JENESIS 11 - KA BAIBL

Ka jingtei ïa ka Babel

¹ Bad ka pyrthei baroh ka la long kawei ka ktien, bad kawei ka jingkren.

² Ka la jia ruh, haba ki nang ïaleit kynriah noh na mihngi, ba ki la shem ïa ka 'dewmadan heh ha ka ri Shinar; bad hangta ki la ïashong duh.

³ Bad ki la ïa-ong paralok hi, “Ïa, ngin ïathaw ïa ki maw-it, bad ngin ïathang bha ïa ki.” Te ki maw-it ki la don ha ka jaka ki maw, bad ka bsiang ka la don ha ka jaka ka sorki.

⁴ Ki la ïa-ong ruh, “Ïa, ngin ïatei ïa ka nongbah kawei ïa lade bad ïa ka kut ruh kawei, kaba ka kliar jong ka kan kot haduh ka bneng; bad to ngin ïathaw nam ïa lade, ba ïoh yn pynsakma kylleng ïa ngi ha khmat ka pyrthei baroh.”

⁵ Bad U Trai u la wan hiar ïa ka ban khmih ïa kata ka nongbah bad ïa kata ka kut, ïa kaba ki la lah ïatei ki khun bynriew.

⁶ U Trai u la ong ruh, “Ha khmih, ki briew ki long uwei u paidlang, bad ki don baroh tang kawei ka ktien; bad ïa kane ki ïasdang ban leh: te mynta kaei kaei ruh em kan ym khang ïa ki ban leh, ïa kaba ki la lah ïathmu keiñ.

⁷ Ïa, ngin ïaleit hiar, bad ngin ïa-pynbakla ïa ka ktien jong ki hangta, ba kin ym ïasngewthuh shuh ïa ka ktien paralok hi.”

⁸ Kumta, U Trai u la pynsakma ïa ki kylleng nangta ha khmat ka pyrthei baroh; te ki la ïapep noh na ka ban ïatei ïa kata ka nongbah.

⁹ Namar kata, la khot “Babel” ïa ka; naba U Trai u la pynbakla hangta ïa ka ktien ka pyrthei baroh: bad nangta ruh U Trai u la pynsakma ïa ki kylleng ha khmat ka pyrthei baroh.

Kiba hiar pateng na u Shem

¹⁰ Kine ki long ki jinghiar pateng jong u Shem: u Shem u la long shispah snem ka rta, bad u la pynkha ïa u Arphakshad ar snem hadien kata ka jingshlei:

¹¹ bad u Shem u la im hadien ba u la pynkha ïa u Arphakshad, sanspah snem, bad u la pynkha ïa ki khun shynrang bad ïa ki khun kynthei.

¹² Bad u Arphakshad u la im laiphew san snem, bad u la pynkha ïa u Shelah:

¹³ bad u Arphakshad u la im hadien ba u la pynkha ïa u Shelah, sawspah lai snem, bad u la pynkha ïa ki khun shynrang bad ïa ki khun kynthei.

¹⁴ Bad u Shelah u la im laiphew snem, bad u la pynkha ïa u Eber:

¹⁵ bad u Shelah u la im hadien ba u la pynkha ïa u Eber, sawspah lai snem, bad u la pynkha ïa ki khun shynrang bad ïa ki khun kynthei.

¹⁶ Bad u Eber u la im laiphew saw snem, bad u la pynkha ïa u Peleg:

¹⁷ bad u Eber u la im hadien ba u la pynkha ïa u Peleg, sawspah laiphew snem, bad u la pynkha ïa ki khun shynrang bad ïa ki khun kynthei.

¹⁸ Bad u Peleg u la im laiphew snem, bad u la pynkha ïa u Reu:

¹⁹ bad u Peleg u la im hadien ba u la pynkha ïa u Reu, arspah khyndai snem, bad u la pynkha ïa ki khun shynrang bad ïa ki khun kynthei.

²⁰ Bad u Reu u la im laiphew ar snem, bad u la pynkha ïa u Serug:

²¹ bad u Reu u la im hadien ba u la pynkha ïa u Serug, arspah hynñiew snem bad u la pynkha ïa ki khun shynrang bad ïa ki khun kynthei.

²² Bad u Serug u la im laiphew snem, bad u la pynkha ïa u Nahor:

²³ bad u Serug u la im hadien ba u la pynkha ïa u Nahor, arspah snem, bad u la pynkha ïa ki khun shynrang bad ïa ki khun kynthei.

²⁴ Bad u Nahor u la im arphew khyndai snem, bad u la pynkha ïa u Terah:

²⁵ bad u Nahor u la im hadien ba u la pynkha ïa u Terah, shispah khatkhyndai snem, bad u la pynkha ïa ki khun shynrang bad ïa ki khun kynthei.

²⁶ Bad u Terah u la im hynñiewphew snem, bad u la pynkha ïa u Abram, ïa u Nahor, bad ïa u Haran.

Kiba hiar pateng na u Terah

²⁷ Bad kine ki long ki jinghiar pateng bynriew jong u Terah: u Terah u la pynkha ïa u Abram, ïa u Nahor, bad ïa u Haran; bad u Haran u la pynkha ïa u Lot.

²⁸ Te u Haran u la ïap mynshuwa ïa u Terah u kpa jong u ha ka ri ba kha ïa u, ha ka shnong Ur kaba ha ka ri ki Khaldi.

²⁹ Bad u Abram bad u Nahor ki la ïoh ïa la ka tnga ka tnga: ka kyrteng ka tnga u Abram ka la long “ka Sarai”: bad ka kyrteng ka tnga u Nahor ka la long “ka Milkah”, ka khun u Haran, u kpa ka Milkah, bad u kpa ka Iskah.

³⁰ Bad ka Sarai ka la long kaba lyngki; kam shym ïoh khun.

³¹ Bad u Terah u la shim ïa u Abram u khun jong u, bad ïa u Lot u khun u Haran, u ksiew jong u, bad ïa ka Sarai ka pyrsa kurim jong u, ka tnga u Abram u khun jong u; bad ki la ïaleit mih noh lang na ka shnong Ur, kaba ha ka ri ki Khaldi, ïa ka ban leit sha ka ri Kanaan; bad ki la ïawan poi sha Haran, bad ki la ïashong sah hangta.

³² Te ki sngi jong u Terah ki la long arspah san snem: bad u Terah u la ïap ha Haran.