JENESIS 5 - KA BAIBL

Kiba hiar pateng na u Adam

¹ Kane ka long ka kitab shaphang ki jinghiar pateng jong u Adam. Ha kata ka sngi ba U Blei u la thaw ïa u briew, ha ka jingsyriem U Blei u la thaw ïa u.

² Shynrang bad kynthei u la thaw ïa ki; bad u la kyrkhu ïa ki, bad u la khot kyrteng “Adam” ïa ki, ha kata ka sngi mynba la thaw ïa ki.

³ Bad u Adam u la im shispah laiphew snem, bad u la pynkha ïa u khun ha ka jingsyriem jong u bad ha ka dur jong u hi; bad u la khot kyrteng “u Seth” ïa u.

⁴ Bad ki sngi jong u Adam hadien ba u la pynkha ïa u Seth ki la long phraspah snem; bad u la pynkha ïa ki khun shynrang bad ïa ki khun kynthei.

⁵ Bad ki sngi jong u Adam baroh ba u la im ki la long khyndaispah bad laiphew snem: hadien kata, u la ïap.

⁶ U Seth ruh u la im shispah bad san snem, bad u la pynkha ïa u Enosh.

⁷ Bad u Seth u la im hadien ba u la pynkha ïa u Enosh phraspah bad hynñiew snem, bad u la pynkha ïa ki khun shynrang bad ïa ki khun kynthei.

⁸ Bad ki sngi baroh jong u Seth ki la long khyndaispah bad khat-ar snem: hadien te u la ïap.

⁹ U Enosh ruh u la im khyndaiphew snem, bad u la pynkha ïa u Kenan.

¹⁰ Bad u Enosh u la im ynda u la pynkha ïa u Kenan phraspah bad khatsan snem, bad u la pynkha ïa ki khun shynrang bad ïa ki khun kynthei.

¹¹ Te ki sngi baroh jong u Enosh ki la long khyndaispah bad san snem: hadien kata, u la ïap.

¹² U Kenan ruh u la im hynñiewphew snem, bad u la pynkha ïa u Mahalalil.

¹³ Bad u Kenan u la im ynda u la pynkha ïa u Mahalalil phraspah bad sawphew snem, bad u la pynkha ïa ki khun shynrang bad ïa ki khun kynthei.

¹⁴ Te ki sngi baroh jong u Kenan ki la long khyndaispah bad shiphew snem: hadien kata, u la ïap.

¹⁵ U Mahalalil u la im hynriewphew san snem, bad u la pynkha ïa u Jared.

¹⁶ Bad u Mahalalil u la im ynda u la pynkha ïa u Jared phraspah bad laiphew snem, bad u la pynkha ïa ki khun shynrang bad ïa ki khun kynthei.

¹⁷ Te ki sngi baroh jong u Mahalalil ki la long phraspah bad khyndaiphew san snem: hadien kata, u la ïap.

¹⁸ U Jared ruh u la im shispah bad hynriewphew ar snem, bad u la pynkha ïa u Enokh.

¹⁹ Bad u Jared u la im ynda u la pynkha ïa u Enokh phraspah snem, bad u la pynkha ïa ki khun shynrang bad ïa ki khun kynthei.

²⁰ Te ki sngi baroh jong u Jared ki la long khyndaispah bad hynriewphew ar snem; hadien kata, u la ïap.

²¹ U Enokh ruh u la im hynriewphew san snem, bad u la pynkha ïa u Methuselah.

²² Bad u Enokh u la ïaid lem bad U Blei hadien ba u la pynkha ïa u Methuselah laispah snem, bad u la pynkha ïa ki khun shynrang bad ïa ki khun kynthei.

²³ Te ki sngi baroh jong u Enokh ki la long laispah bad hynriewphew san snem.

²⁴ Bad u Enokh u la ïaid lem bad U Blei: bad um shym la don shuh; naba U Blei u la shim noh ïa u.

²⁵ U Methuselah ruh u la im shispah bad phraphew hynñiew snem, bad u la pynkha ïa u Lamekh.

²⁶ Bad u Methuselah u la im ynda u la pynkha ïa u Lamekh hynñiewspah bad phraphew ar snem, bad u la pynkha ïa ki khun shynrang bad ïa ki khun kynthei.

²⁷ Te ki sngi baroh jong u Methuselah ki la long khyndaispah bad hynriewphew khyndai snem: hadien kata, u la ïap.

²⁸ U Lamekh ruh u la im shispah bad phraphew ar snem, bad u la pynkha ïa u khun,

²⁹ bad u la khot kyrteng “u Noah” ïa u, u da ong, “Une un pyntngen ïa ngi ha ka kam jong ngi bad ha ka jingtrei minot ki kti jong ngi, namar kata ka khyndew ïa kaba U Trai u la tim.”

³⁰ Bad u Lamekh u la im ynda u la pynkha ïa u Noah sanspah bad khyndaiphew san snem, bad u la pynkha ïa ki khun shynrang bad ïa ki khun kynthei.

³¹ Te ki sngi baroh jong u Lamekh ki la long hynñiewspah bad hynñiewphew hynñiew snem: hadien kata, u la ïap.

³² Bad u Noah u la long sanspah snem ka rta: bad u Noah u la pynkha ïa u Shem, ïa u Ham, bad ïa u Japhet.