HOSIA 1 - KA BAIBL

Ka tnga ki jingklim bad ki khun ka jingklim u Hosia

¹ Ka ktien U Trai kaba la wan ha u Hosia u khun u Beeri, ha ki sngi jong u Ussiah, u Jotham, u Ahas, bad u Hesekaïah, ki syiem ka Judah, bad ha ki sngi jong u Jeroboam u khun u Joash, u syiem ki Israel.

² Haba U Trai u la kren ha kaba nyngkong bad u Hosia, U Trai u la ong ha u Hosia, “Khie leit, shim ha me ka tnga ki jingklim bad ki khun ki jingklim: namar ka ri ka klim shibun eh, ka da iehnoh ïa U Trai.”

³ Kumta, u la leit bad u la shim ïa ka Gomer ka khun u Diblaim; ka la pun ruh, bad ka la kha u khun ïa u.

⁴ Te U Trai u la ong ha u, “Khot kyrteng ïa u, ‘Jesril’; namar sa tang katto katne ngan pynhiar kput ïa ka snam Jesril halor ka ïing u Jehu, bad ngan pynduh noh ïa ka hima na ka ïing Israel.

⁵ Te kan long ha kata ka sngi, ba ngan pynkheiñ ïa ka ryntieh ki Israel ha Ka Them Jesril.”

⁶ Ka la pun pat ruh, bad ka la kha ka khun. Te U Trai u la ong ha u, “Khot kyrteng ïa ka, ‘Lo-ruhamah’: namar ngan ym isynei shuh ïa ka ïing Israel ba ngan dang map ïa ki.

⁷ Hynrei, ngan isynei ïa ka ïing Judah, bad ngan pynim ïa ki da U Trai U Blei jong ki, te ngan ym pynim ïa ki da ka ryntieh, lymne da ka waitlam, lymne da ka thma, da ki kulai, lymne da ki nongshong kulai.”

⁸ Te haba ka la pyniehnoh buiñ ïa ka Lo-ruhamah, ka la pun bad ka la kha u khun.

⁹ Te U Trai u la ong, “Khot kyrteng ïa u, ‘Lo-ammi’: namar phi phim long u paidlang jong nga, nga ruh ngan ym long U Blei jong phi.”

¹⁰ Pynban, ka jingkheiñ ki khun Israel kan long kum u shyiap ka duriaw, u bym lah ban thew lymne ñiew; kan long ruh, ba ha ka jaka ha kaba la ong ha ki, “Phi phim long u paidlang jong nga”, yn ong ha ki, “Phi long ki khun shynrang U Blei u ba-im”.

¹¹ Bad ïa ki khun u Judah bad ïa ki khun u Israel yn ïalum lang, kin thung ruh ïa lade uwei u rangbah, bad kin leit kiew noh na ka ri: namar kaba khraw kan long ka sngi Jesril.