EPHESOS 2 - KA BAIBL

Na ka jingïap sha ka jingpynim

¹ Bad ïa phi u la pynim, haba phi la long ki baïap da ki jingryngkang bad ki pop,

² ha kiba phi la ju ïaid mynno mynno katba kum ka rukom jong kane ka pyrthei, katba kum u syiem ka jingsynshar ka suiñ, ka jong kata ka mynsiem keiñ kaba trei mynta ha ki khun ka jingbymkohnguh:

³ hapdeng jong ki ba ma ngi baroh ngi la ju im shi sien ha ki jingkwah ka doh jong ngi, da kaba leh ïa ki mon jong ka doh bad ki jong ki jingmut, bad ngi la ju long na la ka tynrai, ki khun ka jingbitar, kumjuh kum kita kiwei:

⁴ hynrei, U Blei, ba u long uba kynrei ka jingisynei, namar ka jingieit kaba khraw jong u da kaba u la ieit ïa ngi,

⁵ wat mynba ngi la long ki baïap da ki jingryngkang jong ngi, u la pynim ïa ngi lem bad U Khrist (da ka jingaiei la pynim ïa phi),

⁶ bad u la pynmih ïa ngi lem bad u, bad u la pynshong ïa ngi lem bad u ha ki jaka bneng, ha U Khrist Jisu;

⁷ ba un ïoh pyni ha ki rta ki ban sa wan, ïa kata ka jingkynrei eh ka jingaiei jong u, ha ka jinglehsbun sha ngi ha U Khrist Jisu.

⁸ Namar da ka jingaiei la pynim ïa phi, da ka jingngeit keiñ; kata ruh, ym na phi hi; ka long ka jingai U Blei:

⁹ ym da ki jingleh keiñ, ba uno uno ruh un ym ïoh ban sngewsarong:

¹⁰ namar ngi long ka jingthaw jong u, ba la pynlong ha U Khrist Jisu ïa ki jingleh babha, ïa kiba U Blei u la lah khreh lypa ba ngin ïoh ïaid ha ki.

Kawei ha U Khrist

¹¹ Naba kumta, to kynmaw, ba mynno mynno ma phi, ki Jentil ha ka doh, ïa kiba la khot “Ka Bym-otsher” da kata ïa kaba la khot “Ka Ba-otsher” ba la thaw da ki kti ha ka doh;

¹² ba mynkata, phi la long khlem U Khrist, ba la pynlong khun sohsyiem ïa phi na ka hima Israel, bad ki nongwei na kita ki jutang ka jingkular, ki bymdon ka jingkyrmen bad kiba khlem U Blei ha ka pyrthei;

¹³ hynrei, mynta, ha U Khrist Jisu, ïa phi kiba la ju long jngai noh mynno mynno, la pynlong hajan ha ka snam U Khrist.

¹⁴ Namar ma u, u long ka Jingpynïasuk jong ngi, uba la pynlong kawei ïa ki baroh ar, bad u la pynkhyllem ïa ka kynroh pdeng ka jingpynïakhlad;

¹⁵ haba u la pynduh ha ka doh jong u ïa kata ka jingïashun, kaba long ka rukom ki hukum kaba ha ki niam ki rukom, ba un ïoh pynlong ha lade uwei u briew bathymmai ïa kine baroh ar, kumta, u pynlong ka jingïasuk;

¹⁶ bad ba un ïoh pynïasuk ïa ki baroh ar ha kawei ka met ha U Blei da ka diengphna, haba u la lah pynïap ïa ka jingïashun da ka:

¹⁷ bad u la wan bad u la ïalap ïa ka jingpynïasuk ha phi kiba la jngai noh, bad ïa ka jingpynïasuk ha kita kiba jan.

¹⁸ Naba da u keiñ, ngi baroh ar ngi don ka jingïoh wan da uwei U Mynsiem sha U Kpa.

¹⁹ Kumta te, phim long shuh ki nongwei bad ki sohshnong, hynrei, ki para trai-shnong bad ki riewkhuid, bad kiba ïadei na ka ïing U Blei;

²⁰ ba la tei ïa phi halor ka nongrim ki apostol bad ki nongïathuhlypa, U Jisu Khrist hi u da long u mawdong ba ha khlieh;

²¹ ha u, ka jingtei baroh kawei pa kawei, ba la pynïadait bha, ka nang san ïa ka ban long ka ïing blei ka bakhuid ha U Trai:

²² ha u, ïa phi ruh la tei lem ban long ka jaka shong U Blei ha U Mynsiem.