HOSIA 5 - KA BAIBL

Ki jingbishar U Blei ïa ki lyngdoh bad ki rangbah Israel

¹ “To sngew ïa kane, phi ki lyngdoh, bad to sngap, phi ka ïing Israel, bad to shahshkor, ko ïing u syiem, namar ha phi long ka jingbishar; namar phi la long ka jingriam ha Mispah, bad ka jar ba la phriang halor u Tabor.

² Te ki nongleh palat ki la kyrsum jyndei ha ka bymman; hynrei, nga uba sneng ïa ki baroh.

³ “Nga ithuh ïa u Ephraim, ïa u Israel ruh ym shym la buhrieh na nga: namar mynta, ko Ephraim, me la leh nuti, u Israel u la bit-tngit.

⁴ Ki jingleh jong ki kin ym shah ïa ki ban phai sha la U Blei: namar ka mynsiem ka jingleh nuti ka don hapoh jong ki, bad kim ithuh ïa U Trai.

⁵ “Te ka jingsarong u Israel ka phla ha ka khmat jong u: namar kata, u Israel bad u Ephraim kin jynthut ha la ka jingleh bymhok; u Judah ruh un jynthut lem bad ki.

⁶ Kin leit bad la ki kynhun lem bad la ki jingri ban wad ïa U Trai; te kin ym shem ïa u: u la kynriah na ki.

⁷ Ki la leh shukor ïa U Trai; namar ki la pynkha ïa ki khun nongwei: mynta u 'nai thymmai un sa bam duh ïa ki lem bad la ki lyngkha.

⁸ “Put ïa ka turoi ha Gibeah, bad ïa ka ronsing ha Ramah: pyrta maham ha Beth-aben; hadien jong me, ko Benjamin.

⁹ U Ephraim un long kynjah ha ka sngi ki jingsneng: hapdeng ki jaid Israel nga la pyntip ïa kata ka ban long skhem.

¹⁰ Ki rangbah Judah ki long kum kita kiba pynkynriah pud: ngan theh noh ïa la ka jingbitar halor jong ki, kum ka um.

¹¹ Ïa u Ephraim la banbor, la tylliat ruh ha ka jingbishar; namar u la mon ban leit bud ïa kaba thala.

¹² Namar kata, nga, nga long kum u khñiang ha u Ephraim, bad kum ka jingpyut ha ka ïing Judah.

¹³ “Haba u Ephraim u la ïohi ïa la ka jingpang, bad u Judah u la ïohi ïa la ka jingmong, hangta u Ephraim u la leit sha Assyria, bad u la phah sha u syiem Jareb: hynrei, u, um lah pynkhiah ïa phi, lymne un ym pynkoit ïa phi na ka jingmong jong phi.

¹⁴ Namar nga, ngan long kum u sing ha u Ephraim, bad kum u sing samla ha ka ïing Judah: nga, ngan tar bad ngan leit noh; ngan rong noh, te yn ym don u ban pyllait.

Ka jingkyntu ban kylla-ka-bamut

¹⁵ “Ngan leit phai noh pat sha la ka jaka, tad ynda ki phla ïa la ka pop, bad ki wad ïa ka khmat jong nga: ha ka jingjynjar jong ki kin wad dik dik ïa nga.”