HAGGAI 2 - KA BAIBL

Ka burom jong ka templ ka bathymmai

¹ Ha u bahynñiew u bnai, ha ka ba-arphew wei ka sngi jong uta u bnai, ka la wan ka ktien U Trai da u Haggai u nongïathuhlypa, ka da ong,

² “To kren te ha u Serubbabel u khun u Shealtiel, u nongsynshar ki Judah, bad ha u Joshua u khun u Jehosadak, u rangbah lyngdoh, bad ha kiba dang sah jong u paidbah, da kaba ong,

³ ‘Sah sa mano hapdeng jong phi uba la ïohi ïa kane ka ïing ha ka burom jong ka, kaba mynshuwa? bad phi ïohi ïa ka kumno mynta? hato kam long ei ei ruh em ha khmat jong phi?

⁴ La kumta ruh, to pynkhlaiñ ïa lade, ko Serubbabel,’ ong U Trai; ‘bad to pynkhlaiñ ïa lade, ko Joshua u khun u Jehosadak, u rangbah lyngdoh; bad to pynkhlaiñ ïa lade, phi ki briew jong ka ri baroh,’ ong U Trai, ‘bad to trei: naba nga don lem bad phi,’ ong U Trai ki paid,

⁵ ‘katba kum kata ka ktien ïa kaba nga la teh jutang bad phi mynba phi la mih noh na Ijipt, bad ka mynsiem jong nga ka shong hapdeng jong phi: wat sheptieng phi.’

⁶ Naba kumne u ong U Trai ki paid: ‘Sa shi sien pat, sa shibit eh, te ngan pynkhih ïa ki bneng bad ïa ka khyndew, bad ïa ka duriaw, bad ïa ka 'dewrkhiang;

⁷ bad ngan pynkhih ïa ki jaid bynriew baroh, bad kiei kiei kiba ñiewkor jong ki jaid bynriew baroh kin ïawan, bad ngan pyndap ïa kane ka ïing da ka burom,’ ong U Trai ki paid.

⁸ ‘Ka rupa ka long ka jong nga, bad ka ksiar ka jong nga,’ ong U Trai ki paid.

⁹ ‘Ka burom ka bakhatduh jong kane ka ïing kan long kham khraw ban ïa kaba mynshuwa,’ ong U Trai ki paid: ‘bad ha kane ka jaka ngan ai ka jingsuk,’ ” ong U Trai ki paid.

U Haggai u sneng ïa ki paidbah namar ki pop jong ki

¹⁰ Ha ka ba-arphew saw sngi u bnai bakhyndai, ha ka snem ka ba-ar jong u Daraïos, ka la wan ka ktien U Trai da u Haggai u nongïathuhlypa, ka da ong,

¹¹ “Kumne u ong U Trai ki paid: ‘To kylli mynta ïa ki lyngdoh shaphang ka hukum, da kaba ong,

¹² “Lada uno uno un rah ïa ka doh kyntang ha ka rmiang ka jaiñkup jong u, bad da kata ka rmiang jaiñ u ktah ïa u kpu, lane ka jingshet syrwa, lane ka Waiñ, lane ka umphniang, lane kano kano ka jingbam, kata kan kylla kyntang ne em?” Te kita ki lyngdoh ki la ïathuh bad ki la ong, “Em.” ’ ”

¹³ Ynda kumta, u Haggai u la ong, “Lada uno uno u bymkhuid na ka metïap u ktah ïa kawei na kine, kata kan long bymkhuid ne em?” Te kita ki lyngdoh ki la ïathuh bad ki la ong, “Kan long bymkhuid keiñ.”

¹⁴ Hangta u Haggai u la ïathuh bad u la ong, “Kumta keiñ, long une u paidbah, bad kumta long kane ka jaid bynriew ha khmat jong nga,” ong U Trai; “bad kumta ka long baroh ka kam ki kti jong ki; bad kata kaba ki ainguh hangta ka long bymkhuid.

¹⁵ Mynta te, nga kyrpad ïa phi, to pyrkhat naduh kane ka sngi bad mynshuwa, naduh ba ym pat seng ïa u maw halor u maw ha ka templ U Trai:

¹⁶ ha kata ka por baroh, haba ju wan sha ka kynton Kew ka ba-arphew shang, ki la don tang shiphew; haba ju wan sha ka kor pdiang Waiñ ban long sanphew khiew, la don tang arphew pynban.

¹⁷ Nga la shoh ïa phi da ka jingpynsep bad da kaba bam khñiang bad da u phria ha baroh ka kam ki kti jong phi; pynban, phim shym phai sha nga,” ong U Trai.

¹⁸ “To pyrkhat, nga kyrpad ïa phi, naduh kane ka sngi bad mynshuwa, naduh ka ba-arphew saw ka sngi jong u bnai bakhyndai, naduh kata ka sngi ba la seng ïa ka nongrim ka templ U Trai, to pyrkhat ïa kane.

¹⁹ U symbai u dang don ha ka thiar? u dieng Waiñ ruh, bad u dieng Dumbur, bad u dieng soh Pong, bad u dieng Olib kim shym la sei soh; naduh kane ka sngi ngan kyrkhu ïa phi.”

Ka jingkular U Blei ïa u Serubbabel

²⁰ Bad ka ktien U Trai ka la wan ka ba-ar sien ha u Haggai ha ka ba-arphew saw ka sngi jong u bnai, da kaba ong,

²¹ “To kren ha u Serubbabel, u nongsynshar ki Judah, da kaba ong, ‘Ngan pynkhih ïa ki bneng bad ïa ka khyndew:

²² bad ngan pynkyllon ïa ka khet ki hima, bad ngan pynduh ïa ka bor ki hima jong ki jaid bynriew; bad ngan pynkyllon ïa ki kali ïapom, bad kita kiba shong ha ki; bad ki kulai bad la ki nongshong kin ïakyllon, uwei pa uwei na ki da ka waitlam u para jong u.

²³ Ha kata ka sngi,’ ” ong U Trai ki paid, “ngan shim ïa me, ko Serubbabel, u shakri jong nga, u khun u Shealtiel,” ong U Trai, “bad ngan pynlong ïa me kum ka 'sah shab: naba nga la jied ïa me,” ong U Trai ki paid.