trai u la ong ha nga, “Ha khmih, nga la buh ïa ki ktien jong nga ha ka shyntur jong me:

¹⁰ ha khmih, ha kane ka sngi nga la thung ïa me halor ki jaid bynriew bad halor ki hima, ïa ka ban rat noh bad ban pyntwa, ïa ka ban pynduh ruh bad ban pynkyllon; ïa ka ban tei, bad ïa ka ban thung.”

¹¹ Ka ktien U Trai ka la wan ruh ha nga, kaba ong, “Ko Jeremaïah, me ïohi aïu?” Nga te nga la ong, “Nga ïohi u diengduh uba da u dieng soh Khyllam.”

¹² U Trai te u la ong ha nga, “Me la ïohi bha eh: naba nga ap ïa la ka ktien ban pyndep ïa ka.”

¹³ Te ka ktien U Trai ka la wan ha nga sa shi sien pat, kaba ong, “Me ïohi aïu?” Nga te nga la ong, “Nga ïohi u khiew uba dang thnam; bad ka khmat jong u ka long na shatei.”

¹⁴ Ynda kumta, U Trai u la ong ha nga, “Ka jingsniew na shatei kan wan shlei halor baroh kiba shong ha ka ri.

¹⁵ Naba ha khmih, ngan khot ïa ki jaid baroh ki hima kiba na shatei,” ong U Trai; “bad kin ïawan, bad kin ïabuh mar la ka jong ka khet hamar ba rung sha ki khyrdop ka Jerusalem, bad pyrshah ïa ki kynroh jong ka baroh sawdong, bad pyrshah ïa ki shnong ka Judah baroh.

¹⁶ Bad ngan kren ïa ki jingbishar jong nga pyrshah ïa ki, shaphang ka jingbymman jong ki baroh, ha kaba ki la lyndet ïa nga, bad ki la thang ïa ka jingiwbih ha kiwei pat ki blei, bad ki la mane ïa ki kam ki kti jong ki hi.

¹⁷ Ma me, namar kata, to panpoh ïa la ka syngkai, bad to ïeng, bad kren ruh ha ki ïa kaba nga hukum ïa me baroh: wat khaw-eit ïa ki, ïoh ngan pynkhaw-eit ïa me ha khmat jong ki.

¹⁸ Namar ha khmih, ha kane ka sngi nga la pynlong ïa me ka shnong ba la ker kut, bad u païa nar, bad ki kynroh rnong, pyrshah ïa ka ri baroh, pyrshah ïa ki syiem ka Judah, pyrshah ïa ki rangbah jong ka, pyrshah ïa ki lyngdoh jong ka, bad pyrshah ïa ki briew jong ka ri.

¹⁹ Ki te kin ïaleh pyrshah ïa me; hynrei, kin ym lah ïa me: naba nga long ryngkat bad me, ïa ka ban pyllait ïa me,” ong U Trai.