ISAÏAH 52 - KA BAIBL

U Blei un pyllait ïa ka Seïon na ka jinglongmraw

¹ To khie, to khie, to kup ïa la ka bor, ko Seïon, to kup ïa la ki jaiñkup ba-itynnad, ko Jerusalem, ka shnong ka bakhuid: naduh mynta u bym shym la otsher bad u basang kin ym wan shuh ha pha.

² To kynther ïa lade na ka 'dewmet; to ïeng, to shong, ko Jerusalem: pyllait ïa lade na ki jingkhum ka ryndang jong pha, ko ka khun mraw ka Seïon.

³ Namar kumne u ong U Trai, “La die ei ïa phi; bad yn siewspah ïa phi khlem sbai.”

⁴ Namar kumne u ong U Trai U Blei, “U paidlang jong nga u la leit hiar noh ha kaba mynnyngkong sha Ijipt ban shong basa hangta: bad ki nong Assyria ki la banbeiñ ïa ki khlem daw.

⁵ Namar kata te, ngan leh aïu hangne,” ong U Trai, “haba la shim ei ïa u paidlang jong nga? Kita kiba synshar halor jong ki, ki kyang,” ong U Trai, “bad ïa ka kyrteng jong nga la ïaikrenbeiñ baroh shi sngi.

⁶ Namar kata, u paidlang jong nga un tip ïa ka kyrteng jong nga: namar kata, ha kata ka sngi kin tip ba nga long uta uba kren; ha khmih, long ma nga.”

⁷ A katno ba-itynnad halor ki lum ki long ki sla'jat jong uta uba ïathuhkhana babha, uba pynbna ïa ka jingsuk, uba ïathuhkhana ïa ka jingbha, uba pynbna ïa ka jingpynim; uba ong ha ka Seïon, “U Blei jong pha u synshar!”

⁸ Ka ktien ki nongap phira jong pha! Ki pynjam la ka ktien, ki ïarwai lang; namar kin ïohi markhmat markhmat, ynda U Trai un phai pat sha ka Seïon.

⁹ To kyang kmen, to ïarwai lang, phi ki jaka kynjah ka Jerusalem: namar U Trai u la pyntngen ïa la u paidlang, u la siewspah ïa ka Jerusalem.

¹⁰ U Trai u la loit lyngkhuit ïa la ka ksang'ti bakhuid ha khmat ki jaid bynriew baroh; te ki bakut ka khyndew baroh kin ïohi ïa ka jingpynim U Blei jong nga.

¹¹ To kynriah noh, to kynriah noh, to mih noh nangta, wat ktah ïa kaei kaei ka basang; to mih noh napdeng jong ka; to long khuid, phi kiba bah ïa ki khiew U Trai.

¹² Naba phin ym ïamih noh da kaba kyrkieh, lymne leit da kaba phet ïap: namar U Trai un leit ha shuwa jong phi; bad U Blei ki Israel un long u nongda ïa phi na shadien.

Ka jingshahshitom bad ka jingshah ibeiñ U Nongsiewspah

¹³ Ha khmih, u shakri jong nga un leh stad, yn kyntiew ïa u bad yn pynkhraw ïa u, bad un long hajrong eh.

¹⁴ Kumba shibun ki la lyngngoh ha me, (ka khmat jong u ka la kham sniew dur ban ïa uno uno u briew, bad ka dur jong u ban ïa ki khun shynrang ki briew,)

¹⁵ kumta un synreit ïa ki shibun ki jaid bynriew; ki syiem kin sngap la ki shyntur ha u: namar ïa kaba ym shym la ïathuh ha ki kin sa ïohi; bad ïa kaba kim shym la ïohsngew kin ïashemphang.