JAKOB 1 - KA BAIBL

Ka jingkhublei

¹ U Jakob, u shakri U Blei bad U Jisu Khrist uba U Trai, Sha kita ki khat-ar jaid kiba ha kata ka jingpynwir noh: U phah khublei.

Ka jingngeit bad ka jingstad

² To phin ñiew ïa ka, ka jingkmen suda, ko parabangeit jong nga, haba phi hap ha ki jingtynjuh babun jaid;

³ haba phi tip ba kata kaba phrang ïa ka jingngeit jong phi, ka pynlong ïa ka jingïaishah.

⁴ Hynrei, kane ka jingïaishah, to ai kan ïoh ïa la ka jingtrei bajanai, ba phin ïoh long kiba janai bad kiba tylli biang, ki bymduna ha kaei kaei ruh.

⁵ Hynrei, lada uno uno ruh na phi u duna ka jingstad, to un pan na U Blei, uba ai kylluid ïa baroh bad u bym kynnoh beiñ; te yn ai ïa kata ha u.

⁶ Hynrei, to un pan ha ka jingngeit, khlem da artatien ei ei ruh em; namar uta uba da sngew-artatien, u long keiñ kum ka jingat phyllung ka duriaw, ïa kaba la beh da ka lyer bad ba la pynshad kynting.

⁷ Namar wat ai ba uta u briew un mut ba un ïoh diang ei ei ruh na U Trai,

⁸ u briew basynrop mynsiem, u bymneh ha ki lynti jong u baroh.

U bakyrduh bad u bariewspah

⁹ Te uta u parabangeit u bapoh, to un leh kmen noh ha ka jingpynkyntiew ïa u;

¹⁰ hynrei, uta u bariewspah, ha ka jingpynrit ïa u; naba kum u syntiew u phlang un tlor noh.

¹¹ Namar ka sngi ka mih lem bad ka lyer kaba shit, bad ka pynïap ryngkhiang ïa uta u phlang; te uta u syntiew jong u, u tlor noh, bad ka jingitynnad ka dur jong u ka jot noh: kumta ruh, uta u bariewspah un ïap ryngkhiang ha kita ki lynti jong u.

Ki jingtynjuh bad ki jingpynshoi

¹² Suk uta u briew uba ïaishah ïa ka jingtynjuh; naba haba la tynjuh ïa u, un ïoh diang ïa kata ka pansngiat ka jingim, ïa kaba U Trai u la kular ha kita kiba ieit ïa u.

¹³ Wat ong uno uno ruh em haba la pynshoi ïa u, “La pynshoi ïa nga na U Blei”; naba ïa U Blei ym lah ban pynshoi da ka basniew, bad um pynshoi ma U ïano ïano ruh.

¹⁴ Hynrei, la pynshoi ïa uwei pa uwei baroh haba la ring pah ïa u da ka jingkwah brai la ka jong hi, bad haba la riam ïa u.

¹⁵ Ynda kumta, kata ka jingkwah brai, haba ka la pun, ka kha ïa ka pop, te kata ka pop, haba ka la san, ka kha ïa ka jingïap keiñ.

¹⁶ To wat bakla noh phi, ko parabangeit ba-ieit jong nga.

¹⁷ Ka jingai babha baroh, bad ka jingai bajanai baroh, ka long na jrong, kaba wan hiar na U Kpa ki jingshai, bad uba ym don ka jingkylla shuh, lymne ka syrngiew kaba shat da ka jingkylla.

¹⁸ Da kaba u la mon sngewbha, u la pynkha ïa ngi da ka ktien ka jingshisha, ba ngin long ma ngi ki kynja soh nyngkong na kita ki jingthaw jong u.

Kaba sngew bad kaba leh

¹⁹ Namar kata, ko parabangeit ba-ieit jong nga, ai ba u briew baroh un long uba kloi ban ïohsngew, uba tud ïa ka ban kren, uba tud keiñ ïa ka ban bitar:

²⁰ namar ka jingbitar u briew, kam ju pynlong ïa ka hok U Blei.

²¹ Naba kumta, haba la buh noh bad ïa ka jingtngit baroh, bad ïa ka jingshlei ka jingbishni, to phin pdiang da ka jingjemnud ïa kata ka ktien ba la thung, kaba lah keiñ ban pynim ïa ki mynsiem jong phi.

²² Te to long phi ki nongleh ïa ka ktien, bad ym tang ki nongsngew, da kaba shukor noh ïa lade hi.

²³ Naba lada uno uno ruh u long u nongsngew ïa ka ktien, bad ym u nongleh, une u long kum u briew uba khmih thuh ïa ka khmat ka met jong u ha ka ïitkhmih:

²⁴ namar u la khmih thuh ïa lade, bad u la leit noh, bad kumne kumne ruh u la klet noh uba kumno u la long.

²⁵ Hynrei, jar uba ïaikhmih thuh sha ka hukum bajanai, kaba ka jong ka jingpynpyllait luid, bad u ïaineh; une, haba um long u nongsngew uba klet noh, hynrei, u nongleh ïa ka kam, un long uba suk ha kata ka jingleh jong u.

²⁶ Lada uno uno ruh hapdeng jong phi u mut ba u long uba riewblei, haba um synshar ïa la u thylliej, hynrei, u da shukor noh ïa la ka dohnud, kata ka jinglong riewblei une u briew kaba thala thaleiñ.

²⁷ Ka jinglong riewblei kaba sngur bad bymtngit ha khmat U Blei bad U Kpa ka long kane keiñ: ban leit khmih ïa ki khunswet bad ïa ki riewkynthei ha ka jingshitom jong ki, bad ban ri noh ïa lade uba khlem thohbria na ka jong ka pyrthei.