JENESIS 20 - KA BAIBL

U Abraham bad u Abimelekh

¹ Bad u Abraham u la leit noh nangta sha ka ri shathie, bad u la shong sah hapdeng Kadesh bad Shur, bad u la shong basa ha Gerar.

² Bad u Abraham u la ong shaphang ka Sara ka tnga jong u, “Ka long ka para jong nga”: te u Abimelekh u syiem ka Gerar u la phah, bad u la shim noh ïa ka Sara.

³ Ynda kumta, U Blei u la wan ha u Abimelekh ha ka jingphohsniew mynmiet, bad u la ong ha u, “Ha khmih, men sa ïap namar kata ka briew ïa kaba me la shim; naba ka long ka tnga briew.”

⁴ Hynrei, u Abimelekh um pat shym leit hajan ïa ka: u la ïathuh te, “Ko Trai, hato men pynïap noh ruh ïa ka jaid bynriew ka bahok?

⁵ Hato um shym la ïathuh ma u hi ha nga, ‘Ka long ka para jong nga’ bad ma ka hi ruh ka la ong, ‘U long u hynmen jong nga’; te ha ka jingsngewsngur ka dohnud jong nga bad ha ka jingkhuid ki kti jong nga, nga la leh ïa kane keiñ.”

⁶ Ynda kumta, U Blei u la ong ha u ha ka jingphohsniew, “Shisha, nga ruh nga tip ba ha ka jingsngewsngur ka dohnud jong me, me la leh ïa kane; te nga ruh nga la khang noh ïa me na ka ban leh pop pyrshah ïa nga: namar kata, ngam shym la shah ïa me ban ktah ïa ka.

⁷ Mynta te to da ai noh pat ïa ka tnga uta u briew; naba u long u nongïathuhlypa, bad un ïoh duwai na ka bynta jong me, bad me men ïoh im: hynrei, lada mem da ai noh pat ïa ka, to tip me ba shisha men ïap noh, ma me bad baroh kat kiba dei ki jong me.”

⁸ Te u Abimelekh u la khie la dang step eh, bad u la khot lang ïa la ki shakri baroh, bad u la ïathuh ha ki shkor jong ki, ïa kine kiei kiei ruh baroh: te kita ki briew ki la ïasheptieng shikatdei eh.

⁹ U Abimelekh u la khot ruh ïa u Abraham, bad u la ong ha u, “Hato kaei kane ba me la leh ïa nga? bad nga la leh pop aïu pyrshah ïa me, ba me la wallam ïa ka pop kaba khraw katta halor jong nga bad halor ka hima jong nga? me la leh ïa nga ïa ki jingleh ïa ki bymdei ban leh.”

¹⁰ U Abimelekh u la kylli ruh ha u Abraham, “Hato me la ïohi aïu, haba me la leh ïa kane?”

¹¹ Te u Abraham u la ïathuh, “Naba nga la ong ha lade, ‘Shisha ym don ka jingsheptieng burom ïa U Blei ha kane ka jaka; ki te kin pynïap noh ïa nga namar ka tnga jong nga.’

¹² Bad ka long ka para jong nga shisha; ka long keiñ ka khun u kpa jong nga, hynrei, kam long ka khun ka kmie jong nga; bad ka long ka tnga jong nga artad.

¹³ Ka la jia ruh, mynba U Blei u la pynïaid wir ïa nga na ïing u kpa jong nga, ba nga la ong ha ka, ‘Kane ka jingleh ieit jong pha ïa kaba phan leh ïa nga; ha ka jaka baroh katba kan jia ha ngi ban poi, to ong shaphang jong nga, u long u hynmen jong nga.’ ”

¹⁴ Ynda kumta, u Abimelekh u la shim ïa ki langbrot, bad ïa ki masi, bad ïa ki shakri shynrang, bad ïa ki shakri kynthei, bad u la ai ruh ïa ki ha u Abraham, bad ïa ka Sara ruh ka tnga jong u, u la ai noh pat ha u.

¹⁵ Bad u Abimelekh u la ong, “Ha khmih, ka ri jong nga ha khmat jong me: to da shong sah kat shaba me ibit.”

¹⁶ Bad ha ka Sara u la ong, “Ha khmih, nga la ai ha u hynmen jong pha shi hajar rupa: ha khmih, kata kan long ka mynrain kum ka jingkah ïa ki khmat jong pha, ha kiba don bad pha baroh, bad shaphang kiei kiei baroh la pynbeit ïa pha.”

¹⁷ Ynda kumta, u Abraham u la duwai ha U Blei: bad U Blei u la pynkhiah ïa u Abimelekh bad ïa ka tnga jong u, bad ïa ki shakri kynthei jong u; te ki la kha khun ruh de.

¹⁸ Naba U Trai u la lah set khop ïa ki kpoh ki kynthei baroh ha ïing u Abimelekh, na ka bynta ka Sara ka tnga u Abraham.