ISAÏAH 1 - KA BAIBL

Ka jaid bynriew bapop

¹ Ka jingithuhpaw u Isaïah u khun u Amos, kaba u la ïohi shaphang ka Judah bad ka Jerusalem, ha ki sngi u Ussiah, u Jotham, u Ahas, u Hesekaïah, ki syiem ka Judah.

² To sngap, ko bneng, bad shahshkor, ko khyndew, namar U Trai u la kren: “Nga la ri bad nga la pynsan ïa ki khun, te ki, ki la ïaleh pyrshah ïa nga.

³ U masi dab u ithuh ïa la u kynrad, bad u kadda ïa ka shyngoid u trai jong u; hynrei, u Israel um ithuh, u paidlang jong nga um ju pyrkhat.”

⁴ A ka jaid bynriew bapop, u paidlang ba la kit khia da ka bymhok, u symbai ki nongleh sniew, ki khun kiba pynsniew: ki la iehnoh ïa U Trai, ki la ibeiñ ïa uta u Bakhuid jong ki Israel, ki la ïakhlad noh shadien.

⁵ Na ka balei ban shoh shuh shuh ïa phi ba phi nang kham ïaleh pyrshah? Ka khlieh ka la pang baroh, bad ka dohnud ka sngewlwait baroh.

⁶ Naduh ka sla'jat wat haduh ka khlieh ym don jingshait ha ka; tang ki jingmong, bad ki jingjngem snam, bad ki thymmei ba-mih ksuit: ki bym pat bthei, bad ym shym la spaiñ, bad ym shym la pynjem ïa ki da ka umphniang.

⁷ Ka ri jong phi ka la kynjah; ïa ki shnong jong phi la thang da ka ding; ka khyndew jong phi, ki nongwei ki bam duh ïa ka ha khmat jong phi, bad ka la kynjah, kum ka jingpynjot thiaw da ki nongwei.

⁸ Te ïa ka khun ka Seïon la iehnoh kum ka sem ha ka brisoh, kum ka ïingtrep ha ka kper sohkhia, kum ka shnong ba la ker kut.

⁹ Lada U Trai ki paid um shym la pynsah i jingsah barit, ngin da la long kum ka Sodom, ngin da la syriem ïa ka Gomorra.

Ka jingkhot sha ka jingkylla-ka-bamut kaba shisha

¹⁰ To sngap ïa ka ktien U Trai, phi ki nongsynshar ka Sodom: shahshkor ïa ka hukum U Blei jong ngi, phi u paidbah ka Gomorra.

¹¹ “Ïa ka ban lei kine kiba bun ki jingkñia jong phi ïa nga?” ong U Trai: “nga la ngiah da ka jingainguh thang ki langbrot shynrang, bad ka khleiñ ki jingri basngaid; bad ngam sngewbha ha ka snam ki masi dab, lane ki khun langbrot, lane ki 'lang sohmoh.

¹² “Haba phi wan ban paw ha khmat jong nga, uei ba la pan ïa kane na ka kti jong phi, ban ïuh ïa ki phyllaw jong nga?

¹³ Wat wallam shuh ki jingai bathala; ka jingiwbih thang ka long kaba ijli ha nga; u 'nai thymmai bad ka Sabbaton, kaba khot jingïaseng, ngam lah shah ka jingbymhok bad ka jingïaseng bakyntang.

¹⁴ Ïa ki 'nai thymmai jong phi bad ïa ki Jingkhawai Niam ba la buh jong phi ka mynsiem jong nga ka isih: ki long ka jingshitom ïa nga; nga la thait ban shah ïa ki.

¹⁵ Te haba phi kner la ki kti, ngan buhrieh la ki khmat na phi: shisha keiñ, haba phi pynlong shibun ki jingduwai, ngan ym sngap: ki kti jong phi ki dap da ka snam.

¹⁶ To sait phi, pynkhuid ïa lade; bred noh ka jingsniew ki kam jong phi na khmat jong nga; iehnoh ïa kaba leh sniew:

¹⁷ to hikai ïa ka ban leh bha; wad ïa ka jingbishar, pyllait ïa uba la banbor, bishar ïa u khunswet, ïasaid na ka bynta ka riewkynthei.

¹⁸ “Ale te, to ngin ïasaid nia lem,” ong U Trai: “la ki pop jong phi ki long ki basaw hain hain, kin lieh kat ka ïor; la ki la saw bthuh, kin long kum u 'ñiuh langbrot.

¹⁹ Lada phi long kiba kloi bad ba kohnguh, phin bam ïa ka jingbha jong ka ri:

²⁰ hynrei, lada phi kyrngah bad ïaleh kiat, ka waitlam kan bam duh ïa phi: namar ka shyntur U Trai ka la kren ïa ka.”

Ka jingbishar bad ka jingsiewspah ïa ka Seïon

²¹ Kumno ka nongbah ba ju ïaineh ka la kylla long ka nuti! Kata keiñ kaba ju dap da ka jingbishar! Ka hok ka la ju shong basa ha ka, hynrei mynta, ki nongshohnoh.

²² Ka rupa jong pha ka la kylla eit-nar, ka Waiñ jong pha ka ïakhleh bad ka um.

²³ Ki nongsynshar jong pha ki leh kiat, bad ki long ki lok ki nongtuh; uwei uwei baroh u ieit kaba bamsap, bad u beh ïa ka myntoi; kim bishar ïa u khunswet, bad ka kam ka riewkynthei kam ju wan ha khmat jong ki.

²⁴ Namar kata, ong U Trai, U Trai ki paid, U Bakhrawbor jong ki Israel, “A, ngan pyntngen ïa lade halor ki nongïaleh pyrshah jong nga, bad ngan pynhiar kput halor ki nongshun jong nga:

²⁵ te ngan pynphai la ka kti halor jong pha, bad ngan pynphrang khuid ïa ka eit-nar jong pha, bad ngan shim noh ïa ka sador jong pha baroh:

²⁶ ngan ai pat ruh ïa ki nongbishar jong pha kum ha kaba mynnyngkong, bad ki nongïasylla jong pha kum mynshuwa: hadien kata, yn sa khot ïa pha, ‘ka shnong ka hok, ka nongbah baïaineh.’ ”

²⁷ Ïa ka Seïon yn siewspah da ka jingbishar, bad ïa ki nongwan phai jong ka da ka hok.

²⁸ Hynrei, ka jingpynjot ki nongpalat bad ki nongpop kan long lang, bad ïa kiba lyndet ïa U Trai yn pynduh.

²⁹ Namar kin sngewlehrain ïa ki dieng Sning kiba phi la ikwah, bad phin lyngngoh namar ki kper kiba phi la jied.

³⁰ Namar phin long kum u dieng Sning uba tlor noh ka sla, bad kum ka kper ka bymdon um.

³¹ Te u bakhlaiñ un long kum u 'saihon, bad ka kam jong u kum ka phylliah ding; kin ing lem baroh ar, bad ym don u ban pynlip.