HOSIA 4 - KA BAIBL

Ka jingïasaid U Trai bad la ki paidlang

¹ To sngew ïa ka ktien U Trai, phi ki khun Israel: “namar U Trai u don ka jingïasaid bad kiba shong ha ka ri, namar ym don jingshisha, lymne jingisynei, lymne jingtip ïa U Blei ha ka ri.

² Don tang kaba smai bad kaba shukor, bad kaba pynïap, bad kaba tuh, bad kaba klim; ki mih, bad ka snam ka kynroi ïa ka snam.

³ Namar kata, ka ri kan sa ïambriew, bad uba shong ha ka baroh un sdot noh, lem bad ki mrad khlaw bad ki sim bneng; shisha keiñ, ïa ki dohkha ka duriaw ruh yn shim noh.”

⁴ “Pynban, uno uno to un ym ïaleh, lymne uno uno un ym sneng: namar u paidlang jong me u long kum kita kiba ïaleh ïa u lyngdoh.

⁵ Te men jynthut mynsngi, bad u nongïathuhlypa ruh un jynthut bad me mynmiet: ngan pynjot noh ruh ïa ka kmie jong me.

⁶ Ïa u paidlang jong nga la pynjot namar bymdon jingtip; namar ba me la kyntait ïa ka jingtip, nga ruh ngan kyntait ïa me, ba men ym long lyngdoh satia ha nga: naba me la klet ïa ka hukum U Blei jong me, nga ruh ngan klet ïa ki khun jong me.

⁷ “Katba ki la nang roi ruh, ki la nang leh pop ïa nga: ngan pynkylla ïa ka burom jong ki sha ka jinglehrain.

⁸ Ki bam kdang na ka pop u paidlang jong nga, bad ki buh ïa la ka dohnud sha la ka jingleh bymhok.

⁹ Te kan long, kum u paidlang kumta ruh u lyngdoh: te ngan pynshitom ïa ki namar ki lynti jong ki, bad ngan ai nong ïa ki, ïa ki jingleh jong ki.

¹⁰ Te kin bam, hynrei, kin ym kdang; kin leh nuti, hynrei, kin ym roi: namar ki la iehnoh ban kohnguh ïa U Trai.

¹¹ Ka jingleh nuti bad ka Waiñ bad ka 'iad rot ki rong noh ïa ka dohnud.

¹² U paidlang jong nga u ïaikylli ha la u dieng, bad u diengduh jong ki u ïathuh ha ki: namar ka mynsiem ka jingleh nuti ka la pynbakla ïa ki, bad ki la ïaid nuti napoh la U Blei.

¹³ Ki kñia ha kliar ki lum bah, bad ki thang jingiwbih halor ki lum rit, hapoh ki dieng Sning bad ki dieng Poplar bad ki dieng Terebinth, naba ka syrngiew jong kita ka bha: Namar kata, ki khun kynthei jong phi, ki leh nuti, bad ki nongleit-kurim jong phi, ki klim.

¹⁴ Ngan ym pynshitom ïa ki khun kynthei jong phi, haba ki leh nuti, lymne ïa ki nongleit-kurim jong phi, haba ki klim; namar ki hi ki leit kyrpang bad ki nuti, bad ki ïakñia lem bad ki: te ïa u paidlang u bymshemphang yn pynkyllon.

¹⁵ “La me, Israel, me leh nuti, hynrei, wat ai ba ka Judah kan leh palat; wat wan phi sha Gilgal ruh, lymne wat kiew sha Beth-aben, lymne wat smai, ‘Katba im U Trai.’

¹⁶ Namar, u Israel u la leh mutlop ïa lade kum ka masi lud bamutlop: hynrei, mynta U Trai un bsa ïa ki kum ïa u khun langbrot ha ka jaka kylluid.

¹⁷ “U Ephraim u la ïasoh sha ki bleithaw; iehnoh ïa u.

¹⁸ Ka jingdih jong ki, ka la jew: ki ïai-leh nuti; ki nongsynshar jong ki, ki ieit eh ïa ka jinglehrain.

¹⁹ Ka lyer ka la kli ïa ka ha la ki thapniang; te yn pynlehrain ïa ki namar la ki jingkñia hi.”