JENESIS 16 - KA BAIBL

Ka Hagar bad u Ishmael

¹ Te ka Sarai ka tnga u Abram kam pat shym la kha khun ïa u: bad ka la don ka shakri ka kynja Ijipt, ka kyrteng jong ka, ka la long “ka Hagar”.

² Te ka Sarai ka la ong ha u Abram, “Ha khmih mynta, U Trai u la khang ïa nga na ka ban kha: to khie leit me shapoh ha ka shakri jong nga; lehse yn ïoh mih khun ïa nga na ka.” Te u Abram u la shahshkor ïa ka ktien jong ka Sarai.

³ Bad ka Sarai ka tnga u Abram ka la shim ïa ka Hagar, kata ka kynja Ijipt ka shakri jong ka, ynda u Abram u la lah shong shiphew snem ha ka ri Kanaan, bad ka la ai ïa ka ha u Abram u tnga jong ka, ïa ka ban long ka tnga jong u.

⁴ Kumta keiñ, u la leit bsut shapoh ha ka Hagar, bad ka la punkhun; bad ynda ka la ïohi ba ka la lah punkhun, ka la ibeiñ ïa la ka kynrad.

⁵ Ynda kumta, ka Sarai ka la ïathuh ha u Abram, “Kaba shah bymdei jong nga kan long halor ka khlieh jong me: ma nga hi keiñ nga la ai ïa la ka shakri ha ka shadem jong me; te haba ka la ïohi ba ka la punkhun, ka la ibeiñ ïa nga: U Trai un da bishar hapdeng jong nga bad me.”

⁶ Hynrei, u Abram u la ïathuh ha ka Sarai, “Ha khmih, ka shakri jong pha ka long ha ka kti jong pha hi; to leh ïa ka katba pha ibit hi.” Te ka Sarai ka la leh tyngeh ïa ka katta, ba ka la phet noh na khmat jong ka.

⁷ Bad u angel U Trai u la shem ïa ka hajan kaba mih umpohliew ha ka ri khlaw, hajan kata ka pukri kaba ha ka lynti sha Shur keiñ.

⁸ Te u la ong, “Ko Hagar, ka shakri jong ka Sarai, hato na-ei pha la wan? bad shaei phan leit?” Bad ka la ïathuh, “Nga phet noh keiñ na khmat ka Sarai ka kynrad jong nga.”

⁹ Bad uta u angel U Trai u la ong ha ka, “To leit phai pat sha la ka kynrad, bad to pynkohnguh ïa lade hapoh ka kti jong ka.”

¹⁰ Bad uta u angel U Trai u la ong ruh ha ka, “Ngan pynroi ïa u symbai jong pha shikatdei eh katta, ba yn ym lah shuh ban ñiew ïa u namar ka jingman bun jong u.”

¹¹ Bad uta u angel U Trai u la ong ruh ha ka, “Ha khmih, pha la punkhun bad phan kha ïa u khun, bad phan khot kyrteng ‘u Ishmael’ ïa u; naba U Trai u la shahshkor ïa ka jingsngewjynjar jong pha.

¹² Te un long u briew kum u kadda khlaw; ka kti jong u kan long ban ïaleh ïa u briew baroh, bad ka kti u briew baroh kan ïaleh ïa u; bad ha khmat la ki para baroh un shong dara.”

¹³ Ka te ka la khot ïa ka kyrteng U Trai uba la kren ha ka, “Ma me, A Blei, me ïohi ïa nga”: naba ka la ong, “Shisha te nga dang ïohi hangne ruh ïa uta ynda u la paw ha nga?”

¹⁴ Namar kata, la khot ïa kata ka pukri “ka Beer-lahai-roi”; ha khmih, ka don hapdeng ka Kadesh bad ka Bered.

¹⁵ Bad ka Hagar ka la kha ïa u khun ïa u Abram: bad u Abram u la khot kyrteng “u Ishmael” ïa u khun jong u, ïa uba la lah kha ka Hagar.

¹⁶ Bad u Abram u la long phraphew hynriew snem, mynba ka Hagar ka la kha ïa u Ishmael ha u Abram.