ISAÏAH 57 - KA BAIBL

¹ Ki bahok ki duh noh, te ym don ba buh ha la ka dohnud; bad ïa ki briew ba-isynei la shim noh, te ym don uba pyrkhat ba la shim noh ïa u bahok na ka jingsniew ka ban sa wan.

² U rung sha ka jingsuk; ki jahthait ha la ki jingthiah, jar uba ïaid ha la ka jingbeit.

³ Hynrei, to wan hajan shane, phi ki khun jong ka nongleh byrtong, u symbai jong u nongklim bad ka nuti.

⁴ Ïano phi pyrthuhbeiñ? Ïano phi heh shyntur, bad phi sei thylliej? Phi phim long ki khun ka jingpalat, u symbai ka jinglamler,

⁵ phi kiba ïa-ing hapdeng ki dieng Sning, hapoh u dieng jyrngam baroh; kiba pynïap ïa ki khun ha ki them, hapoh ki ar khap mawsiang?

⁶ Hapdeng ki maw jlih jong ka them ka long ka bynta jong me; kita keiñ ki long ka bynta ba hap jong me; ha kita ruh me la theh noh ka jingainguh dih, me la ainguh ïa ka jingainguh. Hato yn pynsngewhun ïa nga ha kine kiei kiei?

⁷ Me la buh ïa la ka jingthiah halor u lum bakhraw bad bajrong: shata ruh me la leit kiew ban ai jingkñia.

⁸ Bad shadien ki jingkhang bad ki shawkad me la buh ïa la ka jingpynkynmaw: namar me la pynpaw ïa lade ïa uwei pat ban ïa nga, me la kiew ruh; me la pynkhraw ïa la ka jingthiah, bad me la pynlong ïa ka jutang bad ki; me la ieit ïa ka jingthiah jong ki ha kaba me la ïohi ïa ka.

⁹ Me la leit ruh sha u syiem bad ka jingsleh, bad me la pynbun ïa la ki jingiwbih, me la phah jngai ruh ïa la ki nongkit-ktien, bad me la pynpoh ïa lade haduh ñiamra.

¹⁰ Me la sngewthait da ka jingjlan ka lynti jong me; pynban, mem shym la ong, “Ym don jingkyrmen:” me la shem ka jingpynthymmai ïa la ka bor; namar kata, mem shym la sngewlwait.

¹¹ Te ïano me la sngewma lane sheptieng, ba me la lamler, bad mem shym la kynmaw ïa nga, lymne buh biang ïa ka ha la ka dohnud? Ngam shym la shu sngap jar la slem eh, bad me mem shym la sheptieng ïa nga?

¹² Nga ngan pynbna ïa ka hok jong me; bad shaphang ki kam jong me, kin ym pynmyntoi ïa me.

¹³ Haba me kyang, to kita kiba me la ïalum kin pyllait ïa me; hynrei, ka lyer kan rong ïa ki, ka jingpyrsad kan kit noh ïa ki baroh: hynrei, uta uba shaniah ha nga un ïoh ïa ka ri, bad un ïoh kynti ïa u lum bakyntang jong nga.

Ka jingïarap U Blei bad ka jingpynkhiah

¹⁴ Bad un ong, “To ïakynton, to ïakynton, to khreh ka lynti, to weng noh ka jingjynthut na ka lynti u paidlang jong nga.”

¹⁵ Naba kumne ong uta uba ha khlieh bad hajrong tam uba shong dap ïa ka bymjukut, uba ka kyrteng jong u, “U Bakhuid:” “Nga shong ha ka jaka kaba hajrong bad ka bakhuid, bad kata ka mynsiem ruh kaba sngewsih bad ba sngewrit, ban pynim ruh ïa ka mynsiem jong uba sngewrit, ban pynim ruh ïa ka dohnud jong kiba sngewsih.

¹⁶ Naba ngan ym ïaleh ha la ka rta, lymne ngan ym sngewbitar junom: namar ka mynsiem kan da duh noh ha khmat jong nga, bad kita ki mynsiem kiba nga la pynlong.

¹⁷ Namar ka jingbymhok ka jingkhwan lalot jong u nga la bitar bad nga la shoh ïa u, nga la buhrieh ïa lade ba nga la bitar: u te u la nang ïaid kynriang ha ka lynti ka dohnud jong u.

¹⁸ Nga la ïohi ïa ki lynti jong u, te ngan pynkhiah ïa u: ngan ïalam ruh ïa u, bad ngan ai pat ki jingtngen ha u, bad ha kiba ïambriew jong u.

¹⁹ Nga thaw ïa u soh ki rmiang shyntur: ‘Ka jingsuk, ka jingsuk, ïa uba jngai, bad ïa uba hajan,’ ” ong U Trai; “te ngan pynkhiah ïa u.

²⁰ Hynrei, ki bymman ki long kum ka duriaw ba la pynkhih; naba kam lah long jai jai, bad ki um jong ka ki kynroi ïa ka ktieh bad ka jakhlia.

²¹ ‘Ym don jingsuk,’ ” ong U Blei jong nga, “ïa ki bymman.”