HOSIA 9 - KA BAIBL

Ka jingpynshitom namar ka jinglong mutlop jong ki Israel

¹ “Wat shadkmen, ko Israel, ban kmen, kum kiwei ki kynja bynriew; namar pha la leit leh nuti na U Blei jong pha, pha la ieit ïa ka nong halor ka kyntem Kew baroh.

² Ka kyntem kba bad ka jingkhñiot umsoh Waiñ kin ym bsa ïa ki, bad ka 'iad rot kan duh ha ka.

³ Kin ym shong ha ka ri U Trai; hynrei, u Ephraim un leit phai sha Ijipt, bad kin bam ïa ka jingbam basang ha Assyria.

⁴ “Kin ym theh ïa ki jingainguh Waiñ ïa U Trai, lymne kin ym long kiba pynsngewbha ïa u: ki jingkñia jong ki kin long ha ki kum u kpu ki nongsngewsih: baroh kiba bam na ki kin long sang: namar u kpu jong ki un long tang ïa ki hi; un ym wan ha ka ïing U Trai.

⁵ “Phin leh kumno ha ka sngi ka jingïaseng niam, bad ha ka sngi Ka Jingkhawai jong U Trai?

⁶ Namar ha khmih, ki la leit noh na ka jingpynjot, hynrei, ka Ijipt kan ïalum lang ïa ki, ka Memphis kan tep ïa ki: ki jingdeng rupa ba pynsngewbha jong ki, ki teiñthap kin ïoh ïa ki: ki shiah kin long ha ki ïingjaiñ jong ki.

⁷ “Ki sngi ka jingwan-i ki la wan, ki sngi ka kput kylliang ki la wan; u Israel un tip ïa ka: U nongïathuhlypa u long u babieit, u briew uba ïoh mynsiem u lamwir, namar kaba bun ka jingleh bymhok jong me, bad namar kaba khraw ka jingshun.

⁸ U Ephraim u la long u nongap bad U Blei jong nga: u nongïathuhlypa ruh, ka jingriam u nongriam ka don ha ki lynti jong u baroh, bad ka jingshun ha ka ïing U Blei jong u.

⁹ Ki la pynsniew jur eh ïa lade, kum ha ki sngi Gibeah: un kynmaw ïa ka jingbymhok jong ki, un wan sneng ïa ki pop jong ki.

¹⁰ “Nga la shem ïa u Israel kum ki soh Waiñ ha ka ri khlaw; nga la ïohi ïa ki kpa jong phi kum u soh ih banyngkong ha u dieng Dumbur ha la ka aïom banyngkong: hynrei, ki la wan sha Baal-peor, bad ki la pynkyntang ïa lade sha kata ka jinglehrain, bad ki la kylla ijli kum kata hi kaba ki la ieit.

¹¹ Ïa u Ephraim ruh, ka burom jong u kan her noh kum ka sim: yn ym don kaba kha, yn ym don kaba pun, bad yn ym don kaba seng.

¹² La ki ri ïa la ki khun, te ngan pynduh noh ïa ki, ban ym pynsah briew uwei ruh: shisha ruh, kordit ïa ki haba ngan leit noh na ki!

¹³ Ïa u Ephraim, kumba nga la ïohi ïa ka Tyros, la thung ha ka jaka bapyngngad: hynrei, u Ephraim un wallam ïa la ki khun sha u nongpynïap.”

¹⁴ To ai ïa ki, A Trai: kaei ba men ai? ai ïa ki, ka kpoh ba hap khun bad ki jymbuiñ basdot.

¹⁵ “Ka jingbymman jong ki baroh ka long ha Gilgal; namar hangta nga la isih ïa ki: namar ka jingbymman ki jingleh jong ki ngan beh noh ïa ki na ka ïing jong nga: ngan ym ieit shuh ïa ki: ki rangbah jong ki baroh ki long ki nongïaleh pyrshah.

¹⁶ “Ïa u Ephraim la shoh, u thied jong ki u la tyrkhong, kin ym sei soh: shisha keiñ, la ki kha, ngan pynïap ïa u khun thep mynsiem jong ki.”

¹⁷ U Blei jong nga un bred noh ïa ki, namar kim shym la shahshkor ïa u: te kin long ki nongïaidwir hapdeng ki jaid bynriew.