HOSIA 7 - KA BAIBL1 “Haba ngan sa pynkhiah ïa u Israel, la paw ka jingleh bymhok u Ephraim, bad ka jingbymman ka Samaria; namar ki leh lamler: te u nongtuh u bsut hapoh, bad ki paid nongtuh ki lute habar. 2 Kim pyrkhat ruh ha la ki dohnud ba nga kynmaw ïa ka jingbymman jong ki baroh: mynta, ki jingleh jong ki hi ki la ker kut ïa ki; ki don ha khmat jong nga. 3 Ki pynsngewbha ïa u syiem da la ka jingbymman, bad ïa ki rangbah da la ki jinglamler. 4 Ki long baroh ki nongklim; ki long kum ka pajwa ba la pynshit da u nongshet kpu; u wai noh ban tynruh, naduh ba la tylliat ïa u kpu haduh ba ka la sieb. 5 Ha ka sngi u syiem jong ngi, ki rangbah ki la pynpang ïa lade da ka jingshit Waiñ; u la kner ïa la ka kti bad ki nongrkhiebeiñ. 6 Namar ki la pynkhreh ïa la ka dohnud kum ïa ka pajwa, katba ki ïa-ap thap: u nongshet jong ki u ïohthiah baroh shi miet; mynstep ka ing kum ka thylliej ding kaba meh. 7 Ki baroh ki shit kum ka pajwa, bad ki bam duh ïa ki nongbishar jong ki; ki syiem jong ki baroh ki la kyllon: ym don uwei hapdeng jong ki uba khot kyrpad ïa nga. 8 “U Ephraim u pynïakhleh ïa lade hapdeng ki kynja bynriew; u Ephraim u long kum u kpu u bym shym la kylla. 9 Ki nongwei ki la bam duh ïa ka jingkhlaiñ jong u, te u, um tip; shisha keiñ, u 'ñiuhlieh u la thoh hangne hangtai ha u, te u, um tip ïa kata. 10 Bad ka jingsarong u Israel ka phla ha ka khmat jong u: pynban, kim shym la phai sha U Trai U Blei jong ki, lymne wad ïa u, ha kane baroh. 11 “Te u Ephraim u long kum ka paro babieit, khlem jingshemphang: ki khot kyrpad ïa ka Ijipt, ki leit ruh sha Assyria. 12 Haba kin sa leit, ngan pyiar la ka jar halor jong ki; ngan pynhiar ïa ki kum ki sim bneng: ngan sympat ïa ki, kumba ka jingïaseng jong ki ka la ïohsngew. 13 Kordit ïa ki! namar ki la ïaid sakma na nga; ka jingjot ha ki! namar ki la ïaleh pyrshah ïa nga: la nga da kwah ban siewspah ïa ki, pynban, ki la kren lamler pyrshah ïa nga. 14 “Kim shym la kyang ruh ha nga da la ka dohnud, hynrei, ki lynñiar halor la ki jingthiah: ki la ïaseng hi na ka bynta u Kew bad ka Waiñ, ki ïaleh pyrshah ïa nga. 15 La nga la hikai bad nga la pynkhlaiñ ïa ki ksang'ti jong ki, pynban, ki ïapyrkhat sniew pyrshah ïa nga. 16 Ki wan phai, hynrei, ym ha uta uba long hajrong; ki long kum ka ryntieh bashukor: ki rangbah jong ki kin kyllon da ka waitlam namar ka jingbitar u thylliej jong ki: kane kan long ka jingrkhiebeiñ ïa ki ha ka ri Ijipt.” |
The Bible Society of India
Bible Society of India