EKSODOS 37 - KA BAIBL

Kaba shna ïa ka Synduk ka Jutang

¹ Te u Besalil u la thaw ïa kata ka synduk da u dieng Shittim; ar pruh shiteng, ka lynter jong ka, shi pruh shiteng, ka pyngkiang jong ka, bad shi pruh shiteng, ka jingjrong jong ka ruh:

² Bad u la suit ïa ka da ka ksiar banylla shapoh bad shabar, bad u la thaw ka pansngiat da ka ksiar ïa ka, baroh sawdong.

³ Bad u la saiñ ïa ka, saw tylli ki kyrwoh ksiar ha ki sawdong jong ka; ar tylli ki kyrwoh ha kawei ka liang, bad ar tylli ki kyrwoh ha kawei pat ka liang jong ka.

⁴ Bad u la thaw ïa ki dieng jingbah da u dieng Shittim, bad u la suit da ka ksiar ïa ki.

⁵ Bad u la pynphrung ïa kita ki dieng jingbah ha kita ki kyrwoh ha ki liang jong kata ka synduk, ïa ka ban bah ïa ka.

⁶ Bad u la thaw ïa ka jingtap-isynei da ka ksiar banylla; ar pruh shiteng, ka lynter jong ka, bad shi pruh shiteng, ka pyngkiang jong ka.

⁷ U la thaw ruh ar tylli ki Kherub ksiar; shitylli u la thaw ïa ki na kajuh ka dkhot, kata na baroh ar ki tduh kata ka jingtap-isynei;

⁸ ïa uwei u Kherub na ka tduh kaba shaphang shane, bad uwei u Kherub na kata ka tduh kaba shaphang shatei: na kata ka jingtap-isynei hi keiñ u la thaw ïa kita ki Kherub na ki tduh jong ka baroh ar.

⁹ Bad kita ki Kherub da kaba pyiar ïa la ki thapniang sha jrong, ki la kah da la ki thapniang ïa kata ka jingtap-isynei, bad ki la phai markhmat; shaphang kata ka jingtap-isynei keiñ ki la ïa-peit ki khmat jong kita ki Kherub.

Ka miej bad ki jingbuh jong ka

¹⁰ U la thaw ruh ïa kata ka miej da u dieng Shittim: ar pruh, ka lynter jong ka, bad ka pyngkiang jong ka, shi pruh; bad shi pruh shiteng, ka jingjrong jong ka;

¹¹ bad u la suit ïa ka da ka ksiar banylla, bad u la thaw ïa ka, ka pansngiat da ka ksiar baroh sawdong.

¹² U la thaw ïa ka shrong ruh ïa ka, shi khup baroh sawdong, bad u la thaw ïa ka pansngiat ksiar ïa kata ka shrong baroh sawdong.

¹³ Bad u la saiñ ïa ka, saw tylli ki kyrwoh ksiar, bad u la buh ïa kita ki kyrwoh ha kita ki saw ki dong jong ka kiba ha ki saw ki kjat jong ka.

¹⁴ Ha marpyrshah kata ka shrong la don kita ki kyrwoh, ki kyrwoh ïa kita ki dieng jingbah keiñ ïa ka ban bah ïa kata ka miej.

¹⁵ Bad u la thaw ïa kita ki dieng jingbah da u dieng Shittim, bad u la suit da ka ksiar ïa ki de, ïa ka ban bah ïa kata ka miej.

¹⁶ U la thaw ruh da ka ksiar banylla ïa kita ki pliang kiba halor kata ka miej, ïa ki khuri jong ka, bad ïa ki siang jong ka, bad ïa ki khiew jong ka ruh, bad ïa ki jingtap ban tap da ki.

Ka dieng pynïeng sharak

¹⁷ Bad u la thaw te ïa ka dieng pynïeng sharak da ka ksiar banylla: da kaba shoh tylli shi dkhot keiñ u la thaw ïa kata ka dieng pynïeng sharak; ïa ka met jong ka, bad ïa ki tnat jong ka, ïa ki khiew jong ka, ïa ki shrong jong ka, bad ïa ki syntiew jong ka ruh, ki la long da kata kajuh hi keiñ.

¹⁸ Bad hynriew tylli ki tnat kiba mih noh na ki liang jong ka; lai tylli ki tnat jong kata ka dieng pynïeng sharak na kawei ka liang jong ka, bad lai tylli ki tnat jong kata ka dieng pynïeng sharak na kata kawei pat ka liang jong ka;

¹⁹ ha kawei ka tnat lai tylli ki khiew ba la thaw kum ki soh Khyllam, ka shrong bad u syntiew; bad ha kawei pat ka tnat lai tylli ki khiew ba la thaw kum ki soh Khyllam, ka shrong bad u syntiew: kumjuh ruh ha kita ki hynriew tylli ki tnat ba-mih noh na kata ka dieng pynïeng sharak.

²⁰ Bad ha kata ka dieng pynïeng sharak la don ruh saw tylli ki khiew ba la thaw kum ki soh Khyllam, ki shrong jong ka bad ki syntiew jong ka ruh,

²¹ bad ka shrong hapoh ar tylli na ki tnat jong ka, bad ka shrong hapoh ar tylli na ki tnat jong ka, bad ka shrong hapoh ar tylli na ki tnat jong ka, katba kum kita ki hynriew ki tnat ba-mih noh na ka keiñ.

²² Ki shrong jong ki bad ki tnat jong ki, ki la long na kajuh: baroh kawei keiñ ka la long ba la shoh tylli na ka ksiar banylla.

²³ Bad u la thaw ïa ki hynñiew tylli ki sharak jong ka, bad ïa ki nap lur jong ka, bad ïa ki pliang jong ka ruh, da ka ksiar banylla.

²⁴ U la thaw ïa ka bad ïa ki pliang jong ka baroh da shi talent ka ksiar banylla.

Ka duwan ka jingiwbih

²⁵ U la thaw ruh ïa ka duwan ka jingiwbih thang da u dieng Shittim: shi pruh, ka lynter jong ka, bad shi pruh, ka pyngkiang jong ka ruh, kaba sawdong keiñ; bad ka jingjrong jong ka, ar pruh: ki reng jong ka ki la long na kajuh.

²⁶ Bad u la suit da ka ksiar ïa ka, ïa ka khlieh jong ka, bad ïa ki liang jong ka baroh sawdong, bad ïa ki reng jong ka: u la thaw ruh ïa ka, ïa ka pansngiat da ka ksiar baroh sawdong.

²⁷ Bad u la thaw ïa ka, ar tylli ki kyrwoh ksiar hapoh ka pansngiat jong ka, na ki ar tylli ki dong jong ka, ha ki ar tylli ki krung jong ka, kita ki kyrwoh ïa ki dieng jingbah keiñ ïa ka ban bah ïa ka da ki.

²⁸ Bad u la thaw ïa kita ki dieng jingbah da u dieng Shittim, bad u la suit da ka ksiar ïa ki.

Ka umphniang ba pynsleh bad ka jingiwbih thang

²⁹ U la thaw ruh ïa ka umphniang bapynsleh ka bakyntang, bad ïa kata ka jingiwbih thang basngur da ki musla ki baiwbih, kum ka rukom u apothekari.