EKSODOS 38 - KA BAIBL

Ka duwan ka jingainguh thang

¹ Bad u la thaw ïa ka duwan ka jingainguh thang da u dieng Shittim: ka lynter jong ka, san pruh; bad ka pyngkiang jong ka, san pruh; kaba sawdong keiñ; bad ka jingjrong jong ka, lai pruh.

² Bad u la thaw ïa ki reng jong ka ha ki saw ki dong jong ka; kita ki reng jong ka ki la long na kajuh: bad u la suit da ka tama ïa ka.

³ Bad u la thaw ïa ki pliang baroh jong kata ka duwan, ïa ki khiew, bad ïa ki siang, bad ïa ki khuri, bad ïa ki proh doh, bad ïa ki pliang dieng: ïa kita ki pliang baroh u la thaw da ka tama.

⁴ Bad u la thaw ïa kata ka duwan ïa ka jaka sliew ding da ka tama, kum ka kriah hapoh ka thliew jong ka na shapoh, ban kot haduh ka pdeng jong ka.

⁵ Bad u la saiñ saw tylli ki kyrwoh ïa ki saw ki dong jong kata ka jaka sliew ding da ka tama, ïa ka ban long ki kyrwoh ïa ki dieng jingbah keiñ;

⁶ bad u la thaw ïa kita ki dieng jingbah da u dieng Shittim, bad u la suit da ka tama ïa ki.

⁷ U la pynphrung ruh ïa kita ki dieng jingbah ha kita ki kyrwoh kiba ha ki krung jong kata ka duwan, ïa ka ban bah ïa ka da ki; ïa ka thliew ka duwan u la thaw da ki lyntang.

Ka dabor tama

⁸ Bad u la thaw ïa ka dabor da ka tama, bad ïa ka kjat jong ka da ka tama, da ki ïitkhmih kita ki kynthei bashakri kiba shakri ha ka jingkhang Ka Tabernakl ka jingïaseng.

Ka phyllaw Ka Tabernakl

⁹ Bad u la thaw ïa ka phyllaw ruh: ha ka liang kaba shaphang shathie, ki pyrda kata ka phyllaw ki la long da ka linen bani ba la thir, shispah pruh:

¹⁰ ki rishot jong ki, arphew; bad ki thliew tnaw tama jong ki, arphew de; ki bnoh jong ki rishot bad ki shrong jong ki da ka rupa.

¹¹ Bad ha ka liang kaba shatei, shispah pruh; ki rishot jong ki, ki long arphew; bad ki thliew tnaw tama jong ki, ki long arphew; ki bnoh jong ki rishot bad ki shrong jong ki da ka rupa.

¹² Bad ha ka liang kaba shaphang sepngi, ki pyrda ki la long sanphew pruh, ki rishot jong ki, shiphew, bad ki thliew tnaw jong ki ruh, shiphew; ki bnoh jong kita ki rishot bad ki shrong jong ki da ka rupa.

¹³ Bad ha ka liang kaba shaphang mihngi, sanphew pruh.

¹⁴ Ki pyrda kata kawei ka liang jong ka khyrdop ki la long khatsan pruh; ki rishot jong ki, lai tylli; bad ki thliew tnaw jong ki ruh, lai tylli.

¹⁵ Bad kumta, ïa kata kawei pat ka liang: ha baroh ar liang jong ka khyrdop ka phyllaw u la thaw ïa ki pyrda, khatsan pruh; ki rishot jong ki, lai tylli; bad ki thliew tnaw jong ki ruh, lai tylli.

¹⁶ Baroh ki pyrda jong kata ka phyllaw baroh sawdong ki la long da ka linen bani ba la thir.

¹⁷ Bad ki thliew tnaw jong kita ki rishot ki la long da ka tama; ki bnoh jong ki rishot bad ki shrong jong ki da ka rupa; bad ïa ki khlieh jong ki la suit rupa; bad ïa ki rishot baroh kata ka phyllaw la thaw shrong da ka rupa.

¹⁸ Bad ka pyrda jong ka khyrdop kata ka phyllaw ka la long da kaba suh, da ka babyrïong, bad ka basaw bthuh, bad ka basaw syng-iang ruh, bad ka linen bani ba la thir: bad ka lynter, arphew pruh; bad ka jingjrong ha ka pyngkiang, san pruh; ban ïabiang bad ki pyrda jong kata ka phyllaw.

¹⁹ Ki rishot jong ki ruh ki long saw tylli; bad ki thliew tnaw tama jong ki ruh, saw tylli; ki bnoh jong ki da ka rupa, bad ïa ki khlieh jong ki bad ïa ki shrong jong ki la suit da ka rupa.

²⁰ Bad ki prek baroh jong kata Ka Tabernakl, bad jong kata ka phyllaw baroh sawdong, ki la long da ka tama.

Ka jingkheiñ lang ïa kiei kiei ba la ainguh da u paidbah

²¹ Kane ka long ka jingkheiñ ka jong Ka Tabernakl, Ka Tabernakl ka jingphla keiñ, ïa kiba la kheiñ da ka hukum u Moses, ïa ka kam jong ki Lebi, da ka kti u Ithamar, u khun u Aaron u lyngdoh.

²² Te u Besalil u khun u Uri, u khun u Hur, na ka jaid Judah, u la thaw ïa kita baroh ïa kiba U Trai u la hukum ïa u Moses;

²³ lem bad u ruh la don u Aholiab, u khun u Ahisamakh, na ka jaid Dan, u nongmut-dak, u nongtrei bastad buit, bad uba nang suh pynpur ha ka babyrïong, bad ka basaw bthuh, bad ka basaw syng-iang, bad ha ka jaiñ linen bani.

²⁴ Te kata ka ksiar baroh, ka ksiar ka jingainguh keiñ, kaba la leit ha kata ka kam baroh jong ka jaka kyntang, ka la long arphew khyndai talent, bad hynñiewspah laiphew shekel, katba kum ka shekel ka jaka kyntang.

²⁵ Bad ka rupa jong kita kiba la kheiñ na uta u paidlang ka la long shispah talent, bad shi hajar hynñiewspah bad hynñiewphew san shekel, katba kum ka shekel ka jaka kyntang.

²⁶ Shi bekah ïa uwei uwei baroh, kata ka long, shiteng shekel katba kum ka shekel ka jaka kyntang, na ka bynta uwei uwei baroh uba la hap kheiñ ïa u, naduh arphew snem ka rta bad ba tam, na ka bynta hynriewspah lai hajar bad sanspah sanphew ki briew.

²⁷ Bad na kita ki shispah ki talent rupa la saiñ ïa kita ki thliew tnaw kata ka jaka kyntang, bad ïa ki thliew tnaw jong kata ka jingkah pdeng; shispah ki thliew tnaw da kita ki shispah talent, shi talent talent keiñ ïa kawei kawei ka thliew tnaw.

²⁸ Bad na kita ki shi hajar hynñiewspah bad hynñiewphew san shekel u la thaw ïa ki bnoh ïa ki rishot, bad u la suit rupa ïa ki khlieh jong ki, bad u la ot shrong ïa ki.

²⁹ Bad kata ka tama ka jingainguh ka la long hynñiewphew talent, bad ar hajar sawspah shekel.

³⁰ Bad na kata u la thaw ïa kita ki thliew tnaw ïa ki jingkhang Ka Tabernakl ka jingïaseng, bad ïa kata ka duwan tama, bad ïa kata ka jaka sliew ding tama ïa ka, bad ïa ki pliang baroh jong kata ka duwan,

³¹ bad ïa kita ki thliew tnaw kata ka phyllaw baroh sawdong ruh, bad ïa kita ki thliew tnaw ka khyrdop ka phyllaw, bad ïa ki prek baroh Ka Tabernakl, bad ïa ki snar baroh kata ka phyllaw baroh sawdong.