HOSIA 8 - KA BAIBL

Ka jingbyrngem namar ka jingmane bleithaw jong ki

¹ “Buh ka ronsing ha ka shyntur. Kum ka pukni, u wan pyrshah ïa ka ïing U Trai: namar ki la ryngkang ïa ka jutang jong nga, bad ki la ïaleh pyrshah ïa ka hukum jong nga.

² Kin kyang ha nga, ‘Ko Blei jong nga, ngi ki Israel ngi ithuh ïa me.’

³ U Israel u la bred noh ïa ka babha: u nongshun un beh ïa u.

⁴ “Ki la thung ïa ki syiem, hynrei, ym da nga; ki la pynlong ïa ki rangbah, te ngam shym tip ïa kata: na ka rupa bad ka ksiar jong ki, ki la thaw bleithaw, khnang ban ot noh ïa ki.

⁵ U la bred noh ïa u khun masi jong phi, ko Samaria; ka jingbitar jong nga ka la meh pyrshah ïa ki: tad lano ba kin lah ban poi sha ka jinglui lui?

⁶ Namar na Israel ka leit long kane ruh; u bania u la thaw ïa ka, te kam long Blei: shisha keiñ, ïa u khun masi ka Samaria yn pynkheiñ lyngkhot lyngkhot.

⁷ “Namar ki bet ïa ka lyer, te kin ot ïa ka lyer langthari: um don u Kew baïeng; u speh un ym pynmih 'purew; lada u pynmih ruh, ki nongwei kin klun khoit ïa u.

⁸ Ïa u Israel la klun khoit: mynta ki long hapdeng ki jaid bynriew kum u khiew ha u bymdon jingsngewbha.

⁹ Namar ki la leit kiew sha Assyria, kum u kadda khlaw marwei hi: u Ephraim u la ai ïa ki jingai ieit.

¹⁰ Shisha keiñ, la ki wer hapdeng ki jaid bynriew, mynta, ngan ïalum lang ïa ki; ki ruh ki sdang ban nangrit na ka bynta ka jingkit u syiem ki rangbah.

¹¹ “Namar ba u Ephraim u la pynroi ïa ki duwan ïa ka ban leh pop, ki duwan ki la long ha u ban leh pop.

¹² La nga thoh ha u ïa ka aiñ jong nga ha ki shiphew hajar ki hukum, ïa ki, la ñiew kum kaei kaei kaba khyllah.

¹³ Te shaphang ki jingkñia ki jingainguh jong nga, ki kñia doh bad ki bam ïa ka; hynrei, U Trai um pdiang ïa ki: mynta, un kynmaw ïa ka jingleh bymhok jong ki, bad un wan-i ïa ki pop jong ki; kin leit phai sha Ijipt.

¹⁴ Namar u Israel u la klet ïa la U Nongthaw, bad u la tei ki ïingpaki baheh; u Judah ruh, u la pynroi ïa ki shnong ba la ker: hynrei, ngan phah ïa ka ding halor ki shnong jong u, te kan bam duh ïa ki kut jong ki.”