JAKOB 2 - KA BAIBL

Kaba adong ïa kaba ñiew shiliang khmat

¹ Ko parabangeit jong nga, wat bat da ki jingleh ñiew shiliang khmat ïa ka jingngeit U Jisu Khrist U Trai jong ngi, uba U Trai ka burom.

² Namar lada wan rung shapoh ka jingïaseng jong phi u briew uba deng ka sa'ti ksiar, ha ka jaiñkup babha, bad lada wan rung u baduk ha ki jaiñkup basyrdep jot;

³ bad lada phi khmih burom ha uta uba kup ïa kita ki jaiñkup ki babha, bad phi ong ha u, “Ma me to shong hangne ha ka jaka ka babha”; hynrei, phi ong ha uta u baduk, “To ïeng ma me hangtai, lane to shong hapoh kane ka jingïuh kjat jong nga”:

⁴ hato kumta phim bishar shiliang ha lade hi, bad phi la jia long ki nongbishar ba don ki jingpyrkhat basniew?

⁵ To da sngew phi, ko parabangeit ba-ieit jong nga: Hato U Blei um ju la jied ïa kita ki baduk jong kane ka pyrthei, ban long ki bariewspah ha ka jingngeit, bad ki nongïoh pateng ïa kata ka hima, ïa kaba u la kular ha kita kiba ieit ïa u?

⁶ Hynrei, ma phi pleng phi la ñiewbeiñ ïa uta u baduk. Hato kita ki bariewspah kim ban shitom ïa phi, bad kim ring ma ki hi ïa phi sha khmat ki khet bishar?

⁷ Hato kine kim krenbeiñ sat ïa kata ka kyrteng ba-donburom da kaba la khot ïa phi?

⁸ Hynrei, lada phi pyndep ïa ka hukum bakynja syiem, katba kum ka jingthoh, “Men ieit ïa u paramarjan jong me kumba ïa lade”, phi leh bha keiñ:

⁹ hynrei, lada phi ñiew shiliang khmat, phi leh pop keiñ, ba la pynrem ïa phi da kane ka hukum kum ki nongpalat.

¹⁰ Namar jar u ban sumar biang ïa ka hukum baroh kawei, hynrei, un jynthut tang ha iwei, u la jia long uba rem noh na ki baroh.

¹¹ Namar uta uba la ong, “Wat klim”, u la ong ruh, “Wat pynïap”. Te lada men ym klim, pynban, men pynïap, me la jia long keiñ u nongpalat ïa ka hukum.

¹² Kumta, to kren phi, bad kumta, to leh phi, kum ïa ki ban sa bishar da ka hukum ka jingpyllaitluid.

¹³ Namar ka jingpynrem ba khlem leh isynei kan long ha uta u bym ju la leh isynei; hynrei, ka jingisynei ka leh risa halor ka jingbishar.

Ka jingngeit bad ka jingleh

¹⁴ Hato ka myntoi aïu, ko parabangeit jong nga, lada uno uno ruh u ong ba u don ka jingngeit, hynrei, um don ki jingleh? hato kata ka jingngeit ka lah ne em ban pynim ïa u?

¹⁵ Hynrei, lada u parabangeit lane ka parabangeit ki da long ki balyngkhuit, bad lada ki da long ki bakyrduh ka jingbam kaba ha la ka sngi,

¹⁶ bad lada uno uno ruh na phi u shu ong ha ki, “To khie leit phi ha kaba suk, to phin pynsyaid phin pynkdang ïa lade”; hynrei, pynban, phim ai satia ha ki, ïa kita kiei kiei ruh ba-donkam ïa ka met; hato ka myntoi aïu?

¹⁷ Kumta ruh, kata ka jingngeit, lada kam don ki jingleh, ka long kaba ïap ha lade hi.

¹⁸ Hynrei, don u ban ong, “Me, me don ka jingngeit, nga ruh nga don ki jingleh: to pyni ha nga ïa kata ka jingngeit jong me khlem kita ki jingleh jong me, nga ruh ngan pyni ha me na kita ki jingleh jong nga ïa ka jingngeit jong nga.”

¹⁹ Me, me ngeit ba U Blei u long uwei; me leh bha keiñ; kita ki ksuid ruh ki ngeit, bad ki sngewkyiuh keiñ.

²⁰ Hynrei, me kwah ban tip, A u briew babieit, ba kata ka jingngeit khlem kita ki jingleh ka long ka baïap?

²¹ Hato ym shym la pynksan ïa u Abraham u kpa jong ngi da ki jingleh, mynba u la kñia ainguh ïa u Isaak u khun jong u ha kata ka duwan?

²² Me ïohi ba kata ka jingngeit ka la trei lem bad kita ki jingleh jong u, bad da kita ki jingleh la pynjanai noh ïa kata ka jingngeit.

²³ Te kumta, la pyndep ïa kata Ka Jingthoh kaba ong: “U Abraham u la ngeit ïa U Blei, bad la ñiew ka hok ïa kata ha u; bad la khot ‘u lok U Blei’ ïa u.”

²⁴ Phi ïohi ba da ki jingleh ba pynksan ïa u briew, te ym tang da ka jingngeit hi.

²⁵ Kumjuh ruh de ym shym la pynksan da ki jingleh ïa ka Rahab ka nuti, mynba ka la pdiang sngewbha ïa kita ki nonglam-ktien, bad ba ka la phah noh ïa ki na kawei pat ka lynti?

²⁶ Namar kumba ka met khlem ka mynsiem ka long kaba ïap, kumta ruh, kata ka jingngeit khlem kita ki jingleh ka long kaba ïap keiñ.