HEBRU 4 - KA BAIBL

¹ Namar kata, to ngin sheptieng, haba dang sah ka jingkular ban leit bsut sha ka jingjahthait jong u, ïoh kumno re kumno uno uno na phi un imat ban ym kot sha ka.

² Namar shisha, ha ngi ruh la ïalap ïa ka gospel kumba ha kita ruh; hynrei, kata ka ktien ba la ïohsngew kam shym pynmyntoi ïa ki, namar ym shym la khñiot lang ïa ka bad ka jingngeit ha kita kiba la ïohsngew.

³ Namar ngi kiba la ngeit, ngi leit bsut sha kata ka jingjahthait; kumba u la ong: “Kumba nga la smai ha ka jingbitar jong nga, ‘kin ym ïoh leit bsut shuh sha kata ka jingjahthait jong nga,’ ” la ka long ba la pyndep ïa kita ki kam naduh ba la seng nongrim ïa ka pyrthei.

⁴ Namar u la ong ha kawei ka jaka shaphang ka sngi ka bahynñiew kumne: “Bad U Blei u la shong sngi noh ha ka sngi ka bahynñiew na ki kam jong u baroh.”

⁵ Bad hangne pat: “Kin ym ïoh leit bsut shuh sha kata ka jingjahthait jong nga.”

⁶ Namar kata, haba ïohi ba ka sah ba don kiba leit bsut ha ka, hynrei, ba kita ha kiba la ïalap ïa ka gospel mynshuwa kim lah ban leit bsut, namar ka jingbymngeit;

⁷ pat u buh kawei ka sngi, u da ong ha u Dabid, ynda la slem katta: “Mynta ka sngi,” kumba la lah ong mynshuwa, “Mynta ka sngi, lada phin ïohsngew ïa ka ktien jong u, to wat pyneh ïa ki dohnud jong phi.”

⁸ Namar lada u Joshua u la lah ai ka jingshongthait ïa ki, un ym da la kren hadien kata, shaphang kawei pat ka sngi.

⁹ Namar kata, ka dang sah ka jingshongthait ka Sabbaton ïa u paidlang U Blei.

¹⁰ Namar uta uba la leit bsut sha ka jingjahthait jong u, u hi ruh, u la shongthait na ki kam jong u, kumba U Blei u la leh na kita ki jong u.

¹¹ Namar kata, to ngin ïaiminot ban leit bsut sha kata ka jingjahthait, ïoh ba uno uno ruh un hap ha kata kajuh ka rukom ka jingbymkohnguh.

¹² Namar ka ktien U Blei ka long kaba im, bad kaba don bor, bad kaba kham nep ban ïa kano kano ka waitlam ar liang syrti, bad kaba pei haduh kaba pynkhlad ïa ka jingim bad ïa ka mynsiem, ïa ki mat bad ïa ka khleiñ shyieng ruh, bad kaba bishar ïa ki jingmut bad ïa ki jingthmu ka dohnud.

¹³ Bad ym don ka jingthaw ba khlem paw ha khmat jong u; hynrei, kiei kiei baroh ki long lyngkhuit bad kiba paw pyrshah ha ki khmat jong u, bad uba ngi ïadonkam.

U Jisu U Rangbah Lyngdoh

¹⁴ Namar kata, haba ngi don U Rangbah lyngdoh Bakhraw uba la leit lyngba ïa ki bneng, U Jisu U Khun U Blei, to ngin ïabat skhem ïa la ka jingphla.

¹⁵ Namar ngim don u Rangbah lyngdoh u bym lah ban ïasngewlem bad ki jingtlot jong ngi; hynrei, ïa uba la pynshoi ha kiei kiei baroh syriem ïa ngi, hynrei, khlem pop.

¹⁶ Namar kata te, to ngin ïawan hajan da ka jingshlur ha ka khet ka jingaiei, ba ngin ïoh pdiang ka jingisynei, bad ba ngin ïoh shem ka jingaiei ïa ka ban ïarap ïa ngi ha ka por ba-donkam.