HOSIA 6 - KA BAIBL

¹ Ale, ïa ngin ïaphai sha U Trai: namar u la tar, te un pynkhiah ïa ngi; u la shoh, bad un sop spaiñ ïa ngi.

² Ynda la ar sngi un pynim pat ïa ngi: ha ka balai sngi un pynmih pat ïa ngi, te ngin im ha khmat jong u.

³ To ngin ithuh ruh, to ngin nang beh ban ithuh ïa U Trai; ka jingmih jong u ka skhem kum ka step: te un wan ha ngi kum u slap, kum u 'lap khatduh uba ai um ïa ka khyndew.

⁴ “Ko Ephraim, ïa-ei ngan leh ïa me? Ko Judah, ïa-ei ngan leh ïa me? naba ka jingbha jong phi ka long kum u lyoh step, bad kum ka umjer kaba duh noh shen.

⁵ Namar kata, nga la khet ïa ki da ki nongïathuhlypa; nga la pynïap ïa ki da ki ktien ka shyntur jong nga: bad ki jingbishar jong me ki long kum ka jingshai kaba leit mih noh.

⁶ Namar nga mon ïa ka jingisynei, te ym ïa ka jingkñia, bad ka jingtip ïa U Blei ban ïa ka jingainguh thang.

⁷ “Hynrei, ma ki, kum u Adam ki la ryngkang ïa ka jutang: hangta ki la shukor ïa nga.

⁸ Ka Gilead ka long ka shnong jong ki nongleh bymhok, ka la bit-tngit da ka snam.

⁹ Bad kumba ki paid nongtuh ki ap thap ïa u briew, kumta ruh ka kynhun ki lyngdoh ka shoh noh ha lynti sha Shekhem: shisha keiñ, ki la leh awria.

¹⁰ Ha ka ïing Israel nga la ïohi ïa kaei kaei kaba shyrkhei: hangta ka jingleh nuti ka don ha u Ephraim, u Israel u la bit-tngit.”

Ka jinglong kynriang bad jingïaleh pyrshah ki Israel

¹¹ “Ko Judah, don ruh ka aïom ot ba la buh ïa me, haba nga wallam pat ruh ïa ka jinglongmraw u paidlang jong nga.”