EKSODOS 7 - KA BAIBL

¹ Bad U Trai u la ong ha u Moses, “Ha khmih, nga la pynlong blei ïa me ha u Pharaoh: bad u Aaron u hynmen jong me un sa long u nongïathuhlypa jong me.

² To men kren baroh ïa kaba nga hukum ïa me: bad u Aaron u hynmen jong me un kren ha u Pharaoh, ba un phah noh ïa ki khun Israel na ka ri jong u.

³ Te ngan pyneh ïa ka dohnud u Pharaoh, bad ngan pynbun ïa ki dak khyllah bad ïa ki jingphylla jong nga ha ka ri Ijipt.

⁴ Hynrei, u Pharaoh un ym shahshkor ïa phi, ba ngan ïoh buh ïa la ka kti halor ka ri Ijipt, bad ba ngan pynmih noh de ïa la ki paidbah, kiba ki briew jong nga, ki khun Israel keiñ, na ka ri Ijipt da ki jingbishar bakhraw.

⁵ Te ki Ijipt kin sa tip ba nga long ma nga U Trai, haba nga la kner ïa la ka kti halor ka ri Ijipt, bad ba nga la pynmih noh ïa ki khun Israel napdeng jong ki.”

⁶ Te u Moses bad u Aaron ki la leh kumta kumba U Trai u la hukum ïa ki, kumta keiñ ki la leh.

⁷ Bad u Moses u la don phraphew snem ka rta, bad u Aaron phraphew lai snem ka rta mynba ki la kren ha u Pharaoh.

U diengduh u Aaron

⁸ Bad U Trai u la kren ha u Moses bad ha u Aaron, u da ong,

⁹ “Haba u Pharaoh un kren ha phi da kaba ong, ‘To pyni ïa ka kam phylla na phi:’ te men ong ha u Aaron, ‘To shim ïa la u diengduh, to bred ruh ha khmat u Pharaoh, ba un sa kylla bseiñ.’ ”

¹⁰ Te u Moses bad u Aaron ki la ïaleit hapoh ha u Pharaoh, bad ki la leh kumta, kumba U Trai u la lah hukum: bad u Aaron u la bred ïa la u diengduh ha khmat u Pharaoh bad ha khmat ki shakri jong u, te u la kylla bseiñ.

¹¹ Ynda kumta, u Pharaoh ruh u la khot ïa ki riewstad, bad ïa ki nongleh byrtong: te ki nongleh byrtong ka ri Ijipt, ki hi ruh ki la leh kumjuh da ki jingleh myntor jong ki.

¹² Naba ki la bred uwei uwei baroh ïa la u diengduh, te ki ruh ki la kylla bseiñ: hynrei, u diengduh u Aaron u la nguid noh ïa ki diengduh jong ki.

¹³ Te la pyneh ïa ka dohnud u Pharaoh, bad kumta, um shym shahshkor ïa ki; kumba U Trai u la lah ong.

Kaba pynkylla snam ïa ka wah

¹⁴ Te U Trai u la ong ha u Moses, “Ka dohnud u Pharaoh ka la eh, um treh ban pyllait noh ïa u paidbah.

¹⁵ To men leit ha u Pharaoh la dang step; ha khmih, u wan mih noh shabar sha kata ka um; te men ïeng harud kata ka wah hamar kaba u wan; to shim ruh ha la ka kti ïa uta u diengduh uba la kylla bseiñ.

¹⁶ Bad men ong ruh ha u, ‘U Trai, U Blei jong ki Hebru, u la phah ïa nga ha me, u da ong, “To da pyllait noh ïa ki briew jong nga, ba kin ïoh shakri ïa nga ha ri khlaw: te ha khmih, haduh mynta mem shahshkor satia.”

¹⁷ Kumne u ong U Trai, “Da kane men sa tip ba ma nga, nga long U Trai: ha khmih, nga ngan shoh da une u diengduh uba ha ka kti jong nga halor kita ki wah, te kin sa kylla snam.

¹⁸ Bad ki dohkha ruh kiba ha kata ka wah kin ïap noh, bad kata ka wah kan iwtung; bad ki Ijipt kin isih ban dih na ka um jong kata ka wah.” ’ ”

¹⁹ Bad U Trai u la kren ha u Moses, “To ong ha u Aaron, ‘To shim ïa u diengduh jong me, to kner ruh ïa la ka kti halor ki um ka ri Ijipt, halor ki wah bah jong ki, halor ki wah duid jong ki ruh, bad halor ki pukri jong ki, bad halor ki pung um jong ki baroh de, ba kin kylla snam; bad ba kin long snam ha ka ri Ijipt baroh kawei, ha ki diang dieng bad ha ki diang maw ruh.’ ”

²⁰ Te u Moses bad u Aaron ki la leh kumta, kumba U Trai u la hukum; bad u la rah ïa uta u diengduh, bad u la shoh ruh ïa kita ki um kiba ha kata ka wah ha khmat u Pharaoh, bad ha khmat ki shakri jong u; te ïa kita ki um baroh kiba ha kata ka wah la pynkylla snam.

²¹ Bad kita ki dohkha kiba ha kata ka wah ki la ïap noh; bad kata ka wah ka la iwtung, te ki Ijipt kim lah ban dih shuh na ka um jong kata ka wah; te la don ka snam ha ka ri Ijipt baroh kawei.

²² Bad kita ki nongleh byrtong ka ri Ijipt ki la leh kumjuh da ki jingleh myntor jong ki: te ïa ka dohnud u Pharaoh la pyneh, bad um shym la shahshkor ïa ki; kumba U Trai u la lah ong.

²³ Te haba u Pharaoh u la phai u la leit sha la ïing, bad um shym la buh ïa kane ruh ha ka dohnud jong u.

²⁴ Bad ki Ijipt baroh te ki la ïatih baroh sawdong ïa kata ka wah ba kin ïoh ka um ban dih; naba kim lah dih shuh na ka um jong kata ka wah.

Kaba phah ïa ki jakoid

²⁵ Te la pyndep hynñiew sngi, naduh ba U Trai u la lah shoh ïa kata ka wah.