JENESIS 2 - KA BAIBL

¹ Kumta la pyndep noh ïa ki bneng bad ïa ka pyrthei, bad ïa ki kynhun bah baroh jong ki.

² Te ha ka bahynñiew ka sngi, U Blei u la pyndep noh ïa la ka kam ïa kaba u la lah pynlong; bad ha ka bahynñiew ka sngi u la shong sngi na ka kam jong u baroh ïa kaba u la lah pynlong.

³ Bad U Blei u la kyrkhu ïa kata ka bahynñiew ka sngi, bad u la kyntang khuid ïa ka: naba ha kane ka sngi u la shong sngi na ka kam jong u baroh ïa kaba U Blei u la lah pynlong bad thaw.

⁴ Kane ka long ka jingïathuhkhana shaphang ki bneng bad ka pyrthei, mynba la pynlong ïa ki ha kata ka sngi ba U Trai uba U Blei u la thaw ïa ka pyrthei bad ïa ki bneng,

⁵ bad ïa ki jingthung baroh jong ka lyngkha mynba kim pat la long ha ka khyndew, bad ïa u jhur baroh jong ka lyngkha mynba um pat la mih speh: naba U Trai uba U Blei um pat shym la pynhiar ïa u slap halor ka khyndew, bad haba u briew ruh um pat la don ïa ka ban rep ïa ka khyndew.

⁶ Te u lyoh u la mih na ka khyndew, bad u la ai um halor ka khmat ka khyndew baroh.

⁷ Bad U Trai uba U Blei u la thaw ïa u briew na ka 'dewmet ka khyndew, bad u la pyrsad ha ki thliew khmut jong u ïa ka jingpyrsad ka jingim; bad uta u briew u la long ka mynsiem ba-im.

Ka kper Eden

⁸ U Trai uba U Blei ruh u la thung ïa ka kper ha ka Eden shaphang mihngi; bad u la buh hangta ïa uta u briew ïa uba u la lah thaw.

⁹ Bad U Trai uba U Blei u la pynlong ba kin mih na kata ka khyndew ki dieng baroh kiba itynnad ban khmih, bad kiba bit eh ïa ka ban bam; bad hapdeng kata ka kper ïa u dieng ka jingim, bad ïa u dieng ka jingtip ïa ka babha bad ïa ka basniew.

¹⁰ Ka wah ruh ka la mih noh na Eden ïa ka ban ai um ïa kata ka kper; bad nangta ka la khlad, bad ka la long saw tnat.

¹¹ Ka kyrteng jong ka banyngkong ka long “Ka Pison”: kata kaba tuid sawdong ïa ka ri Habilah baroh kawei, ha kaba don ka ksiar;

¹² bad ka ksiar jong kata ka ri ka long ka babha: hangta ruh don u Bdellium bad u mawlynnai Oniks.

¹³ Bad ka kyrteng ka wah ka ba-ar ka long “Ka Gihon”: kata kaba tuid sawdong ïa ka ri Kush baroh kawei.

¹⁴ Bad ka kyrteng ka wah ka balai ka long “Ka Hidekel”: kata kaba tuid shaphang mihngi ïa ka ri Assyria. Bad ka wah ka basaw ka long “Ka Ïuphratis”.

¹⁵ Bad U Trai uba U Blei u la shim ïa uta u briew, bad u la buh ïa u ha ka kper Eden ïa ka ban trei bad ban sumar ïa ka.

¹⁶ Bad U Trai uba U Blei u la hukum ïa uta u briew, u da ong, “Na u dieng baroh ha ka kper, da kaba bam me lah ban bam ei:

¹⁷ hynrei, na u dieng ka jingtip ïa ka babha bad ïa ka basniew men ym ïoh bam na u: naba ha kata ka sngi ba men bam na u, da kaba ïap men ïap shisha.”

¹⁸ Bad U Trai uba U Blei u la ong ruh, “Ym bit ba uta u briew un sah marwei; ngan thaw ïa u ka nongsumar lem kaba biang.”

¹⁹ Bad U Trai uba U Blei u la pynlong na ka khyndew ïa ki mrad ka ryngkew baroh, bad ïa ki sim bneng baroh; bad u la wallam ïa ki ha u Adam ban khmih kumno un buh kyrteng ïa ki: bad kat kumba uta u briew u la buh kyrteng ïa kita ki kynja ba-im baroh, kumta hi ka la long ka kyrteng jong ki.

²⁰ Bad u Adam u la buh kyrteng ha ki kynja jingri baroh, bad ha ki sim bneng, bad ha ki mrad baroh jong ka khyndew; hynrei, ïa u Adam ym pat shym la shem ïa ka nongsumar lem.

²¹ Te U Trai uba U Blei u la pynngat ha u Adam da ka jingsamthiah kaba jur, u ruh u la ïohthiah: bad u la shim ïa kawei na ki shyieng krung jong u, bad u la set pat da ka doh ha ka jaka jong ka;

²² te U Trai uba U Blei u la pynlong ka briew, na kata ka shyieng krung ïa kaba u la lah shim na uta u briew, bad u la wallam ïa ka ha uta u briew.

²³ Bad u Adam u la ong, “Kane mynta shisha ka long ka shyieng na ki shyieng jong nga, bad ka doh na ka doh jong nga: ïa kane keiñ yn khot ‘Ka Briew,’ namar ba la shim ïa ka na u Briew.”

²⁴ Namar kata keiñ, u briew un iehnoh ïa la u kpa bad ïa la ka kmie, bad un ïaineh bad la ka tnga: bad kin ïalong ruh kawei ka doh.

²⁵ Te ki la long kiba lyngkhuit baroh ar ngut, uta u briew bad ka tnga jong u, bad kim shym la sngewlehrain.