EKSODOS 4 - KA BAIBL

¹ Te u Moses u la ïathuh pat bad u la ong, “Hynrei, ha khmih, kin ym ïangeit ïa nga, lymne sngap ïa ka ktien jong nga: naba kin ong, ‘U Trai um shym la mihpaw ha me.’ ”

² Te U Trai u la kylli ïa u, “Kaei kata kaba ha ka kti jong me?” U te u la ïathuh, “U diengduh.”

³ Te u la ong, “To bred ïa u ha ka khyndew.” Bad u la bred ïa u ha ka khyndew, te u la kylla bseiñ; bad u Moses u la kiar noh na u.

⁴ Bad U Trai u la ong ha u Moses, “To sei noh ïa la ka kti, bad to bat ïa u na u tdong”: (u te u la sei noh ïa la ka kti, bad u la kem ïa u, bad u la kylla diengduh pat ha ka kti jong u:)

⁵ “ba kin ïoh ngeit ba U Trai uba U Blei ki kpa jong ki, U Blei u Abraham, bad U Blei u Isaak, bad U Blei u Jakob ruh, u la mihpaw ha me.”

⁶ Nalor kata ruh, U Trai u la ong ha u, “To buh mynta ïa la ka kti ha la ka shadem.” U te u la buh ïa la ka kti ha la ka shadem: te mynba u la sei noh ïa ka, ha khmih, ka la thohlieh, kat ka ïor.

⁷ U la ong ruh, “To buh ïa la ka kti ha la ka shadem pat.” (Bad u la buh ïa la ka kti ha la ka shadem pat; bad u la sei noh ïa ka na la ka shadem, te, ha khmih, ka la kylla pat kum ka doh jong u hi.)

⁸ “Te kan sa jia, lada kim ïangeit ïa me, lymne sngap ïa ka jingsawa jong ka dak banyngkong, ba kin sa ngeit keiñ ïa ka jingsawa ka dak ba-ar.

⁹ Hynrei, lada kin ym ngeit ruh ïa kine ki dak baroh ar, lymne sngap ïa ka ktien jong me, to men shim na ka um jong kata ka wah, bad theh ïa ka ha ryngkew: bad kata ka um ïa kaba me shim na kata ka wah kan sa kylla snam ha ryngkew.”

¹⁰ Te u Moses u la ong ha U Trai, “A Trai jong nga, ngam long uba pnah ka shyntur, lymne mynno mynno, lymne naduh ba me la kren bad la u shakri: hynrei, nga long uba thlun ka jingkren, bad uba thlun u thylliej.”

¹¹ Te U Trai u la kylli ïa u, “Uei ba la thaw ïa ka shyntur u briew? Lane uei ba la thaw ïa u bymnangkren, lane u bakyllut, lane u bapeit, lane u bamatlah? Ym long ma nga U Trai?

¹² Namar kata, to leit mynta, bad nga ngan long lem bad ka shyntur jong me, bad ngan hikai ïa me ïa kaei ba men kren keiñ.”

¹³ U te u la ong, “A Trai, to phah, nga kyrpad ïa me, da uta ïa uba me dei ban phah.”

¹⁴ Te ka jingbitar U Trai ka la meh pyrshah ïa u Moses, bad u la ong, “U Aaron uba u Lebi um long u hynmen jong me? Nga tip ba u nang kren bha. Bad ha khmih ruh, u wan mih ban tan ïa me: te ynda un ïohi ïa me, un kmen ha la ka dohnud.

¹⁵ Bad to men kren ha u, men buh ruh ïa kine ki ktien ha ka shyntur jong u: ma nga te ngan long lem bad ka shyntur jong u ruh, bad ngan hikai ïa phi ïa kaei ba phin leh.

¹⁶ Bad un long u nongpynkren jong me ha u paidbah: kumta, ma u shisha un long kum ka shyntur ïa me, bad ma me ruh men long kum U Blei ïa u.

¹⁷ Men shim ruh ïa une u diengduh ha ka kti jong me, da uba men sa leh ïa ki dak phylla.”

U Moses u wan phai sha ka ri Ijipt

¹⁸ Te u Moses u la leit phai pat sha u Jethro u kthaw kurim jong u, bad u la ong ha u, “Nga kyrpad ïa me, to shah ba ngan leit wan noh sha ki para jong nga kiba ha ka ri Ijipt, bad khmih la ki dang im ne em.” Te u Jethro u la ong ha u Moses, “To khie leit ha kaba suk.”

¹⁹ Bad U Trai u la ong ha u Moses ha ka ri Midian, “To leit phai pat sha ka ri Ijipt: naba ki la ïap noh baroh kita ki briew kiba la wad ïa ka jingim jong me.”

²⁰ Bad u Moses u la shim ïa la ka tnga bad ïa la ki khun shynrang, bad u la buh ïa ki halor ki kadda, bad u la leit phai pat sha ka ri Ijipt: bad u Moses u la shim ïa u diengduh jong U Blei ha la ka kti.

²¹ Bad U Trai u la ong ha u Moses, “Ynda me la leit phai pat sha ka ri Ijipt, to sumar ba men leh ha khmat u Pharaoh ïa kita ki kam phylla baroh ïa kiba nga la ai ha ka kti jong me: hynrei, ngan pyneh ïa ka dohnud jong u, te un ym pyllait noh ïa u paidbah.

²² Bad men ong ha u Pharaoh, ‘Kumne u ong U Trai, u Israel u long u khun jong nga, uba kha nyngkong jong nga keiñ,

²³ bad nga la ong ha me, “To pyllait noh ïa u khun jong nga ba un ïoh shakri ïa nga;” te lada mem treh ban pyllait noh ïa u, ha khmih, ngan pynïap noh ïa u khun jong me, uba la kha nyngkong jong me keiñ.’ ”

²⁴ Ka la jia te ha lynti ha ka ïingbasa, ba U Trai u la ïashem bad u, bad U la thew ban pynïap noh ïa u.

²⁵ Te ka Sipporah ka la shim ïa u maw banep, bad ka la otsher ïa u khun jong ka, bad ka la bred ha ki kjat jong u; bad ka la ong ruh, “Shisha u tnga uba bit snam me long ïa nga.”

²⁶ Kumta, U Trai u la pyllait noh ïa u. Te ka la ong, “Me long u tnga uba bit snam, namar ka jingotsher.”

²⁷ Bad U Trai u la ong ha u Aaron, “To leit sha ri khlaw ban tan ïa u Moses.” U la leit te, bad u la ïashem bad u ha u lum jong U Blei, bad u la doh ïa u.

²⁸ Bad u Moses u la ïathuh ha u Aaron ïa ki ktien baroh jong U Trai uba la phah ïa u, bad ïa kita ki dak phylla baroh ïa kiba u la lah hukum ïa u.

²⁹ Te u Moses bad u Aaron ki la ïaleit bad ki la ïalum lang ïa ki tymmen basan baroh jong ki khun Israel.

³⁰ Bad u Aaron u la kren ïa kita ki ktien baroh ïa kiba U Trai u la lah kren ha u Moses, bad u la leh ruh ïa kita ki dak phylla ha khmat u paidbah.

³¹ Bad uta u paidbah u la ngeit: te mynba ki la ïohsngew ba U Trai u la wan-i ïa ki khun Israel, bad ba u la khmih ruh de ïa ka jingshitom jong ki, ynda kumta, ki la dem ïa la ki khlieh bad ki la ïamane ruh.