ESRA 3 - KA BAIBL

Kaba tei pat ïa ka duwan

¹ Te haba la poi u bnai u bahynñiew, bad ki khun Israel ki la don ha kita ki shnong, u paidbah u la ïalum lang baroh kawei sha Jerusalem.

² Te ki la ïeng u Jeshua u khun u Josadak, bad ki para jong u ki lyngdoh, bad u Serubbabel u khun u Shealtiel, bad ki para jong u, bad ki la tei ïa ka duwan U Blei ki Israel, ban ainguh ïa ki jingainguh thang halor jong ka, kumba la thoh ha Ka Hukum u Moses u briew u jong U Blei.

³ Bad ki la buh ïa ka duwan ha la ka jaka; naba ki la sheptieng ïa ki briew kita ki ri: bad ki la ainguh ïa ka jingainguh thang halor jong ka ha U Trai, ïa ki jingainguh thang ba mynstep bad ba la janmiet.

⁴ Bad ki la rakhe ïa Ka Jingkhawai Niam Ki Ïingtrep, kumba la thoh, bad ki la ainguh ïa ki jingainguh thang kiba ha la ka sngi ha ka jingkheiñ, katba kum ka rukom, katba shong ka kam kawei pa kawei ka sngi;

⁵ bad hadien kata, ïa ka jingainguh thang kaba borabor, bad ïa ki jong ki 'nai thymmai, bad ki jong Ki Jingkhawai Niam baroh ki bakyntang ba la buh ki jong U Trai, bad ki jong uwei uwei baroh uba la ainguh da la ka mon hi ïa ka jingainguh sngewbha ha U Trai.

⁶ Naduh ka sngi nyngkong u bnai u bahynñiew ki la sdang ban ainguh ïa ki jingainguh thang ha U Trai: hynrei, ïa ka nongrim ka templ ym pat la seng.

⁷ Ki la ai sbai ruh ha ki misteri maw, bad ha ki misteri dieng; bad ïa ka jingbam, bad ïa ka jingdih, bad ïa ka umphniang, ha ki nong Sidon, bad ki nong Tyros, ban wallam ïa ki dieng Kedar na Lebanon ha ka duriaw sha Joppa, kat kum ka hukum ba ki la ïoh na u Seiros u syiem ka Persha.

Kaba seng ïa ki nongrim ka templ

⁸ Te ha ka snem ka ba-ar ka jingwan jong ki sha ka ïing U Blei ha Jerusalem, ha u bnai u ba-ar, u Serubbabel u khun u Shealtiel, bad u Jeshua u khun u Josadak, bad kita kiwei na ki para jong ki, ki lyngdoh bad ki Lebi, bad kita baroh kat kiba la wan noh na kata ka jingpynwir sha Jerusalem ki la sdang; bad ki la thung ki Lebi, naduh kiba arphew snem bad tam, ban pynïaid ïa ka kam ka ïing U Trai.

⁹ Te u Jeshua bad la ki khun bad la ki para, u Kadmiel bad la ki khun, bad ki khun u Judah, ki la ïeng ryntih baroh, ban pynïaid ïa ki nongtrei ha ka ïing U Blei: ki khun u Henadad, bad la ki khun bad la ki para ki Lebi.

¹⁰ Te haba ki nongtei ki la seng ïa ka nongrim ka templ U Trai, ki la buh ïa ki lyngdoh ba la kup ïa la ki jaiñ bad ki ronsing, bad ïa ki Lebi ki khun u Asaph bad ki shakuriaw, ban ïaroh ïa U Trai, kat kum ka jingbuh u Dabid u syiem ki Israel.

¹¹ Bad ki la ïarwai phai ktien paralok da kaba ïaroh bad ha kaba ainguh ïa U Trai, ki ïa-ong, “Namar u long u babha, naba ka jingisynei jong u ka neh junom sha ki Israel.” Bad u paidbah baroh u la pyrta da ka jingpyrta bajam, haba ki la ïaroh ïa U Trai namar ba la seng nongrim ïa ka ïing U Trai.

¹² Hynrei, bun na ki lyngdoh bad ki Lebi bad ki rangbah ki ïing ki kpa, ki tymmen kiba la ïohi ïa ka ïing ka banyngkong, haba la seng nongrim ïa kane ka ïing ha khmat jong ki, ki la ïam da ka ktien bajam; te bun ki la pyrta jam na ka jingkmen:

¹³ katba u paidbah um lah ban pynïapher ïa ka jingsawa ka jingpyrta ka jingkmen na ka jingsawa ka jingïam jong ki briew: naba u paidbah u la pyrta da ka jingpyrta bajam, bad ïa kata ka jingsawa la ïohsngew na sha jngai.