EKSODOS 39 - KA BAIBL

Ki jaiñphong na ka bynta ki lyngdoh

¹ Bad na kata ka babyrïong, bad ka basaw bthuh, bad ka basaw syng-iang, ki la ïathaw ïa ki jaiñ ban kam jingkam, ïa ka ban trei ha ka jaka bakyntang, bad ïa ki jaiñkup bakyntang ïa u Aaron, kumba U Trai u la hukum ïa u Moses.

Ka Ephod

² Bad u la thaw ïa kata ka ephod da ka ksiar, da ka babyrïong, bad ka basaw bthuh, bad ka basaw syng-iang, bad ka linen bani ba la thir.

³ Bad ki la shoh stang kum ki sla ïa kata ka ksiar, bad ki la ot ksai ksiar ïa ka, ïa ka ban suh ha kata ka babyrïong, bad ha kata ka basaw bthuh, bad ha kata ka basaw syng-iang, bad ha kata ka linen bani, da ka jingtrei bastad.

⁴ Ki la thaw ïa ki tyrpeng ïa ka, ban pynïasoh lang ïa ka: na ki baroh ar ki rmiang la pynïasoh lang ïa ka keiñ.

⁵ Bad kata ka jingpanpoh baphylla ka ephod jong u, kaba halor jong ka, ka la long na kajuh ha ka jingtrei jong ka; da ka ksiar, da ka babyrïong, bad ka basaw bthuh, bad ka basaw syng-iang, bad ka linen bani ba la thir; kumba U Trai u la hukum ïa u Moses.

⁶ Bad ki la shna ïa ki maw Oniks ba la thep ha ki shrong ksiar, ba la pruid kum ka jingpynpruid ïa ka mohor, da ki kyrteng ki khun Israel.

⁷ Bad u la buh ïa ki ha ki tyrpeng jong kata ka ephod, ban long ki maw ka jingpynkynmaw ïa ki khun Israel; kumba U Trai u la hukum ïa u Moses.

⁸ U la thaw ruh ïa ka jingdeng shadem da ka jingtrei bastad, kum ka jingtrei ïa kata ka ephod; da ka ksiar, da ka babyrïong, bad ka basaw bthuh, bad ka basaw syng-iang, bad ka linen bani ba la thir.

⁹ Ka la long sawdong; ki la thaw ar syrtap ïa kata ka jingdeng shadem: ka lynter jong ka, shi tda; bad ka pyngkiang jong ka ruh, shi tda; kaba ar syrtap keiñ.

¹⁰ Bad ki la thep ha ka, ïa ki saw kyrdan ki maw: shi kyrdan da u Sardios, u Topas, bad u Karbunkl: kane ka kyrdan banyngkong keiñ;

¹¹ bad ka kyrdan ba-ar, da u Emerald, u Sapphir bad u Diamond;

¹² bad ka kyrdan balai, da u Ligur, u Agate, bad u Amethyst;

¹³ bad ka kyrdan basaw, da u Beryl, u Oniks, bad u Jasper: bad la thep ïa ki ha la ki jaka ha ki shrong ksiar.

¹⁴ Bad kita ki maw ki la long katba kum ki kyrteng ki khun Israel, khat-ar tylli keiñ, katba kum ki kyrteng jong ki uwei uwei baroh bad la ka kyrteng kyrteng: kum ki jingpruid ka mohor, katba kum kita ki khat-ar jaid keiñ.

¹⁵ Bad ha ki rmiang kata ka jingdeng shadem ki la thaw ïa ki kynjri ba la thain da ka ksiar banylla.

¹⁶ Ki la thaw ruh, ar tylli ki shrong ksiar, bad ar tylli ki kyrwoh ksiar, bad ki la pyndait ïa kita ar tylli ki kyrwoh ha ki rmiang jong kata ka jingdeng shadem;

¹⁷ bad ki la buh ïa kita ki ar tylli ki kynjri ksiar ba la thain ha kita ki ar tylli ki kyrwoh ha ki rmiang jong kata ka jingdeng shadem.

¹⁸ Bad ïa kita ki ar tylli ki tduh jong kita ki kynjri ba la thain ki la pyndait ha kita ki ar tylli ki shrong, bad ki la buh ïa ki ha ki tyrpeng kata ka ephod shakhmat.

¹⁹ Ki la thaw ruh, ar tylli ki kyrwoh ksiar, bad ki la buh ïa ki ha ki ar ki dong kata ka jingdeng shadem, ha kata ka rmiang jong ka kaba ha ka liang jong kata ka ephod na shapoh.

²⁰ Bad ki la thaw ar tylli kiwei pat ki kyrwoh ksiar, bad ki la buh ïa ki ha ki baroh ar liang kata ka ephod narum, shakhmat jong ka, ha marpyrshah ka jingpyndait jong ka, haneng ka jingpanpoh baphylla jong kata ka ephod.

²¹ Bad ki la teh ïa kata ka jingdeng shadem na ki kyrwoh jong ka, ha ki kyrwoh jong kata ka ephod, da u ksai babyrïong, ba kan ïoh long haneng kata ka jingpanpoh baphylla jong kata ka ephod, ba kata ka jingdeng shadem kan ym ïohlait na kata ka ephod, kumba U Trai u la hukum ïa u Moses.

²² Bad u la thaw ïa ka barandi jong kata ka ephod da kaba la thain, da ka babyrïong baroh;

²³ te u la pong ryndang ïa kata ka barandi na marpdeng jong ka, kum ka thliew jong ka jymphong kieng, bad la kyntang baroh sawdong ïa kata ka thliew ka jingphong, ba kan ym kad.

²⁴ Ki la thaw ruh ha ki rmiang kata ka barandi ïa ki soh Pong da ka babyrïong, bad ka basaw bthuh, bad ka basaw syng-iang, bad ka linen bani ba la thir.

²⁵ Bad ki la thaw ïa ki shakuriaw da ka ksiar banylla, bad ki la buh ïa kita ki shakuriaw hapdeng kita ki soh Pong, ha ka rmiang kata ka barandi baroh sawdong hapdeng kita ki soh Pong;

²⁶ ïa ka shakuriaw bad u soh Pong, ïa ka shakuriaw bad u soh Pong, ha ka rmiang kata ka barandi baroh sawdong, ban shakri ha ka; kumba U Trai u la hukum ïa u Moses.

²⁷ Bad ki la thaw ïa ki sopti da ka linen bani ba la thain ïa u Aaron, bad ïa ki khun shynrang jong u,

²⁸ bad ïa ka meitr da ka linen bani, bad ïa ki tupia ba-itynnad da ka linen bani, bad ïa ki patlun de da ka linen bani ba la thir,

²⁹ bad ïa ka jingpanpoh da ka linen bani ba la thir, bad ka babyrïong, bad ka basaw bthuh, bad ka basaw syng-iang, da kaba suh; kumba U Trai u la hukum ïa u Moses.

³⁰ Ki la thaw ïa ka sla syntiew jong ka pansngiat bakhuid da ka ksiar banylla, bad ki la pruid halor jong ka, kum ki jingpruid ka mohor, “Ka jingkhuid ha U Trai.”

³¹ Bad ki la teh ha ka da u ksai babyrïong, ban pynneh ïa ka haneng halor kata ka meitr; kumba U Trai u la hukum ïa u Moses.

Ki jingbuh jingsat ha Ka Tabernakl

³² Kumta la pyndep ïa ka kam baroh Ka Tabernakl, kata ka ïingjaiñ jong ka jingïaseng keiñ: ki khun Israel ki la leh ruh katba kum ïa kata baroh ba U Trai u la hukum ïa u Moses, kumta keiñ ki la leh.

³³ Ki la ïawallam te ïa kata Ka Tabernakl ha u Moses, ïa kata ka ïingjaiñ keiñ, bad ïa ki jingbuh jong ka baroh, ïa ki jingpyndait jong ka, ïa ki lyntang jong ka, ïa ki dieng khap jong ka, bad ïa ki rishot jong ka ruh, bad ïa ki thliew tnaw jong ka;

³⁴ bad ïa ka jingtap da ki snieh ki langbrot shynrang ba la suit rong saw, bad ïa ka jingtap da ki snieh takash, bad ïa ka jingkah ban sop;

³⁵ ïa ka synduk ka jingphla, bad ïa ki dieng jingbah jong ka, bad ïa kata ka jingtap-isynei;

³⁶ ïa kata ka miej ruh, bad ïa ki pliang jong ka baroh, bad ïa ki 'pu pyni;

³⁷ ïa kata ka dieng pynïeng sharak ksiar banylla lem bad ki sharak jong ka, ïa kita ki sharak ban buh ter ter keiñ, bad ïa ki pliang jong ka baroh, bad ïa ka umphniang ïa ka jingshai;

³⁸ bad ïa kata ka duwan ksiar, bad ïa ka umphniang bapynsleh, bad ïa ka jingiwbih thang musla, bad ïa ka pyrda ïa ka jingkhang Ka Tabernakl;

³⁹ ïa kata ka duwan tama, bad ïa ka jingsliew ding tama kaba dei ïa ka, ïa ki dieng jingbah jong ka, bad ïa ki pliang jong ka baroh, ïa ka dabor bad ïa ka kjat jong ka;

⁴⁰ ïa ki pyrda jong kata ka phyllaw, ïa ki rishot jong ka ruh, bad ïa ki thliew tnaw jong ka, bad ïa ka pyrda ïa ka khyrdop kata ka phyllaw, ïa ki tyllai jong ka, bad ïa ki snar jong ka, bad ïa ki pliang baroh jong ka kam Ka Tabernakl, ïa ka ïingjaiñ kata ka jingïaseng keiñ;

⁴¹ ïa ki jaiñ ban kam jingkam, ïa ka ban trei ha ka jaka bakyntang, bad ïa kita ki jaiñ bakyntang de ïa u Aaron lyngdoh, bad ïa ki jaiñkup ki khun shynrang jong u, ïa ka ban kam ha ka kam lyngdoh.

⁴² Katba kum ïa kata baroh ba U Trai u la hukum ïa u Moses, kumta keiñ, ki khun Israel ki la trei ïa kata ka kam baroh.

⁴³ Bad u Moses u la khmih ïa kata ka kam baroh, te, ha khmih, ki la lah leh ïa ka kumba U Trai u la lah hukum, kumta hi keiñ, ki la leh ïa ka: bad u Moses u la kyrkhu ïa ki.