HEBRU 3 - KA BAIBL

U Khrist u long kham khraw ban ïa u Moses

¹ Naba kumta, ko parabangeit bakhuid, ki nongïoh bynta na ka jingkhot bakynja bneng, to phin pyrkhat ïa u Apostol bad U Rangbah lyngdoh ka jingphla jong ngi, U Jisu keiñ;

² uba long uba ngeit ha uta uba la thung ïa u, kumba u Moses ruh u la long ha ka ïing jong u baroh.

³ Namar la ñiew ba ka dei ïa une ban ïoh ka burom kaba kham khraw ban ïa u Moses, kumjuh kumba uta uba thaw ïa ka ïing u ïoh ka burom kaba kham khraw ban ïa kata ka ïing.

⁴ Namar ïa ka ïing baroh la thaw dano dano ruh; hynrei, uta uba la thaw ïa kiei kiei baroh long U Blei keiñ.

⁵ Te u Moses shisha u la long uba ïaineh ha ka ïing jong u baroh kum u shakri, ïa ka ban phla ïa kita kiei kiei ruh ïa kiba yn kren hadien;

⁶ hynrei, U Khrist kum U Khun halor ka ïing jong u hi, ka ïing jong uba ngi long ma ngi, lada ngi ïaibat skhem ïa ka jingshaniah jong ngi bad ïa ka jingkmen ka jingkyrmen jong ngi haduh ka bakut.

Ka jingjahthait ïa ki briew jong U Blei

⁷ Naba kumta, kumba U Mynsiem Bakhuid u ong: “Ha kane ka sngi, lada phin sngew ïa ka ktien jong u,

⁸ wat pyneh ïa ki dohnud jong phi, kumba ha kata ka jingpynkhih bitar, kum ha kata ka sngi ka jingtynjuh ha ka ri khlaw,

⁹ ha kaba ki kpa jong phi ki la ïapynkhih bitar ïa nga, ki la ïatynjuh ïa nga, bad ki la ïohi ïa ki kam jong nga sawphew snem.

¹⁰ Naba kumta, nga la sngewsih sat ïa kane ka pateng bynriew, bad nga la ong, ‘Ha la ka sngi, ki bakla ha la ka dohnud; hynrei, ki, kim shym la ithuh ïa ki lynti jong nga.’

¹¹ Kumta, nga la smai ha ka jingbitar jong nga: ‘Kin ym ïoh leit bsut sha ka jingjahthait jong nga.’ ”

¹² To sumar, ko parabangeit, ïoh ba kumno re kumno kan don hano hano na phi ka dohnud basniew ka jingbymngeit, ha ka ban phai dien noh na U Blei ba-im.

¹³ Hynrei, to ïakyntu paralok ha la ka sngi, katba dang khot “Mynta ka sngi” ïa ka; ba yn ym pyneh ïano ïano ruh na phi da ka jingshukor ka pop.

¹⁴ Namar ngi la jia long ki nongïoh bynta na U Khrist, lada ngin ïaibat skhem ïa kata ka basdang ka jingshaniah jong ngi haduh ka bakut;

¹⁵ katba dang ong, “Mynta ka sngi, lada phin ïohsngew ïa ka ktien jong u, to wat pyneh ïa ki dohnud jong phi, kumba ha kata ka jingpynkhih bitar.”

¹⁶ Namar kino kita, kiba, haba ki la ïohsngew, ki la pynkhih bitar ïa u? Hato kita baroh kiba la mih noh na Ijipt da u Moses kim shym leh?

¹⁷ Badno te u la sngewsih sat sawphew snem? Ym bad kita kiba la leh pop, kiba ki metïap jong ki, ki la ïakyllon ha kata ka ri khlaw?

¹⁸ Ha kino ruh u la smai ba kin ym ïoh leit bsut sha kata ka jingjahthait jong u, hynrei, tang ha kita keiñ ki bym shym kohnguh?

¹⁹ Te kumta, ngi ïohi ba kim lah shuh ban leit bsut shapoh namar ka jingbymngeit keiñ.