ISAÏAH 9 - KA BAIBL

Ka jingkha bad ka jingsynshar U Syiem ka jingsuk

¹ Hynrei, yn ym don ka jingkah dum ïa kata kaba la don ha ka jingpisa. Ha kaba nyngkong u la pynibeiñ ïa ka ri Sabulon, bad ïa ka ri Naphtali, te hadien u la pyndonburom ïa ka, ha ka lynti ka duriaw, sha shiliang ka Jordan, ka Galilaïa ki jaid bynriew.

² U paidlang uba la ïaid ha ka jingdum u la ïohi ïa ka jingshai bakhraw: kiba la shong ha ka ri ka syrngiew ka jingïap, la tyngshaiñ ka jingshai halor jong ki.

³ Me la pynbun ïa kata ka jaid bynriew, me la pynroi ïa ka jingkmen jong ki: ki ïakmen ha khmat jong me kat ka jingkmen ha ka aïom ot, kat kiba shadkmen haba ki ïabynta ïa ka jinglute.

⁴ Namar ïa ka lyngkor ka jingkit jong u, bad ïa u dieng ka tyrpeng jong u, ïa u dieng u nongban ïa u, me la pynkheiñ kum ha ka sngi ki Midian.

⁵ Namar ka jingkieng atiar jong uba kieng atiar baroh ha kata ka jingkhihwin, bad ki jaiñkup kiba la saw hain da ka snam, kin long ïa ka ban thang, ka jingbam ka ding keiñ.

⁶ Namar ha ngi la kha ïa u khun, la ai ïa u khun ha ngi; te ka jingsynshar kan long halor ka tyrpeng jong u: bad yn khot ïa ka kyrteng jong u, “U Baphylla, U Nongsylla,” “U Blei Bakhrawbor,” “U Kpa Bymjukut,” “U Syiem ka Jingsuk.”

⁷ Ka jingroi ka jingsynshar jong u bad ka jingsuk kan ym kut shuh, halor ka khet u Dabid, bad halor ka hima jong u, ïa ka ban pynïeng ïa ka, bad ïa ka ban kyrshan ïa ka da ka jingbishar bad da ka hok naduh mynta bad ha la ka rta. Ka jingshitrhem U Trai ki paid kan pyndep ïa kane.

Ka jingbitar U Trai pyrshah ïa ki Israel

⁸ U Trai u la phah ka ktien ha u Jakob, te ka la hap ha u Israel.

⁹ Bad u paidbah baroh un tip, wat u Ephraim bad uba shong ha Samaria, kiba ong ha ka jingsarong bad ka jingsngewkhraw ka dohnud,

¹⁰ “Ki maw-it ki la kyllon, te ngin tei da ki maw ba la shtah: ïa ki dieng Shekma la khet noh, te ngin ïapli da ki dieng Kedar.”

¹¹ U Trai te un pynïeng hajrong pyrshah ïa u da ki nongshun u Resin, bad un pynkhih ïa ki nongïaleh jong u;

¹² ki Syria na shuwa, bad ki Philistia na shadien; te kin bam duh ïa ki Israel da ka shyntur ba ang. La kumta ruh ka jingbitar jong u kam shym la phai noh, hynrei, ka kti jong u ka shu dang kner.

¹³ Pynban, une u paidlang um shym phai sha uta uba shoh ïa ki, lymne kim shym wad ïa U Trai ki paid.

¹⁴ Namar kata, U Trai un ot noh na ki Israel bad khlieh bad tdong, ïa u tnat dieng Tlai, bad u thungshut, ha kawei ka sngi.

¹⁵ U tymmen bad uba donburom u long u khlieh; bad u nongïathuhlypa uba hikai lamler, u long ka tdong.

¹⁶ Naba kita kiba ju ïalam ïa une u paidlang ki pynïaid sakma ïa ki; bad ïa kiba la shah ïalam da ki la pynjot noh.

¹⁷ Namar kata, U Trai un ym kmen ha ki samla jong ki, lymne un ym sngewsynei ïa ki khunswet bad ïa ki riewkynthei jong ki: namar uwei uwei baroh u long u bymman bad uba leh sniew, bad ka shyntur baroh ka kren thala. La kumta ruh ka jingbitar jong u kam shym la phai noh, hynrei, ka kti jong u ka shu dang kner.

¹⁸ Namar ka jingbymman ka ing kum ka ding; ka bam duh ïa ki dieng shiah bad ki dieng shiah buid: shisha keiñ, ka pluh ha ka bniap jong ka khlaw, te ki ïatyllun noh sha jrong ha ki lyoh tdem.

¹⁹ Da ka jingbitar U Trai ki paid, ka ri ka la ingkhong: u paidlang ruh u long jingbam ïa ka ding; ym don u briew uba riej ïa la u para.

²⁰ Te uwei un knieh sha kamon, bad un thngan; bad un bam sha kadiang, te kin ym kdang: un bam uwei uwei baroh ïa ka doh ka ksang'ti jong u hi:

²¹ u Manasseh, ïa u Ephraim; bad u Ephraim, ïa u Manasseh; bad kita lang kin ïaleh ïa u Judah. La kumta ruh ka jingbitar jong u kam shym la phai noh, hynrei, ka kti jong u ka shu dang kner.