JENESIS 3 - KA BAIBL

Ka jinghap jong u briew

¹ Te uta u bseiñ u la long uba kham sian ïa ki mrad baroh ka ryngkew ïa kiba U Trai uba U Blei u la lah thaw. Bad u la ong ha kata ka briew, “Shisha ka long kumta, ba U Blei u la ong, ‘Phin ym ïoh bam na u dieng baroh ha ka kper?’ ”

² Bad kata ka briew ka la ong ha uta u bseiñ, “Na u soh ki dieng ha ka kper ngi ïoh ban bam:

³ hynrei, na u soh jong uta u dieng uba hapdeng ka kper, U Blei u la ong, ‘Phin ym ïoh bam na u, lymne ktah ïa u, ba ïoh phin ïap noh.’ ”

⁴ Te uta u bseiñ u la ong ha kata ka briew, “Phin ym ïap noh shisha:

⁵ Namar U Blei u tip, ba ha kata ka sngi ba phin bam na u, un sa pynpeit ïa ki khmat jong phi, bad ba phin long kum ki blei, kiba tip ïa ka babha bad ïa ka basniew.”

⁶ Te haba kata ka briew ka la ïohi ba uta u dieng u la long u babha ban bam, bad uba itynnad ïa ki khmat, bad u dieng uba bit ïa ka ban pynstad, ka la shim na u soh jong u, bad ka la bam ruh, bad ka la ai lem ruh de ha la u tnga; u ruh u la bam.

⁷ Hadien kata, la pynpeit ïa ki khmat jong ki baroh ar ngut bad ki la tip ba ki la long kiba lyngkhuit; bad ki la ïasuh lang ïa ki sla u dieng Dumbur, bad ki la ïathaw ïa lade ïa ki jingpanpoh.

⁸ Te ki la ïohsngew ïa ka jingsawa U Trai uba U Blei ba u da wan ïaid ha ka kper ha ka jingpyngngad ka sngi: te u Adam bad ka tnga jong u ki la ïabuhrieh ïa lade na khmat U Trai uba U Blei hapdeng ki dieng jong kata ka kper.

⁹ Te U Trai uba U Blei u la khot ïa u Adam, bad u da ong ha u, “Me don shaei?”

¹⁰ U te u la ong, “Nga la ïohsngew ïa ka jingsawa jong me ha ka kper, nga te nga la sheptieng, naba nga la lyngkhuit; bad nga la buhrieh ïa lade.”

¹¹ Bad U Blei u la ong, “Uei ba la ïathuh ha me ba me la lyngkhuit? Shisha me la bam na uta u dieng ïa uba nga la adong ïa me ban ym bam na u?”

¹² Te u Adam u la ïathuh, “Kata ka briew ïa kaba me la buh lok bad nga, ka long ma ka keiñ kaba la ai ha nga na uta u dieng, bad nga la kum bam.”

¹³ Te U Trai uba U Blei u la ong ha kata ka briew, “Kaei kane ïa kaba pha la leh?” Te kata ka briew ka la ïathuh, “Uta u bseiñ u la shukor ïa nga; nga ruh nga la kum bam.”

¹⁴ Hadien kata, U Trai U Blei u la ong ha uta u bseiñ, “Namar ba me la leh ïa kane, la tim ïa me nalor ki kynja jingri baroh, bad nalor ki kynja mrad ka ryngkew baroh; da ka kpoh jong me men par, bad ïa ka 'dewmet men bam baroh ki sngi ka rta jong me.

¹⁵ Bad ïa ka jingshun ruh ngan buh hapdeng jong me bad kata ka briew, bad hapdeng u symbai jong me bad u symbai jong ka; u symbai jong ka un pynlwet ïa ka khlieh jong me, bad me men pynlwet ïa ka khongdong'jat jong u.”

¹⁶ Bad ha kata ka briew u la ong, “Da kaba pynroi ngan pynroi ïa ki jingpang jong pha, bad ïa ka jingseng khun jong pha; ha ka jingshitom phan kha ki khun; bad ka jingkwah jong pha kan long sha u tnga jong pha, bad u un synshar halor jong pha.”

¹⁷ Bad ha u Adam u la ong, “Namar ba me la shahshkor ïa ka ktien ka tnga jong me, bad ba me la bam na uta u dieng, ïa uba nga la adong ïa me, da kaba ong, ‘Men ym bam na u:’ ïa ka khyndew la tim na ka bynta jong me; da ka jingshitom men bam na ka baroh ki sngi ka rta jong me;

¹⁸ kan pynmih shylluit ruh ïa ki shiah bad ïa ki shiah keng ïa me; bad men bam ïa u jhur ka lyngkha.

¹⁹ Da ka jingsyep ka khmat jong me men bam ïa la u kpu, haduh ban da men phai dien pat sha ka khyndew; namar na ka la shim ïa me: naba ka 'dewmet me long, bad sha ka 'dewmet men leit phai pat.”

²⁰ Te u Adam u la khot kyrteng ïa la ka tnga, “Ka Im”; naba la long ma ka, ka kmie jong ki ba-im baroh.

²¹ Ïa u Adam ruh bad ïa ka tnga jong u, U Trai uba U Blei u la thaw ïa ki jingkup snieh, bad u la pynkup ruh ïa ki.

²² U Trai uba U Blei u la ong ruh, “Ha khmih, uta u briew u la wan long kum uwei na ngi hi, kat ban tip ïa ka babha bad ïa ka basniew: te mynta, ba ïoh un kner ïa la ka kti, bad shim ruh na u dieng ka jingim, bad bam, bad im junom ruh de:”

²³ namar kata, U Trai uba U Blei u la beh noh ïa u na ka kper Eden, ïa ka ban rep ïa ka khyndew na kaba la shim ïa u.

²⁴ Kumta keiñ u la beh noh ïa uta u briew; bad u la buh ïa ki Kherub shaphang mihngi ka kper Eden, bad ïa kaba kum ka waitlam baphyrnai, kaba da khih talain baroh sawdong, ïa ka ban sumar ïa ka lynti sha uta u dieng ka jingim.