HAGGAI 1 - KA BAIBL

Kaba kyntu ïa u paidbah ban tei ïa ka templ

¹ Ha ka snem ka ba-ar jong u syiem Daraïos, ha u bnai bahynriew, ha ka sngi ka banyngkong uta u bnai, ka ktien U Trai ka la wan da u Haggai u nongïathuhlypa ha u Serubbabel u khun u Shealtiel, u nongsynshar ki Judah, bad ha u Joshua u khun u Jehosadak, u rangbah lyngdoh, ka da ong,

² “Kumne u kren U Trai ki paid, u da ong, ‘Une u paidbah u ong, “Ka por kam pat poi, ka por ïa ka ban tei ïa ka ïing U Trai.” ’ ”

³ Ynda kumta, ka la wan ka ktien U Trai da u Haggai u nongïathuhlypa, ka da ong,

⁴ “Hato ka long ka por ïa phi hi ban shong ha la ki ïing ba la ker lyntang, haba kane ka ïing ka long ka ïingjah?”

⁵ Namar kata te, kumne u ong U Trai ki paid: “To pyrkhat phi ïa la ki lynti.

⁶ Phi la bet shibun, te phi la lum khyndiat: phi bam, hynrei, phim kdang; phi dih, hynrei, phim jah sliang; phi pynkup ïa lade, hynrei, ym don uba syaid; bad uta uba ïoh bainong u ïoh bainong tang ban buh ha ka pla ba pei thliew.”

⁷ Kumne u ong U Trai ki paid: “To pyrkhat phi ïa la ki lynti.

⁸ To kiew sha u lum, bad to wallam ki dieng, bad to tei ïa kane ka ïing; te ngan sngewbha ha ka, bad yn pyndonburom ïa nga,” ong U Trai.

⁹ “Phi la khmih lynti ban ïoh shibun, te ha khmih, ka long khyndiat; bad haba phi la wallam ïa kata ha ïing, nga la pyrsad halor jong ka. Namar balei?” ong U Trai ki paid. “Namar ka ïing jong nga kaba long ka ïingjah, haba phi, phi phet uwei pa uwei na phi sha la ka jong ka ïing.

¹⁰ Namar kata, la khang ïa ka umjer ka bneng namar jong phi, bad la khang ïa u soh jong ka khyndew.

¹¹ Bad nga la phah khot ïa kaba rang ryngkhiang halor ka khyndew, bad halor ki lum, bad halor u Kew, bad halor ka Waiñ, bad halor ka umphniang, bad halor kata kaba ka khyndew ka pynmih, bad halor u briew, bad halor ki jingri, bad halor ka jingtrei ki kti baroh.”

¹² Ynda kumta, u Serubbabel u khun u Shealtiel, bad u Joshua u khun u Jehosadak, u rangbah lyngdoh, lem bad kiba dang sah na u paidbah, ki la kohnguh ïa ka ktien U Trai U Blei jong ki, bad ïa ki ktien u Haggai u nongïathuhlypa, kumba U Trai U Blei jong ki u la phah ïa u; bad u paidbah u la sheptieng ha khmat U Trai.

¹³ Ynda kumta, u Haggai u nonglam-ktien U Trai u la kren ha kata ka jingphah ktien U Trai ha u paidbah, u da ong, “Nga don lem bad phi,” ong U Trai.

¹⁴ Bad U Trai u la pynkhih ïa ka mynsiem u Serubbabel u khun u Shealtiel, u nongsynshar ki Judah, bad ïa ka mynsiem u Joshua u khun u Jehosadak, u rangbah lyngdoh, bad ïa ka mynsiem jong kita kiba dang sah jong u paidbah; te ki la wan bad ki la trei ha ka ïing U Trai ki paid, U Blei jong ki,

¹⁵ ha ka ba-arphew saw ka sngi jong uta u bnai u bahynriew keiñ, ha ka snem ka ba-ar jong u syiem Daraïos.