EKSODOS 9 - KA BAIBL

Ka jingïapkhlam ki mrad

¹ Ynda kumta, U Trai u la ong ha u Moses, “To leit ha u Pharaoh, to ïathuh ruh ha u, ‘Kumne u ong U Trai U Blei ki Hebru: “To pyllait noh ïa u paidbah jong nga, ba kin ïoh shakri ïa nga.

² Namar lada mem kohnguh ban pyllait noh ïa ki, bad me shu dang bat ïa ki,

³ ha khmih, ka kti U Trai kan long halor ki jingri jong me kiba ha ka lyngkha, halor ki kulai, halor ki kadda, halor ki ut, halor ki masi de, bad halor ki langbrot ruh: kan wan ka jingïapkhlam ki mrad kaba jur eh.

⁴ U Trai ruh un pynïapher ïa ki jingri jong ki Israel bad ki jingri ka ri Ijipt; ba kan ym ïap kaei kaei ruh em kaba dei ka jong ki khun Israel.” ’ ”

⁵ U Trai u la buh ïa ka Ïa ruh, u da ong, “Lashai U Trai un sa leh ïa kane ha kane ka ri.”

⁶ U Trai u la leh ruh ïa kata ha kaba lashai, bad ki jingri baroh jong ka ri Ijipt ki la ïap noh: hynrei, na ki jingri jong ki khun Israel kawei ruh kam shym la ïap.

⁷ Bad u Pharaoh u la phah tohkit, te ha khmih, na ki jingri ki khun Israel kawei ruh kam shym ïap noh. Te pynban, ïa ka dohnud u Pharaoh la pyneh, bad um shym la pyllait noh ïa uta u paidbah.

Ka jingpang da ki tohjaw

⁸ Te U Trai u la ong ha u Moses bad ha u Aaron, “To shim shi kham da ka dpei na ka pajwa, bad ai ha u Moses un synreit ïa ka sha bneng ha khmat u Pharaoh.

⁹ Te kan sa man pum pum ha ka ri Ijipt baroh, bad kan long ki tohjaw ba-mih ksuit ruh ha u briew bad ha u mrad, kylleng ka ri Ijipt baroh.”

¹⁰ Bad ki la shim ïa ka dpei na kata ka pajwa, bad ki la ïeng ha khmat u Pharaoh; bad u Moses u la synreit ïa ka sha bneng; te ki la man tohjaw ba-mih ksuit ha u briew bad ha u mrad.

¹¹ Kita ki nongleh byrtong te kim lah ïeng ha khmat u Moses namar kita ki tohjaw; namar kata, ki tohjaw ba-mih ksuit ki la don ha kita ki nongleh byrtong, bad ha ki Ijipt baroh.

¹² Bad U Trai u la pyneh ïa ka dohnud u Pharaoh, bad um shym shahshkor ïa ki, kumba U Trai u la lah kren ha u Moses.

Kaba shoh da u phria uba jur

¹³ Te U Trai u la ong ha u Moses, “To khie la dang step, bad to ïeng ha khmat u Pharaoh, bad to ong ha u, ‘Kumne u ong U Trai U Blei jong ki Hebru, “To pyllait noh ïa u paidbah jong nga, ba kin ïoh shakri ïa nga.

¹⁴ Naba ha kane ka por, ngan sa phah ïa ki jingpynshitom jong nga baroh halor ka dohnud jong me, bad halor ki shakri jong me, bad halor ki briew jong me; khnang ba men ïoh tip ba ym don uba kat nga ha ka pyrthei baroh.

¹⁵ Naba lada nga la lah kner ïa la ka kti, bad shoh ïa me bad ïa ki briew jong me da ka jingïapthem, te ïa me la lah ot noh na ka pyrthei;

¹⁶ hynrei, shisha na ka bynta kane hi nga la pynïeng ïa me, ïa ka ban pyni ha me ïa ka bor jong nga, bad ïa ka ban pynbna ïa ka kyrteng jong nga de ha ka pyrthei baroh kawei.

¹⁷ Te me dang pynmeng ïa lade pynban halor u paidbah jong nga, ba mem pyllait noh ïa ki?

¹⁸ Ha khmih, lashai hamar kane ka por ngan pynhap da u phria uba jur eh, kat uta ym ju don ha ka ri Ijipt naduh ba ka dang long haduh mynta.

¹⁹ Namar kata te, to phah ïalum mynta ïa ki jingri jong me bad ïa baroh kat kiba me don ha ka lyngkha; u briew bad u mrad baroh kat ki ban shem ha ka lyngkha, bad ki ban ym wallam ha ïing, uta u phria un hap keiñ halor jong ki, bad kin ïap noh.” ’ ”

²⁰ Uta na ki shakri u Pharaoh uba la sheptieng ïa ka ktien U Trai u la pynphet ïa la ki shakri bad ïa la ki jingri shapoh ki ïing;

²¹ hynrei, uta u bym shym la suidñiew ïa ka ktien U Trai u la iehnoh ïa la ki shakri bad ïa la ki jingri ha ka lyngkha.

²² Te U Trai u la ong ha u Moses, “To kner ïa la ka kti sha bneng, ba un hap u phria ha ka ri Ijipt baroh, halor u briew, bad halor ki mrad, bad halor ki jhur ka lyngkha baroh, kylleng ka ri Ijipt.”

²³ Bad u Moses u la kner ïa la u diengduh sha bneng: bad U Trai u la phah da ki pyrthat bad da u phria, bad ka ding ruh ka la nang pur halor ka khyndew; bad U Trai u la pynhap ïa u phria halor ka ri Ijipt.

²⁴ Kumta, la don u phria, bad ka ding ba la ïakhleh lem bad uta u phria bapynshitom eh, ym shym la don kat uta ha ka ri Ijipt baroh naduh ba ka la man jaid bynriew.

²⁵ Bad uta u phria u la shoh baroh kylleng ka ri Ijipt ïa baroh kat kiba ha ka lyngkha, ïa u briew ruh bad ïa u mrad; bad uta u phria u la shoh ruh ïa ki jhur ka lyngkha baroh, u la pynkheiñ ruh ïa u dieng baroh jong ka lyngkha.

²⁶ Tang ha ka ri Goshen, ha kaba la shong ki khun Israel, ym shym la don phria.

²⁷ Te u Pharaoh u la phah khot ïa u Moses bad ïa u Aaron, bad u la ong ha ki, “Ha kane shi sien nga la leh pop: U Trai u long u bahok, ma nga te bad ki briew jong nga ngi long ki bymman.

²⁸ To kyrpad ïa U Trai; naba katne ki la biang ki pyrthat U Blei bad u phria; te ngan pyllait noh ïa phi, bad phin ym shong shuh.”

²⁹ Te u Moses u la ong ha u, “Haba nga dang shu mih noh na kane ka nongbah, ngan sa kner ïa la ki kti sha U Trai; te uta u pyrthat un duh, bad uta u phria ruh un ym hap shuh; khnang ba men ïoh tip ba ka pyrthei ka long ka jong U Trai.

³⁰ Hynrei, shaphang jong me bad ki shakri jong me, nga tip ba phim pat sheptieng ïa U Trai U Blei.”

³¹ Te la shoh ïa u 'saihon bad ïa u Kew Barli: naba uta u Kew Barli u dang long ha ka kop, bad uta u 'saihon u dang sei soh.

³² Hynrei, ïa u Kew bad ïa u Kew rie ym shym la shoh: naba kim pat mih.

³³ Te u Moses u la mih noh na u Pharaoh shabar kata ka nongbah, bad u la kner ïa la ki kti sha U Trai: te uta u pyrthat bad uta u phria de ki la jah noh, bad ym shym la pynhap shuh ïa u slap ha ka khyndew.

³⁴ Te haba u Pharaoh u la ïohi ba uta u slap bad uta u phria bad uta u pyrthat ruh ki la jah noh, u la nang leh pop shuh shuh, bad u la pyneh ïa la ka dohnud ruh: ma u bad ki shakri jong u.

³⁵ Kumta, ïa ka dohnud u Pharaoh la pyneh, bad um shym la pyllait noh ïa ki khun Israel; kumba U Trai u la lah kren ha u Moses.