EKSODOS 40 - KA BAIBL

Kaba pynïeng bad pynkyntang ïa Ka Tabernakl

¹ Te U Trai u la kren ha u Moses, u da ong,

² “Ha ka sngi ka banyngkong jong u bnai banyngkong men sa pynïeng ïa Ka Tabernakl, ïa ka ïing jong ka jingïaseng keiñ.

³ Men buh ruh hangta ïa ka synduk ka jingphla, bad to tap ïa kata ka synduk da kata ka jingkah.

⁴ To men wallam ruh ïa ka miej, bad men buh ryntih ïa kita kiba dei ban buh ryntih halor jong ka; bad to men wallam hapoh ruh ïa kata ka dieng pynïeng sharak, bad to tbeh ïa ki sharak jong ka.

⁵ To men buh ruh ïa ka duwan ksiar jong ka jingiwbih thang ha khmat ka synduk ka jingphla, bad to pynïeng ïa ka pyrda ka jingkhang Ka Tabernakl.

⁶ To men buh ruh ïa ka duwan ka jingainguh thang ha khmat ka jingkhang Ka Tabernakl jong ka ïingjaiñ ka jingïaseng,

⁷ to men buh ruh ïa ka dabor hapdeng ka ïingjaiñ ka jingïaseng bad kata ka duwan, bad men theh um ha ka.

⁸ To men pynïeng ïa ka phyllaw ruh baroh sawdong, bad to woh de ïa ka pyrda ha ka khyrdop kata ka phyllaw.

⁹ Bad to men shim ïa ka umphniang bapynsleh, to pynsleh ruh ïa Ka Tabernakl, bad ïa kita baroh kiba don ha ka, bad men pynkyntang ïa ka, bad ïa ki pliang jong ka baroh: te kan long ka bakyntang khuid.

¹⁰ To men pynsleh ruh ïa ka duwan ka jingainguh thang, bad ïa ki pliang jong ka baroh, bad to pynkyntang ïa kata ka duwan: te kan long ka duwan ka bakyntang tam eh.

¹¹ To men pynsleh ruh ïa ka dabor bad ïa ka kjat jong ka, to pynkyntang ïa ka ruh.

¹² Men wallam te ïa u Aaron bad ïa ki khun shynrang jong u ha ka jingkhang jong Ka Tabernakl ka jingïaseng, bad to sait ïa ki da ka um,

¹³ bad men pynphong ïa u Aaron da kita ki jaiñkup bakyntang, bad to pynsleh ïa u, to pynkyntang ruh ïa u, ba un ïoh kam ha nga ha ka kam lyngdoh.

¹⁴ To men wallam ruh ïa ki khun shynrang jong u, bad to pynphong ïa ki da ki sopti,

¹⁵ bad to men pynsleh ïa ki kumba me la pynsleh ïa u kpa jong ki, ba kin ïoh kam ha nga ha ka jingkam lyngdoh: kumta keiñ, ka jingpynsleh jong ki kan long ka jinglong lyngdoh ha la ka rta lyngba ki pateng la pateng bynriew jong ki.”

¹⁶ Kumta, u Moses u la leh: katba kum ïa kata baroh ba U Trai u la hukum ïa u, kumta keiñ, u la leh.

¹⁷ Kumta, ha u bnai banyngkong ha ka snem ba-ar, ha ka sngi ka banyngkong jong uta u bnai, la pynïeng ïa kata Ka Tabernakl.

¹⁸ Te u Moses u la pynïeng ïa kata Ka Tabernakl, bad u la pynskhem ïa ki thliew tnaw jong ka, bad u la pynïeng ïa ki lyntang jong ka, bad u la phrung ïa ki dieng khap jong ka, bad u la pynïeng ïa ki rishot jong ka;

¹⁹ bad u la siang ïa kata ka jaiñsop halor kata Ka Tabernakl, bad u la buh ïa ka jingtap jong kata ka jaiñsop halor jong ka; kumba U Trai u la hukum ïa u Moses.

²⁰ Bad u la shim bad u la thep ruh ïa ka jingphla hapoh kata ka synduk, bad u la phrung ïa kita ki dieng jingbah ha kata ka synduk, bad u la buh ïa ka jingtap-isynei halor kata ka synduk:

²¹ bad u la wallam ruh ïa kata ka synduk hapoh Ka Tabernakl, bad u la woh ïa kata ka jingkah pdeng, bad u la kah ïa ka synduk ka jingphla; kumba U Trai u la hukum ïa u Moses.

²² Bad u la buh ïa kata ka miej ha Ka Tabernakl ka jingïaseng, ha ka liang kata Ka Tabernakl kaba shaphang shatei, shabar kata ka jingkah pdeng.

²³ Bad u la buh beit ïa kita ki kpu halor jong ka ha khmat U Trai; kumba U Trai u la hukum ïa u Moses.

²⁴ Bad u la buh ïa kata ka dieng pynïeng sharak ha Ka Tabernakl ka jingïaseng, ha marpyrshah kata ka miej, ha ka liang kata Ka Tabernakl kaba shaphang shathie.

²⁵ Bad u la tbeh ïa kita ki sharak ha khmat U Trai; kumba U Trai u la hukum ïa u Moses.

²⁶ Bad u la buh ïa kata ka duwan ksiar ha Ka Tabernakl ka jingïaseng ha khmat kata ka jingkah pdeng,

²⁷ bad u la thang ïa ka jingiwbih thang halor jong ka; kumba U Trai u la hukum ïa u Moses.

²⁸ Bad u la woh ïa kata ka pyrda ha ka jingkhang Ka Tabernakl.

²⁹ Bad u la buh ïa ka duwan ka jingainguh thang hajan ka jingkhang Ka Tabernakl, ka ïingjaiñ ka jingïaseng keiñ, bad u la kñia halor jong ka ïa ka jingainguh thang bad ïa ka jingainguh bam; kumba U Trai u la hukum ïa u Moses.

³⁰ U la buh ruh ïa kata ka dabor hapdeng ka ïingjaiñ ka jingïaseng bad kata ka duwan, bad u la theh um hangta ïa ka ban sait,

³¹ te u Moses bad u Aaron bad ki khun shynrang jong u ki la thet ïa la ki kti bad ki la sait ïa la ki sla'jat ha ka;

³² haba ki la ïaleit hapoh kata ka ïingjaiñ ka jingïaseng, bad haba ki la ïawan hajan kata ka duwan, ki la ju sait, ki la ju thet keiñ: kumba U Trai u la hukum ïa u Moses.

³³ Bad u la pynïeng ïa kata ka phyllaw baroh sawdong Ka Tabernakl bad kata ka duwan, bad u la woh ïa kata ka pyrda ha ka khyrdop ka phyllaw. Kumta keiñ, u Moses u la pyndep ïa kata ka kam.

U lyoh u tap lup ïa Ka Tabernakl

³⁴ Ynda kumta, uta u lyoh u la tap lup ïa ka ïingjaiñ ka jingïaseng, bad ka burom U Trai ka la pyndap ïa kata Ka Tabernakl.

³⁵ Te u Moses um lah ban rung hapoh kata ka ïingjaiñ ka jingïaseng, naba uta u lyoh u neh halor jong ka, bad kata ka burom U Trai ka la pyndap ïa kata Ka Tabernakl.

³⁶ Te haba uta u lyoh u la ïeng noh na Ka Tabernakl, ki khun Israel ki la ju sdang leit ha ki jingleit jong ki baroh;

³⁷ hynrei, lada uta u lyoh um ïeng noh, kumta te, kim ju leit jingleit keiñ tad ynda kata ka sngi ba u la ïeng noh.

³⁸ Naba uta u lyoh jong U Trai u la don halor kata Ka Tabernakl mynsngi, bad ka ding ka la don halor jong ka mynmiet, ha khmat ka ïing Israel baroh, ha ki jingleit jong ki baroh.