ISAÏAH 7 - KA BAIBL

Ka khubor ka banyngkong U Isaïah ïa U Ahas

¹ Te ka la jia ha ki sngi u Ahas u khun u Jotham, u khun u Ussiah, u syiem ka Judah, ba u Resin u syiem ka Syria, bad u Pekah u khun u Remaliah, u syiem ki Israel, ki la leit kiew sha Jerusalem ban ïaleh thma ïa ka; hynrei, kim shym lah ban jop ïa ka.

² Bad la ïathuh ha ka ïing u Dabid, da kaba ong, “Ka Syria ka shaniah ha u Ephraim.” Te ka dohnud jong u ka la khih, bad ka dohnud u paidlang jong u, kumba ju pynkhih ïa ki dieng ka khlaw da ka lyer.

³ Te U Trai u la ong ha u Isaïah, “To mih noh mynta ban ïashem bad u Ahas, ma me bad u Shear-jashub u khun jong me, sha ka bakut ka nur ka pung kaba haneng, ha ka lynti bah ka lyngkha u nongpynlieh jaiñ;

⁴ men ong ruh ha u, ‘To sumar ïa lade, bad shong khop; to wat sheptieng, bad wat ai la ka dohnud ban sngewsyier namar kine ki ar tylli ki tdong ki jingtbeh ding ba-tdem, namar ka jingbitar u Resin bad ka Syria, bad u khun u Remaliah.

⁵ Namar ka Syria ka la pyrkhat sniew ïa me, u Ephraim ruh, bad u khun u Remaliah, ki ïa-ong,

⁶ “Ïa ngin ïaleit kiew pyrshah ïa ka Judah ban kyntuit ïa ka, te ngin ïa-pynkyllon ïa ka ïa ngi, bad ngin thung syiem hapdeng jong ka, ïa u khun u Thabil keiñ:”

⁷ kumne u ong U Trai U Blei: “ ‘Kan ym neh, bad kan ym long.

⁸ Namar ka khlieh ka Syria ka long ka Damaskos, bad ka khlieh ka Damaskos u long u Resin: te hapdeng hynriewphew san snem yn pynlwet ïa u Ephraim, ba un ym long u paidlang shuh;

⁹ bad ka khlieh u Ephraim ka long ka Samaria, bad ka khlieh ka Samaria long u khun u Remaliah. Lada phin ym ngeit, da lei lei yn ym pynskhem ïa phi.’ ”

Ka khubor U Isaïah shaphang U Immanuel

¹⁰ Te U Trai u la kren pat ha u Ahas, u da ong,

¹¹ “To da pan me ïa ka dak na U Trai U Blei jong me; pan ïa ka ha kaba jylliew, lane ha kaba jrong haneng.”

¹² Te u Ahas u la ong, “Ngan ym pan, bad ngan ym tynjuh ïa U Trai.”

¹³ Te u la ong, “To sngew phi mynta, ko ka ïing u Dabid; ka long kaba sting ïa phi ban pynthait ïa ki briew, ba phin pynthait ïa U Blei jong nga ruh?

¹⁴ Namar kata, U Trai hi un ai ka dak ïa phi: Ha khmih, ka theisotti kan punkhun, kan kha ruh ïa u khun, yn khot ruh ïa ka kyrteng jong u, ‘u Immanuel.’

¹⁵ Ïa ka makhon bad ka ngap un bam, haba u tip ban kyntait ïa ka basniew, bad ban jied ïa ka babha.

¹⁶ Namar haba u khynnah um pat tip ïa ka ban kyntait ïa ka basniew, bad ban jied ïa ka babha, ïa ka ri kaba me isih ïa ki syiem jong ka baroh ar ngut, yn sa iehnoh noh.

¹⁷ U Trai un pynwan halor jong me, bad halor u paidlang jong me, bad halor ka ïing u kpa jong me, ïa ki sngi ki bym pat ju wan, naduh ka sngi ba u Ephraim u la kynriah noh na Judah: ïa u syiem ka Assyria keiñ.”

¹⁸ Te kan long ha kata ka sngi, ba U Trai un siaw ïa u skain uba ha ka bakut eh ki wah ka ri Ijipt, bad ïa u ngap uba ha ka ri Assyria.

¹⁹ Kin wan ruh, bad kin shong baroh ha ki them bakynjah, bad ha ki krem ki mawsiang, bad ha ki bniap shiah baroh, bad ha ki jaka phlang baroh.

²⁰ Ha kata ka sngi, U Trai un khi da ka syrti ba la wer, kaba ha kita ki phang kiba sha lyndet ka Wah, bad u syiem ka Assyria keiñ, ïa ka khlieh bad ïa u 'ñiuh kjat: te kan pynduh ruh ïa u 'ñiuh tmoh.

²¹ Te ha kata ka sngi, u briew un bsa ïa ka masi lud, bad ar tylli ki langbrot;

²² te namar ka jingdap kyrhai ka dud ba kin ai, un ïoh bam makhon: namar ïa ka makhon, bad ka ngap, un bam uwei uwei baroh ba la iehnoh ha ka ri.

²³ Te kan long ha kata ka sngi, ba ka jaka baroh, ha kaba ju don shi hajar ki dieng Waiñ ha ka dor shi hajar rupa, kan long ïa ki dieng shiah, bad ïa ki dieng shiah buid.

²⁴ Da ki khnam bad ryntieh kin wan hangta; namar ka ri baroh kan long ki dieng shiah bad ki dieng shiah buid.

²⁵ Bad kita ki lum baroh ba la puh da u mohkhiew, men ym wan hangta na kaba sheptieng ïa ki dieng shiah bad ki dieng shiah buid, hynrei, kan long ban pyllait ïa ki masi, bad ba ki langbrot kin ïoh ïuh.