JENESIS 41 - KA BAIBL

U Joseph u batai ïa ka jingphohsniew u Pharaoh

¹ Ka la jia te ynda la dap ar snem, ba u Pharaoh u la phohsniew: bad ha khmih, u da ïeng harud ka wah.

² Bad ha khmih, la mih na kata ka wah hynñiew ki masi kynthei kiba ibha bad basngaid; bad ki la bam phlang ha ka 'dew'lang ni.

³ Bad ha khmih, hynñiew kiwei pat ki masi kynthei ki la ïawan kiew hadien jong ki na kata ka wah, kiba isih ban khmih bad ki baraikhoh; bad ki la ïaïeng hajan ïa kita kiwei ki masi harud kata ka wah.

⁴ Bad kita ki masi kynthei kiba isih bad ki baraikhoh ki la bam ïa kita ki masi kynthei kiba ibha bad basngaid. Ynda kumta, u Pharaoh u la kyndit thiah.

⁵ Bad u la thiah biang bad u la phohsniew pat sa shi wat: bad ha khmih, hynñiew tylli ki rynjup soh Kew ki mih na uwei u jyntang, kiba la met bad ki babha.

⁶ Bad ha khmih, sa hynñiew tylli ki rynjup soh Kew ki baswai bad kiba la thangïong da ka lyer mihngi, kiba mih shluiñ hadien jong ki.

⁷ Bad kita ki rynjup soh Kew ki baswai ki la nguid noh ïa kita ki hynñiew tylli ki soh Kew kiba la met bad ki babha. Te u Pharaoh u la kyndit thiah, bad ha khmih, ka la long ka jingphohsniew.

⁸ Te mynstep ka la jia ba ka mynsiem jong u ka la khih khuslai; bad u la phah khot ïa ki kynja nongkren byrtong baroh ka ri Ijipt, bad ïa ki riewstad baroh jong ka: bad u Pharaoh u la ïathuh ha ki la ki jingphohsniew; hynrei, ym don ba lah ban batai ïa ki ha u Pharaoh.

⁹ Ynda kumta, uta u rangbah ki nongrah khuri u la kren ha u Pharaoh, u da ong, “Mynta shisha nga kynmaw ïa la ki jingleh duna.

¹⁰ U Pharaoh u la bitar ïa la ki shakri bad u la set ïa nga ha ka ïing byndi, ha ïing u rangbah ki nongphasi, ïa nga keiñ bad ïa u rangbah ki nongshet kpu,

¹¹ ngi la ïaphohsniew ïa ka jingphohsniew ruh ha kajuh ka miet: ma nga bad ma u; ngi la ïaphohsniew uwei uwei ruh kat kumba shong ka jingbatai la ka jong ka jong ka jingphohsniew.

¹² Te la don hangta ryngkat bad ngi u samla, u kynja Hebru, u shakri jong u rangbah ki nongphasi; bad ngi la ïathuh ha u, u ruh u la batai ïa ngi ïa ki jingphohsniew jong ngi; ïa uwei uwei ruh kat kumba la long la ka jingphohsniew u la batai ma u keiñ.

¹³ Ka la jia ruh, ba kumba u la batai ïa ngi, kumta hi ka la long; ïa nga la kyntiew pat sha la ka kam, bad ïa uta uwei la sdien.”

¹⁴ U Pharaoh, namar kata, u la phah khot ïa u Joseph, ki te ki la ïaphet ban wallam ïa u na kata ka ïing byndi; bad u ruh u la khi ïa lade, bad u la pli ïa la ki jaiñkup bad u la wan sha u Pharaoh.

¹⁵ Bad u Pharaoh u la ong ha u Joseph, “Nga la phohsniew ïa ka jingphohsniew, bad ym don ba lah ban batai ïa ka; te nga la bna shaphang jong me, ba me lah ban sngap ïa ka jingphohsniew ïa ka ban batai ïa ka.”

¹⁶ Bad u Joseph u la ïathuh ha u Pharaoh, “Ym ma nga: hynrei, U Blei un ai jubab shaphang ka jingsuk jong u Pharaoh.”

¹⁷ Te u Pharaoh u la ong ha u Joseph, “Ha khmih, ha ka jingphohsniew jong nga, nga la ïeng harud kata ka wah:

¹⁸ bad ha khmih, ki ïamih na kata ka wah hynñiew ki masi kynthei, ki basngaid, bad ba-ibha; bad ha ka 'dew'lang ni ki ïabam phlang:

¹⁹ bad ha khmih ruh, hynñiew kiwei pat ki masi kynthei ki ïawan kiew nadien jong ki, ki baswai bad ki basniew eh ban khmih bad ki baraikhoh ruh de: ki basniew kat kine ngam shym la ïohi mynno mynno ruh em ha ka ri Ijipt baroh kawei.

²⁰ Te kita ki masi kynthei ki baraikhoh bad basniew, ki la bam ïa kita ki hynñiew ki masi kynthei ki basngaid kiba la kiew shuwa:

²¹ bad la ki la lah nguid sha ka kpoh jong ki, ym shym lah ithuh ba ki la leit sha ka kpoh jong ki; hynrei, haba khmih ïa ki, ki la sniew kumba mynshuwa. Ynda kumta, nga la kyndit thiah.

²² Nga la ïohi ruh ha ka jingphohsniew jong nga, bad ha khmih, hynñiew tylli ki rynjup soh Kew ba la met bad babha, ki mih shluiñ ha uwei u jyntang:

²³ bad ha khmih, sa hynñiew tylli ki rynjup soh Kew ba la tyrkhong bad ki ba-iswai, bad ba la thangïong da ka lyer mihngi, ki la mih shluiñ hadien jong ki.

²⁴ Bad kita ki rynjup soh Kew ki baswai ki la nguid noh ïa kita ki hynñiew tylli ki rynjup soh Kew ki babha: bad ïa kane nga la ïathuh ha ki nongkren shwar; hynrei, ym don ba lah ban batai ïa ka ha nga.”

²⁵ Ynda kumta, u Joseph u la ïathuh ha u Pharaoh, “Ka jingphohsniew u Pharaoh ka long kawei; ïa kaba U Blei un sa leh, ïa kata keiñ u la ïathuh ha u Pharaoh.

²⁶ Kita ki hynñiew ki masi kynthei basngaid ki long hynñiew snem bad kita ki hynñiew tylli ki rynjup soh Kew ruh ki long hynñiew snem: ka jingphohsniew ka long kawei keiñ.

²⁷ Pat kita ki hynñiew ki masi kynthei ki baraikhoh bad basniew ruh, kiba la ïawan kiew hadien jong ki, ki long hynñiew snem; bad kita ki hynñiew tylli ki rynjup soh Kew kiba khlem met ba la thangïong da ka lyer mihngi, kin long hynñiew snem ka 'nemsniew keiñ.”

²⁸ “Kane ka long kata ka ktien ïa kaba nga la ong ha u Pharaoh: ‘Ïa kaba U Blei un sa leh, ïa kata keiñ u la pyni ha u Pharaoh.

²⁹ Ha khmih, ki hynñiew snem kin wan bad kaba dap kyrhai lyngba ka ri Ijipt baroh kawei.

³⁰ Hynrei, hadien jong ki, kin mih ki hynñiew snem da ka 'nemsniew; kumta, yn sa klet noh ïa kata ka jingdap kyrhai baroh lyngba ka ri Ijipt; bad kata ka 'nemsniew kan pynjot noh ïa ka ri;

³¹ bad yn ym ithuh shuh ïa kata ka jingdap kyrhai ha ka ri namar kata ka 'nemsniew ban sa jia hadien; naba kan long kaba jur eh.

³² Pat shaphang kaba pynlong ar kyntien ïa kata ka jingphohsniew ïa u Pharaoh; ka long kumta ïa ka ban pynskhem ïa kata ka jinglong da U Blei, bad namar ba U Blei un sa pynkloi ban leh ïa kata.

³³ Mynta te, to ai ba u Pharaoh un wad da u briew u bashemphang bad u bastad, bad to ai ba un buh ïa u halor ka ri Ijipt.

³⁴ To ai ba u Pharaoh un leh ïa kane bad to ai ba un buh da ki nongkhmih halor ka ri, bad to ai ba un shim ïa kaba san bynta na ki jingmih jong ka ri Ijipt hapdeng kita ki hynñiew snem kiba dap kyrhai.

³⁵ Bad to ai kin ïalum ïa ka jingbam baroh hapdeng kita ki hynñiew snem ki babha ki ban sa wan, bad kin kynshew ïa u Kew hapoh ka kti jong u Pharaoh, ïa ka ban sumar biang ïa ka jingbam ha ki nongbah.

³⁶ Kumta, kata ka jingbam kan long ka jingkynshew lypa ïa ka ri ha kita ki hynñiew snem jong ka 'nemsniew ka ban jia ha ka ri Ijipt; ba yn ym pynjot noh ïa ka ri da kata ka 'nemsniew.’ ”

La thung nongsynshar ïa u Joseph ha ka ri Ijipt

³⁷ Bad kane ka ktien ka bha ha khmat u Pharaoh, bad ha khmat ki shakri jong u baroh.

³⁸ Te u Pharaoh u la ong ha la ki shakri, “Ngi lah ban shem ïa u briew kat une, uba shong U Mynsiem U Blei ha u?”

³⁹ U Pharaoh u la ong ruh ha u Joseph, “Naba U Blei u la pyni ha me ïa kane baroh, ym don shuh u bashemphang bad u bastad kum ma me:

⁴⁰ ma me, men long halor ka ïing jong nga, bad da ka ktien jong me yn synshar ïa ki briew jong nga baroh: hynrei, tang ha ka khet syiem ma nga ngan long uba kham khraw halor jong me.”

⁴¹ Ynda kumta, u Pharaoh u la ong ha u Joseph, “To khmih, nga la buh ïa me halor ka ri Ijipt baroh kawei.”

⁴² Bad u Pharaoh u la law noh ïa ka sa'ti na la ka kti, bad u la buh ïa ka ha ka kti u Joseph, bad u la pynkup ïa u da ki jaiñ 'sai ryndia bani, bad u la buh ïa u kynjri ksiar ha ka ryndang jong u;

⁴³ bad u la pynshong ïa u ha ka kali ka ba-ar ka jong u; bad ki la ïapyrta noh ha shuwa jong u, “To dem ka khohsiew”: kumta, u la buh ïa u halor ka ri Ijipt baroh kawei.

⁴⁴ U Pharaoh u la ong ruh ha u Joseph, “Ma nga, u Pharaoh, bad khlem ma me ym don uwei u briew ruh ban rah ïa la ka kti lane ïa la ka sla'jat ha ka ri Ijipt baroh kawei.”

⁴⁵ Bad u Pharaoh u la khot kyrteng “u Saphnath-Paaneah” ïa u Joseph; bad u la ai ha u ïa ka Asenath ka khun u Potipherah, u lyngdoh ka shnong On, ban long ka tnga jong u. Ynda kumta, u Joseph u la leit noh lyngba ka ri Ijipt.

⁴⁶ Bad u Joseph u la laiphew snem ka rta mynba u la ïeng ha khmat u Pharaoh u syiem ka ri Ijipt. Bad u Joseph u la mih noh na khmat u Pharaoh, bad u la ïaid kylleng ïa ka ri Ijipt baroh kawei.

⁴⁷ Bad ka khyndew ka la sei soh kyrhai eh shi kham shi kham hapdeng kita ki hynñiew snem ba-dap kyrhai.

⁴⁸ U te u la ïalum lang ïa ki jingbam baroh ha kita ki hynñiew snem, kiba la long ha ka ri Ijipt, bad u la buh kynshew ïa ka jingbam ha ki nongbah: ïa ka jingbam ka lyngkha keiñ, kaba long sawdong ha la ka nongbah hi, u la kynshew ha kajuh.

⁴⁹ Kumta, u Joseph u la ïalum lang ïa u Kew shikatdei eh, kat u shyiap ka duriaw, tad ynda u la iehnoh ban ñiew; naba ym lah ñiew shuh.

⁵⁰ Hynrei, mynshuwa ba ki la jia kita ki snem jong ka 'nemsniew la kha ïa u Joseph ar ngut ki khun shynrang, ïa kiba ka Asenath ka khun u Potipherah u lyngdoh ka shnong On ka la kha ïa u.

⁵¹ Bad u Joseph u la khot kyrteng “u Manasseh” ïa uba la kha nyngkong: “Naba U Blei u la pynklet ïa nga ïa ka jingleh shitom jong nga baroh, bad ïa ka ïing u kpa jong nga baroh.”

⁵² Bad ïa u ba-ar u la khot kyrteng “ ‘u Ephraim’: “Naba U Blei u la pynman ïa nga ha ka ri ba la ban shitom ïa nga.”

⁵³ Ynda kumta, la wai noh kita ki hynñiew snem ka jingdap kyrhai, ba la long ha ka ri Ijipt.

⁵⁴ Bad kita ki hynñiew snem jong ka 'nemsniew ki la sdang ban mih, kat kumba u Joseph u la lah ïathuh: bad kata ka 'nemsniew ka la long ha ki ri baroh; hynrei, la don ka jingbam ha ka ri Ijipt baroh.

⁵⁵ Bad haba ka ri Ijipt baroh kawei ka la shah 'nemsniew, ki paidlang ki la ïakyang ha u Pharaoh ban ïoh kpu; bad u Pharaoh u la ong ha ki Ijipt baroh, “To khie leit sha u Joseph; to leh katba u ong ha phi.”

⁵⁶ Bad ka 'nemsniew ka la kem ïa kata ka ri baroh kawei: ynda kumta, u Joseph u la plie ïa kita ki ïing jingkynshew baroh, bad u la die ha ki Ijipt; naba kata ka 'nemsniew ka la jur eh ha ka ri Ijipt.

⁵⁷ Bad ki ri baroh ki la ïawan sha ka ri Ijipt ha u Joseph ïa ka ban thied Kew; naba ka 'nemsniew ka la jur eh ha ki ri baroh.