ISAÏAH 3 - KA BAIBL

Ka jingbishar U Trai halor ka Judah bad ka Jerusalem

¹ Namar, ha khmih, U Trai, U Trai ki paid, u shim noh na Jerusalem bad na Judah ïa ka jingkyrshan bad u diengduh, ka jingkyrshan u kpu bad ka jingkyrshan ka um baroh;

² ïa u bakhrawbor bad u nongïapom; ïa u nongbishar, bad u nongïathuhlypa, bad ïa u basian, bad u tymmen;

³ ïa u kaptan ki sanphew, bad uba khraw burom, bad u myntri, bad u nongtrei bastad, bad uba stad kren.

⁴ Bad ngan ai da ki khynnah ban long ki rangbah jong ki, bad ki khunlung kin synshar halor jong ki.

⁵ Yn banbeiñ ïa u paidlang ruh, uwei ïa uwei pat, bad uwei uwei ïa la u paramarjan: u khynnah un leh sarong ïa u tymmen, bad uba poh ïa uba don burom.

⁶ Haba u briew un bat ïa la u para ha ka ïing u kpa jong u, u da ong, “Me don jaiñkup, to long nongsynshar ïa ngi, te kane ka jingjot to kan long hapoh ka kti jong me”:

⁷ ha kata ka sngi un pyrta jam, un ong, “Ngan ym long u nongpynkhiah; naba ha ïing jong nga ym don kpu lymne jaiñkup: wat thung ïa nga u nongsynshar u paidlang.”

⁸ Namar ka Jerusalem ka la jot, bad ka Judah ka la kyllon: naba u thylliej jong ki bad ki kam jong ki, ki pyrshah ïa U Trai, ban pankwah ïa ki khmat ka burom jong u.

⁹ Ka jingpaw ka khmat jong ki ka phla pyrshah ïa ki; bad ki pynpaw ïa la ka pop kum ka Sodom, kim ju buhrieh ïa ka, Kordit ïa ka mynsiem jong ki! Namar ki la ai nong jingsniew ïa lade.

¹⁰ Ong phi shaphang u bahok, ba kan bha ïa u: namar kin bam ïa u soh ki kam jong ki.

¹¹ Kordit ïa u bymman! u un sniew; namar ïa ka bainong ki kti jong u yn ai ha u.

¹² U paidlang jong nga, ki khynnah ki long ki nongbanbeiñ jong ki, bad ki kynthei ki synshar halor jong ki. Ko u paidlang jong nga, kita kiba ïalam ïa me ki pynsakma ïa me, bad ki pynjot ka lad ki lynti ïaid jong me.

¹³ U Trai u ïeng ban ïasaid, bad u ïeng ban bishar ïa u paidlang.

¹⁴ U Trai un bsut sha ka jingbishar bad ki tymmen basan bad ki nongïalam u paidlang: “Phi keiñ kiba la bam duh ïa ka brisoh; ka jinglute ïa ki baduk ka don ha ki ïing jong phi;

¹⁵ phi mut aïu ba phi kyrdem ïa u paidlang jong nga, bad ba phi tylliat ïa ka khmat ki baduk?” ong U Trai U Blei ki paid.

Ka jingbishar U Trai halor ki khun kynthei ka Seïon

¹⁶ Te U Trai u la ong ruh, “Namar ba ki khun kynthei ka Seïon ki leh sarong, bad ki ïaid pynjrong ryndang bad ki khmat leh jyllieb, ki ïaid kynjih haba ki leit, bad ki pynriew shaw shaw da la ki kjat:

¹⁷ namar kata, U Trai un pynlong sarew ïa ka shynrong khlieh ki khun kynthei ka Seïon, bad U Trai un pynpaw ïa ki jaka rain jong ki.”

¹⁸ Ha kata ka sngi, U Trai un law noh ka jingitynnad ki khadu kjat, bad ki tupia thain, bad ki shan 'dang;

¹⁹ ki sohshkor, bad ki khadu kti, bad ki jingkah khmat;

²⁰ ki tupia, bad ki kynjri kjat, bad ki jingspong, bad ki synduk jingiwbih, bad ki kuboit;

²¹ ki sa'ti, bad ki nod khmut;

²² ki jaiñ tyngkai, bad ki barandi, bad ki shor, bad ki pla;

²³ ki ïitkhmih, bad ki jaiñ linen bani, bad ki jaiñ sngiat, bad ki jingkah.

²⁴ Te ha ka jaka ka jingiwbih, kaba iwtung kan long; bad ha ka jaka ka jingpanpoh, u tyllai; bad ha ka jaka ka thain shñiuh, ka jingdkhaw khlieh; bad ha ka jaka u panshadem, ka jingpanpoh byrni: ka jinging, ha ka jaka ka jingibhabriew.

²⁵ Ki rangbah jong pha kin kyllon da ka waitlam, bad ki bakhrawbor jong pha ha ka jingïaleh thma.

²⁶ Te ki khyrdop jong ka kin ud bad kin ïam; ka ruh kan long marwei bad kan shong ha ka khyndew.