EKSODOS 6 - KA BAIBL

¹ Ynda kumta, U Trai u la ong ha u Moses, “Mynta men ïohi kaei ba ngan sa leh ïa u Pharaoh: naba da ka kti badonbor un pyllait noh ïa ki, bad da ka kti badonbor un pynmih noh ïa ki na ka ri jong u.”

U Blei U pynthymmai ïa la ka jingkular

² Te U Blei u la kren ha u Moses, bad U la ong ha u, “Ma nga, nga long U Jehobah:

³ Te ha u Abraham, ha u Isaak, bad ha u Jakob, nga la mihpaw da ka kyrteng U Blei U Badonbor Baroh, hynrei, da ka kyrteng jong nga ‘JEHOBAH’ kim shym la ithuh ïa nga.

⁴ Bad nga la pynskhem ruh ïa ka jutang jong nga bad ki, ïa ka ban ai ha ki, ïa ka ri Kanaan, ïa ka ri ki jingleit jong ki keiñ ha kaba ki la long ki nongwei.

⁵ Bad nga la ïohsngew ruh ïa ka jingud ki khun Israel, ïa kiba ki Ijipt ki bat ha ka jinglongmraw; bad nga la kynmaw ïa la ka jutang.

⁶ Namar kata, to ong ha ki khun Israel, ‘Nga long ma nga U Jehobah, bad ngan wallam noh ïa phi napoh ka jingpynshitom ki Ijipt, bad ngan pyllait noh ïa phi na ka jingpynlong mraw jong ki, bad ngan siewspah ïa phi da ka ksang'ti ba la kner, bad da ki jingbishar bakhraw:

⁷ ngan shim ruh ïa phi ban long ki briew ïa nga, ma nga ruh, ngan long U Blei ïa phi: bad phin sa tip ba nga, nga long U Jehobah U Blei jong phi, uba wallam noh ïa phi napoh ki jingpynshitom ki Ijipt.

⁸ Ngan wallam ruh ïa phi sha kata ka ri, shaphang kaba nga la smai ban ai ïa ka ha u Abraham, ha u Isaak, bad ha u Jakob ruh; te ngan ai ïa ka, ban long ka bynta jong phi: ma nga, nga long U Jehobah.’ ”

⁹ Te u Moses u la kren kumta ha ki khun Israel: hynrei, ki, kim shym la shahshkor ïa u Moses namar kata ka jingpisa mynsiem bad namar kata ka jingpynlong mraw bashitom eh.

¹⁰ Te U Trai u la kren ha u Moses, u da ong,

¹¹ “To leit hapoh, to kren ha u Pharaoh u syiem ka ri Ijipt, ba un pyllait noh ïa ki khun Israel na ka ri jong u.”

¹² Bad u Moses u la kren ha khmat U Trai, u da ong, “Ha khmih, ki khun Israel kim shym la shahshkor ïa nga; kumno te un sngap u Pharaoh ïa nga uba khlem otsher ki rmiang shyntur?”

¹³ Te U Trai u la kren ha u Moses bad ha u Aaron, bad ha ki U la ai hukum ïa ki khun Israel, bad ïa u Pharaoh u syiem ka ri Ijipt, ïa ka ban wallam noh ïa ki khun Israel na ka ri Ijipt.

Ki longshuwa manshuwa u Moses bad u Aaron

¹⁴ Kine te ki rangbah ha ki ïing ki kpa jong ki: ki khun shynrang u Reuben u khun nyngkong jong u Israel: u Hanokh, bad u Pallu, u Hesron, bad u Karmi: kine ki long ki ïing jong u Reuben.

¹⁵ Ki khun shynrang u Simeon ruh: u Jemuel, bad u Jamin, bad u Ohad, bad u Jakhin, bad u Sohar ruh, bad u Shaul u khun ka kynja Kanaan: kine ki ïing jong u Simeon.

¹⁶ Kine ruh ki kyrteng ki khun shynrang u Lebi ha ka jinghiar pateng jong ki: u Gershon, bad u Kohath, bad u Merari: te ki snem ka rta u Lebi ki la long shispah laiphew hynñiew snem.

¹⁷ Ki khun shynrang u Gershon: u Libni, bad u Shimi, ha ki ïing jong ki.

¹⁸ Bad kine ki khun shynrang u Kohath: u Amram, bad u Ishar, bad u Hebron ruh, bad u Ussiel; te ki snem ka rta u Kohath ki la long shispah laiphew lai snem.

¹⁹ Ki khun shynrang u Merari de: u Mahli bad u Mushi; kine ki long ki ïing jong u Lebi ha ki jinghiar pateng jong ki.

²⁰ Te u Amram u la shim ïa ka Jokhebed ka ñiakha jong u ban long ka tnga jong u; ha u ka la kha ruh ïa u Aaron bad ïa u Moses: te ki snem ka rta u Amram ki la long shispah laiphew hynñiew snem.

²¹ Bad ki khun shynrang u Ishar: u Korah, bad u Nepheg, bad u Sikhri.

²² Ki khun shynrang u Ussiel: u Mishael, bad u Elsaphan, bad u Sithri.

²³ Te u Aaron u la shim ïa ka Elisheba ka khun u Amminadab, ka para jong u Naashon ban long ka tnga ïa u; ha u te ka la kha ïa u Nadab, bad ïa u Abihu, ïa u Eleasar, bad ïa u Ithamar.

²⁴ Kine ki khun u Korah de: u Assir, u Elkanah ruh, bad u Abiasaph; kine ki ïing jong u Korah.

²⁵ Bad u Eleasar u khun u Aaron u la shim ïa kawei na ki khun kynthei jong u Putiel ban long ka tnga jong u; ha u te ka la kha ïa u Phinehas. Kine ki long ki rangbah jong ki kpa jong ki Lebi, katba kum ki ïing jong ki.

²⁶ Kine ki long uta u Aaron bad uta u Moses, ha kiba U Trai u la ong, “To wallam noh ïa ki khun Israel na ka ri Ijipt katba kum ki paid jong ki.”

²⁷ Kine, ki long kita kiba la kren ha u Pharaoh u syiem ka ri Ijipt, ïa ka ban wallam noh ïa ki khun Israel na ka ri Ijipt: kine keiñ, ki long uta u Moses bad uta u Aaron.

Ka jingpynshlur U Blei ïa u Moses bad ïa u Aaron

²⁸ Ka la jia te ha kata ka sngi ha kaba U Trai u la kren ha u Moses ha ka ri Ijipt,

²⁹ ba U Trai u la kren ha u Moses, u da ong, “Nga long ma nga U Trai: to men kren ha u Pharaoh u syiem ka ri Ijipt ïa baroh kaba nga ong ha me.”

³⁰ Bad u Moses u la ïathuh ha khmat U Trai, “Ha khmih, nga uba khlem otsher ki rmiang shyntur, kumno te un shahshkor u Pharaoh ïa nga?”