ISAÏAH 2 - KA BAIBL

Ka jingbishar U Blei hapdeng ki jaid bynriew

¹ Ka ktien kaba u Isaïah u khun u Amos u la ïohi shaphang ka Judah bad ka Jerusalem.

² Te kan long ha ki sngi bakhatduh, ba yn pynskhem ïa u lum ka ïing U Trai ha kliar ki lum bah, bad yn pynkyntiew halor ki lum rit; bad ki jaid bynriew baroh kin tuid sha ka.

³ Shibun ki paidlang ruh kin leit bad kin ong, “Ïa, ngin ïakiew sha u lum U Trai, sha ka ïing U Blei u Jakob; te un hikai ïa ngi shaphang ki lynti jong u, bad ngin ïaid ha ki lynti ïaid jong u:” namar na Seïon kan mih noh ka hukum, bad ka ktien U Trai na Jerusalem.

⁴ Bad un bishar hapdeng ki jaid bynriew, bad un sneng shibun ki kynja bynriew: te kin shoh phar-lyngkor ïa la ki waitlam, bad ki wait tari ïa la ki sum: ka jaid bynriew kan ym rah ka waitlam ban ïaleh ïa ka jaid bynriew, lymne, kin ym hikai ïaleh thma shuh.

Ka jingbishar U Blei ïa kiba sarong

⁵ Ko ka ïing u Jakob, ale, to ngin ïaïaid ha ka jingshai U Trai.

⁶ Naba me la iehnoh ïa u paidlang jong me, ka ïing u Jakob, namar ki la dap da ki rukom na mihngi, bad ki long ki nongkren byrtong kum ki Philistia, bad ki ïathab kti bad ki khun ki nongwei.

⁷ Te ka ri jong ki ka dap da ka rupa bad ka ksiar, bad ym don jingkut ïa ki jingkynshew jong ki; ka ri jong ki, ka dap ruh da ki kulai, bad ym don jingkut ïa ki kali ïapom jong ki.

⁸ Bad ka ri jong ki, ka dap da ki bleithaw; ki ïamane ïa ka jingtrei ki kti jong ki hi, kaba ki shynriah'ti jong ki, ki la thaw.

⁹ Bad u riewpoh u dem, u riewkhraw ruh u leh poh: namar kata, wat map ïa ki.

¹⁰ To leit bsut sha u mawsiang, bad rieh ha ka 'dewmet, na khmat ka jingitieng U Trai, bad na ka burom ka jingkhraw jong u.

¹¹ Ïa ka jingkhmih basarong jong u briew yn pynpoh, bad ïa ka jingmeng ki briew yn pyndem, te tang ïa U Trai hi yn pynkyntiew ha kata ka sngi.

¹² Namar kan don ka sngi ïa U Trai ki paid halor kaba sarong bad kaba meng baroh, bad halor kaba la pynkyntiew baroh; te yn pynpoh ïa ka:

¹³ bad halor ki dieng Kedar u Lebanon, kiba hajrong bad kiba la pynkyntiew, bad halor ki dieng Sning ka Bashan baroh;

¹⁴ bad halor ki lum bah kiba jrong bad halor ki lum rit ba la pynkyntiew baroh;

¹⁵ bad halor ka kut bajrong baroh, bad halor ka kynroh ker baroh;

¹⁶ bad halor ki lieng bah ka Tarshish baroh, bad halor ki dur ba-itynnad baroh.

¹⁷ Te ïa ka jingsarong u briew yn pyndem, bad ïa ka jingmeng ki briew yn pynpoh: bad tang ïa U Trai hi yn pynkyntiew ha kata ka sngi.

¹⁸ Bad ki bleithaw kin jah noh phar.

¹⁹ Te ki briew kin rung sha ki krem ki mawsiang, bad sha ki thliew ka khyndew, na khmat ka jingitieng U Trai, bad na ka burom ka jingkhraw jong u, haba u khih ban pynkhynñiuh jur ïa ka khyndew.

²⁰ Ha kata ka sngi, u briew un bred noh ïa la ki bleithaw rupa, bad ïa la ki bleithaw ksiar, kiba ki la thaw ba un mane, ha ki kyndad bad ha ki lymbit;

²¹ ban rung sha ki krem ki mawsiang, bad sha ki ar khap mawsiang, na khmat ka jingitieng U Trai, bad na ka burom ka jingkhraw jong u, haba u khih ban pynkhynñiuh jur ïa ka pyrthei.

²² To wai noh phi na u briew uba ka mynsiem jong u ka don ha ki thliew khmut jong u: namar ha kano yn ñiewkor ïa u?