HOSIA 3 - KA BAIBL

U Hosia bad ka nongklim

¹ Te U Trai u la ong ha nga, “Nang leit, ieit ïa ka briew ba la ieit da u lok jong ka bad kaba klim ruh, kat kumba U Trai u ieit ïa ki khun Israel, la ki phai sha kiwei pat ki blei, bad ki brai ki kpu soh Khajur.”

² Kumta, nga la thied ïa ka ha lade, khatsan ki sbai rupa, bad shi homar u Kew Barli, bad shi lethek u Kew Barli:

³ nga la ong ha ka ruh, “Phan ïai-ap ïa nga bun sngi; phan ym leh nuti, bad phan ym long ka tnga uwei pat: kumta, nga ruh ngan long ha pha.”

⁴ Namar ki khun Israel kin ïaisah bun sngi khlem syiem, bad khlem rangbah, bad khlem jingkñia, bad khlem mawblei, bad khlem ephod lane teraphim:

⁵ hadien kata, ki khun Israel kin sa phai, bad kin sa wad ïa U Trai U Blei jong ki, bad ïa u Dabid u syiem jong ki de; te kin sa wan da ka jingsheptieng ha U Trai bad ha ka jinglehsbun jong u ha ki sngi ki bakhatduh.