HOSIA 2 - KA BAIBL

Ka jingbishar U Blei ïa la u paidlang

¹ “To ong ha la ki para shynrang, ‘Ammi’; bad ha la ki para kynthei, ‘Ruhamah’.

² “Kyrpad ïa la ka kmie, to kyrpad; namar kam long ka tnga jong nga, lymne ngam long u tnga jong ka: bad to kan bred noh ïa la ki jingklim na khmat jong ka, bad ïa ki jingleh nuti jong ka napdeng ki jymbuiñ jong ka;

³ ïoh ngan pynlyngkhuit ïa ka, bad buh ruh ïa ka kum ha kata ka sngi ba la kha ïa ka, ba ngan pynlong ruh ïa ka kum ka ri bakynjah, bad buh ïa ka kum ka ri ryngkhiang, bad pynïap ïa ka, da ka jingsliang;

⁴ shisha, ngan ym isynei ïa ki khun jong ka ruh; namar ki long ki khun jong ki jingklim.

⁵ Namar ka kmie jong ki ka la leh nuti: kata kaba la pun ïa ki, ka la leh khlem rain: namar ka la ong, ‘Ngan leit bud ïa ki ba-ieit jong nga, kiba ai ïa nga la u kpu bad la ka um, la u 'saiwul bad la u 'saihon, la ka umphniang bad la ki jingdih.’

⁶ Namar kata, ha khmih, ngan khang ïa ka lynti jong pha da ki shiah, bad ngan kynroh pyrshah ïa ka, ba kan ym shem ïa la ki lynti ïaid.

⁷ Te kan bud ïa ki ba-ieit jong ka, hynrei, kan ym lap ïa ki; kan wad ruh ïa ki, hynrei, kan ym shem: te kan sa ong, ‘Ngan leit phai sha la u tnga trai; namar myn ha kata ka la long kham bha bad nga ban ïa mynta.’

⁸ Naba kam shym la tip ba nga, nga la ai ha ka, ïa u Kew, bad ka Waiñ, bad ka umphniang, bad ba nga la pynroi ha ka, ïa ka rupa bad ka ksiar, ïa kiba ki la pynlong ki durblei Baal.

⁹ Namar kata, ngan shim pat ïa la u Kew ha ka por jong u, bad ïa la ka Waiñ ha ka aïom jong ka, bad ngan shim noh ïa la u 'saiwul bad ïa la u 'saihon kiba dei ban tap ïa ka jinglyngkhuit jong ka.

¹⁰ Mynta te, ngan thad ïa ka rain jong ka ha khmat ki ba-ieit jong ka, yn ym don ruh u ban pyllait ïa ka na ka kti jong nga.

¹¹ Te ngan pynkut noh ïa ka jingkmen jong ka baroh, ïa ki jingkhawai jong ka, ïa ki 'nai thymmai jong ka, bad ïa ki Sabbaton jong ka, bad ïa Ki Jingkhawai Niam jong ka baroh.

¹² Bad ngan pynlong khlaw ïa ki dieng Waiñ jong ka bad ïa ki dieng Dumbur jong ka, ïa kiba ka la ong, ‘Kine ki long ki bainong jong nga ba ki ba-ieit jong nga ki la ai ïa nga:’ te ngan pynlong khlaw ïa ki bad ki mrad khlaw kin bam ïa ki.

¹³ Bad ngan pynhap kput halor jong ka, ïa ki sngi ki Baal, ha kiba ka la thang jingiwbih; haba ka la pyndeng ïa lade da la ki sohshkor bad da la ki jingdeng, bad ka la leit bud ïa la ki ba-ieit, ka la klet ïa nga ruh,” ong U Trai.

¹⁴ “Namar kata, ha khmih, ngan ring pah ïa ka, bad ngan wallam ïa ka sha ka ri kynjah, ngan kren sngewbha ruh ha ka.

¹⁵ Te ngan ai ha ka, ïa ki brisoh Waiñ jong ka nangta, bad ïa Ka Them Akhor ban long ka khyrdop ka jingkyrmen: kan phai ktien hangta ruh, kumba ha ki sngi ka jinglong samla jong ka, bad kumba ha ka sngi ba ka la wan kiew na ka ri Ijipt.

¹⁶ “Te kan long ha kata ka sngi,” ong U Trai, “ba phan khot ïa nga, ‘Ishi’; bad phan ym khot shuh ïa nga, ‘Baali’.

¹⁷ Naba ngan shim noh ïa ki kyrteng jong ki Baal na ka shyntur jong ka, te yn ym ïalap shuh ïa ki kyrteng jong ki.

¹⁸ Te ha kata ka sngi, ngan pynlong ka jutang na ka bynta jong ki bad ki mrad khlaw, bad ki sim bneng, bad ki kynja bapar jong ka khyndew: ngan pynkheiñ ruh ïa ka ryntieh bad ïa ka waitlam bad ïa ka thma na ka ri, bad ngan pynthiah suk ïa ki.

¹⁹ Ngan ïatehktien ruh ïa pha ha nga junom; shisha keiñ, ngan ïatehktien ïa pha ha nga ha ka hok, bad ha ka jingbishar, bad ha ka jingieit, bad ha ki jingleh isynei.

²⁰ Ngan ïatehktien ruh ïa pha ha nga ha ka jingïaineh: te phan ithuh ïa U Trai.

²¹ “Te kan long ha kata ka sngi, ngan phai ktien,” ong U Trai, “ngan phai ktien ïa ki bneng, ki ruh kin phai ktien ïa ka khyndew;

²² bad ka khyndew kan phai ktien ïa u Kew, bad ïa ka Waiñ, bad ïa ka umphniang; ki ruh kin phai ktien ïa ka Jesril.

²³ Bad ngan bet ïa ka ha nga ha ka khyndew; te ngan isynei ïa ka bym shym la ïoh jingisynei; ngan ong ruh ha kita ki bym shym la long u paidlang jong nga, ‘Me long u paidlang jong nga;’ ki te kin ong, ‘Me long U Blei jong nga.’ ”